ಸೀಲ್‌ಡೌನ್‌ ವಿಸ್ತೀರ್ಣದಲ್ಲಿ ಕಡಿತ

ಭದ್ರಾವತಿ:  ಚೆನ್ನಗಿರಿ ರಸ್ತೆಯಲ್ಲಿನ ಗರ್ಭಿಣಿಯಲ್ಲಿ ಕಂಡುಬಂದ ಕೋವಿಡ್ ಸೋಂಕಿನ ಕಾರಣ ಜೂನ್‌ ಮೊದಲ ವಾರದಲ್ಲಿ ನಿವಾಸದ ನಾಲ್ಕು ದಿಕ್ಕಿನ ನೂರು ಮೀಟರ್‌ ವ್ಯಾಪ್ತಿಯವರಗೆ ಮಾಡಲಾಗಿದ್ದ ಸೀಲ್‌ಡೌನ್‌ ವಿಸ್ತೀರ್ಣವನ್ನು ಐವತ್ತು ಮೀಟರ್‌ ವ್ಯಾಪ್ತಿಗೆ ಸಂಕುಚಿತಗೊಳಿಸಿ ಸೀಲ್‌ಡೌನ್‌ ವ್ಯಾಪ್ತಿಯನ್ನು ಸಡಿಲಗೊಳಿಸಲಾಗಿದೆ.

ಸೀಲ್‌ ಡೌನ್‌ ಮಾಡಲಾಗಿರುವ ರಸ್ತೆಯು ವ್ಯಾಪಾರ- ವಹಿವಾಟಿನ ಪ್ರದೇಶವಾಗಿರುವ ಕಾರಣ ಸೀಲ್‌ ಡೌನ್‌ ಮಾಡಿರುವುದರಿಂದ ವ್ಯಾಪಾರ- ವಹಿವಾಟಿಗೆ ತೊಂದರೆಯಾಗುತ್ತಿದೆ ಎಂದು ಆಕ್ಷೇಪಿಸಿ ಅಲ್ಲಿನ ಕೆಲವರು ಜಿಲ್ಲಾಧಿಕಾರಿಗಳಿಗೆ ಸೀಲ್‌ಡೌನ್‌ ತೆರವುಗೊಳಿಸುವಂತೆ ಮನವಿ ಸಲ್ಲಿಸಿದ್ದರ ಮೇರೆಗೆ ನಗರಾಡಳಿತ ಸೀಲ್‌ಡೌನ್‌ ವಿಸ್ತೀರ್ಣವನ್ನು ಅರ್ಧಕ್ಕೆ ಇಳಿಸಿದೆ. ಸೋಂಕಿತ ಮಹಿಳೆಯ ತಂದೆ- ತಾಯಿಯ ವೈದ್ಯಕೀಯ ವರದಿ ಬರಬೇಕಿದ್ದು ಅದು ನೆಗೆಟಿವ್‌ ಬಂದರೆ ಸೀಲ್‌ಡೌನ್‌ ಅನ್ನು ಸಂಪೂರ್ಣವಾಗಿ ತೆರವುಗೊಳಿಸುವ ಸಾಧ್ಯತೆ ಇದೆ ಎನ್ನಲಾಗಿದೆ.