ಬ್ರಿಸ್ಬೇನ್‌ ಇಂಟರ್‌ ನ್ಯಾಶನಲ್‌: ಮರ್ರೆಗೆ ಅಘಾತ, ನಡಾಲ್‌ ಗಾಯಾಳು

ಬ್ರಿಸ್ಬೇನ್‌: ರಶ್ಯದ ಟೆನಿಸಿಗ ಡ್ಯಾನಿಲ್‌ ಮೆಡ್ವೆಡೇವ್‌ “ಬ್ರಿಸ್ಬೇನ್‌ ಇಂಟರ್‌ನ್ಯಾಶನಲ್‌’ ಕೂಟದಲ್ಲಿ ಮಾಜಿ ವಿಶ್ವದ ನಂಬರ್‌ ವನ್‌ ಆಟಗಾರ ಆ್ಯಂಡಿ ಮರ್ರೆ ಅವರನ್ನು ನೇರ ಸೆಟ್‌ಗಳಿಂದ ಸೋಲಿಸಿದ್ದಾರೆ.

ಬುಧವಾರ ನಡೆದ ಪಂದ್ಯದಲ್ಲಿ ಮೆಡ್ವೆಡೇವ್‌ 7-5, 6-2 ಸೆಟ್‌ಗಳಿಂದ ಮರ್ರೆ ವಿರುದ್ಧ ಜಯಿಸಿದ್ದಾರೆ. ಕಳೆದ ವರ್ಷ ಸೊಂಟನೋವಿನಿಂದಾಗಿ ಟೆನಿಸ್‌ನಿಂದ ಬಹಳಷ್ಟು ಸಮಯ ದೂರ ಉಳಿದಿದ್ಧ ಮರ್ರೆ ಈ ಕೂಟದ ಮೂಲಕ ಟೆನಿಸಿಗೆ ಮರಳಿದ್ದರು. ಮೆಡ್ವೆಡೇವ್‌ ಕ್ವಾರ್ಟರ್‌ ಫೈನಲ್‌ನಲ್ಲಿ ಕೆನಡಾದ ಮಿಲೋಸ್‌ ರಾನಿಕ್‌ ಅವರನ್ನು ಎದುರಿಸಲಿದ್ದಾರೆ.

ಜಪಾನಿನ ಕೀ ನಿಶಿಕೋರಿ ಅಮೆರಿಕದ ಡೆನ್ನಿಸ್‌ ಕುಡ್ಲ ವಿರುದ್ದ 7-5, 6-2 ಸೆಟ್‌ಗಳಿಂದ ಗೆದ್ದರು. ನಿಶಿಕೋರಿ ಮುಂದಿನ ಪಂದ್ಯದಲ್ಲಿ 6ನೇ ಶ್ರೇಯಾಂಕಿತ ಗ್ರಿಗರ್‌ ಡಿಮಿಟ್ರೋವ್‌ ಅವರ ವಿರುದ್ಧ ಆಡಲಿದ್ದಾರೆ.

ನಡಾಲ್‌ ಹೊರಕ್ಕೆ
ಅಗ್ರ ಶ್ರೇಯಾಂಕಿತ ಸ್ಪೇನ್‌ನ ರಫೆಲ್‌ ನಡಾಲ್‌ ತೊಡೆಯ ನೋವಿನಿಂದಾಗಿ ಬ್ರಿಸ್ಬೇನ್‌ ಕೂಟದಿಂದ ಹಿಂದೆ ಸರಿದಿದ್ದಾರೆ. ಇವರ ಸ್ಥಾನಕ್ಕೆ ಜಪಾನ್‌ನ ಟಾರೊ ಡೇನಿಯಲ್‌ ಅವರನ್ನು ಸೇರಿಸಿಕೊಳ್ಳಲಾಗಿದೆ.