Bigg Boss Season-10: ಬಿಗ್‌ಬಾಸ್‌ ಲೆಕ್ಕಾಚಾರ ಶುರು ಸೀಸನ್‌-10 ಸುತ್ತ ಎಲ್ಲರ ಚಿತ್ತ

ಕನ್ನಡ ಕಿರುತೆರೆಯಲ್ಲಿ ಜನಪ್ರಿಯವಾಗಿರುವ ಒಂದು ಕಾರ್ಯಕ್ರಮವೆಂದರೆ ಅದು ಬಿಗ್‌ಬಾಸ್‌. ಖಾಸಗಿ ವಾಹಿನಿಯಲ್ಲಿ ಕಳೆದ 9 ಸೀಸನ್‌ಗಳನ್ನು ಯಶಸ್ವಿಯಾಗಿ ಪೂರೈಸಿರುವ ಈ ಕಾರ್ಯಕ್ರಮದ ಹೆಸರು ಮತ್ತೆ ಮುನ್ನೆಲೆಗೆ ಬಂದಿದೆ. ಹೌದು, ಬಿಗ್‌ಬಾಸ್‌ 10ನೇ ಸೀಸನ್‌ನ ತಯಾರಿ ತೆರೆಮರೆಯಲ್ಲಿ ಜೋರಾಗಿ ನಡೆಯುತ್ತಿದೆ. ಸೆಪ್ಟೆಂಬರ್‌ ಅಂತ್ಯದಿಂದ ಕನ್ನಡ ಬಿಗ್‌ಬಾಸ್‌ನ 10ನೇ ಆವೃತ್ತಿ ಆರಂಭವಾಗುವ ಸಾಧ್ಯತೆ ಇದೆ ಎನ್ನಲಾಗಿದೆ. ಹಾಗಾದರೆ ಈ ಬಾರಿ ಯಾರ್ಯಾರು ಸ್ಪರ್ಧಿಗಳಾಗುತ್ತಾರೆ ಎಂಬ ಕುತೂಹಲವೂ ಹುಟ್ಟಿಕೊಂಡಿದೆ. ಈ ಕುತೂಹಲಕ್ಕೆ ಉತ್ತರವಾಗಿ ಒಂದಷ್ಟು ಹೆಸರುಗಳು ಓಡಾಡುತ್ತಿವೆ. ಕಿರುತೆರೆ ಧಾರಾವಾಹಿ ಮಂದಿಯಿಂದ ಹಿಡಿದು ಕಾಂಟ್ರಾವರ್ಸಿ ಮೂಲಕ ಅಥವಾ ತಮ್ಮ “ಮಾತಿನ ಕೌಶಲ್ಯ’ದಿಂದ ಸೋಶಿಯಲ್‌ ಮೀಡಿಯಾದಲ್ಲಿ ಸದ್ದು ಮಾಡಿದ ಅನೇಕರ ಹೆಸರುಗಳು ಈ ಬಾರಿಯೂ ಕೇಳಿಬರುತ್ತಿದೆ.

ಇನ್ನು, ಸತತ 9 ಸೀಸನ್‌ಗಳನ್ನು ಯಶಸ್ವಿಯಾಗಿ ನಿರೂಪಣೆ ಮಾಡಿ ಸೈ ಎನಿಸಿಕೊಂಡಿರುವ ಕಿಚ್ಚ ಸುದೀಪ್‌ ಸದ್ಯ ತಮ್ಮ ಹೊಸ ಚಿತ್ರದ ಚಿತ್ರೀಕರಣದಲ್ಲಿ ಬಿಝಿಯಾಗಿದ್ದಾರೆ. ಬೆಂಗಳೂರು ಬಿಟ್ಟು, ಹೊರಗಿನ ಚಿತ್ರೀಕರಣವನ್ನು ಮುಗಿಸಿಕೊಳ್ಳುತ್ತಿರುವ ಸುದೀಪ್‌ ಆ ನಂತರ ಬಿಗ್‌ಬಾಸ್‌ನತ್ತ ಮುಖ ಮಾಡಲಿದ್ದಾರೆ.

ಸೀರಿಯಲ್‌ಗಳಿಗೆ ಕೋಕ್‌:  ಬಿಗ್‌ಬಾಸ್‌ ಪ್ರಸಾರವಾಗಲು ಆರಂಭವಾದ ನಂತರ ಒಂದಷ್ಟು ಧಾರಾವಾಹಿಗಳು ನಿಂತು ಹೋಗಲಿವೆ. ಸದ್ಯ ಪ್ರಸಾರವಾಗುತ್ತಿರುವ ಧಾರಾವಾಹಿಗಳಲ್ಲಿ ಯಾವ ಧಾರಾವಾಹಿಗೆ ಕೋಕ್‌ ಕೊಡಲಾಗುತ್ತದೆ ಎಂಬ ಲೆಕ್ಕಾಚಾರಗಳು ಕೂಡಾ ಕಿರುತೆರೆ ವೀಕ್ಷಕರ ಪಾಳಯದಲ್ಲಿ ನಡೆಯುತ್ತಿದೆ.