ಶ್ರೀಮುರಳಿ ಅಭಿನಯಿಸಲಿರುವ “ಮದಗಜ’ ಚಿತ್ರ ಶುರುವಿಗೆ ಮುನ್ನವೇ ಸಾಕಷ್ಟು ಸುದ್ದಿ ಮಾಡಿರುವುದು ಗೊತ್ತೇ ಇದೆ. ಈಗ ಹೊಸ ಸುದ್ದಿ ಏನಪ್ಪಾ ಅಂದರೆ, ನಿರ್ದೇಶಕ ಎಸ್‌.ಮಹೇಶ್‌ಕುಮಾರ್‌ ಶ್ರೀಮುರಳಿ ಅವರಿಗೆ ನಾಯಕಿ ಹುಡುಕಾಟದಲ್ಲಿ ಸಿಕ್ಕಾಪಟ್ಟೆ ತಲೆಕೆಡಿಸಿಕೊಂಡಂತಿದೆ. ಚಿತ್ರದಲ್ಲಿ ನಾಯಕಿಯದು ಕ್ಲಾಸ್‌ ಆಗಿರುವ ಪಾತ್ರ.
ಅದರಲ್ಲೂ ಮುದ್ದಾಗಿರುವ ಹುಡುಗಿಯೇ ಬೇಕು. ಹಾಗಾಗಿ ಸಾಕಷ್ಟು ಕಡೆ ಹುಡುಕಾಟ ನಡೆಸಿದ ನಿರ್ದೇಶಕರು, ಈಗ ಅನುಪಮಾ ಪರಮೇಶ್ವರನ್‌ ಮತ್ತು ಸಾಯಿ ಪಲ್ಲವಿ ಕಡೆ ಮುಖ ಮಾಡಿದ್ದಾರೆ. “ನಟಸಾರ್ವಭೌಮ’ ಚಿತ್ರದಲ್ಲಿ ನಟಿಸಿದ್ದ ಅನುಪಮಾ ಪರಮೇಶ್ವರನ್‌ ಅವರನ್ನು ಈಗಾಗಲೇ ಸಂಪರ್ಕಿಸಿರುವ ನಿರ್ದೇಶಕರು ಕಥೆಯ ಒನ್‌ಲೈನ್‌ ಹೇಳಿದ್ದಾರೆ.
ಇಷ್ಟಪಟ್ಟಿರುವ ಅನುಪಮಾ, ಸದ್ಯಕ್ಕೆ ಬಿಜಿ. ಅವರಿಗೆ ಡೇಟ್ಸ್‌ನದ್ದೇ ಸಮಸ್ಯೆ. ಯಾವುದಕ್ಕೂ ಅವರಿಂದ ಉತ್ತರ ಬಂದಿಲ್ಲ. ಒಂದು ವೇಳೆ ಅನುಪಮಾ ಗ್ರೀನ್‌ ಸಿಗ್ನಲ್‌ ಕೊಟ್ಟರೆ ಅವರೇ “ಮದಗಜ’ ಚಿತ್ರಕ್ಕೆ ನಾಯಕಿ. ಒಂದು ವೇಳೆ ಡೇಟ್‌ ಸಮಸ್ಯೆಯಿಂದ ಅವರು ಸಿಗದೇ ಇದ್ದರೆ, ಸಾಯಿಪಲ್ಲವಿ ಅವರು ಬರುವ ಸಾಧ್ಯತೆಯೂ ಇದೆ ಎಂಬುದು ಚಿತ್ರತಂಡದ ಮಾತು.
“ಮದಗಜ’ ಚಿತ್ರದ ಪಾತ್ರಕ್ಕೆ ಸಾಯಿಪಲ್ಲವಿ ಅವರೂ ಸರಿಹೊಂದುತ್ತಾರೆ ಎಂಬ ಕಾರಣಕ್ಕೆ ನಿರ್ದೇಶಕರು ಅವರನ್ನು ಕೇಳಿದ್ದಾರೆ. ಒಟ್ಟಾರೆ, ಈ ಇಬ್ಬರು ನಾಯಕಿಯರ ಪೈಕಿ ಯಾರು ಸಿಕ್ಕರೂ “ಮದಗಜ’ ಚಿತ್ರದಲ್ಲಿ ನಾಯಕಿಯಾಗಲಿದ್ದಾರೆ. ಒಂದು ವೇಳೆ ಇಬ್ಬರೂ ಸಿಗದೇ ಇದ್ದರೆ, ಮತ್ತೆ ಕನ್ನಡದ ಹುಡುಗಿಯತ್ತ ಮುಖ ಮಾಡಿದರೂ ಅಚ್ಚರಿ ಇಲ್ಲ.
ಈ ಚಿತ್ರದಲ್ಲಿ ಶ್ರೀಮುರಳಿ ಅವರ ಗೆಟಪ್‌ ತುಂಬಾ ಹೊಸದಾಗಿರಲಿದೆ ಎನ್ನುವ ನಿರ್ದೇಶಕರು, ಅವರ ಹೇರ್‌ಸ್ಟೈಲ್‌ ಎಲ್ಲವೂ ಚೇಂಜ್‌ ಆಗಿರಲಿದ್ದು, ಇಲ್ಲಿಯವರೆಗೆ ನೋಡಿದ ಶ್ರೀಮುರಳಿ ಅವರಿಗೂ, “ಮದಗಜ’ ಚಿತ್ರದ ಶ್ರೀಮುರಳಿ ಅವರಿಗೂ ಸಾಕಷ್ಟು ವ್ಯತ್ಯಾಸ ಇರಲಿದೆ ಎಂಬುದು ಅವರ ಮಾತು. ಸದ್ಯಕ್ಕೆ “ಮದಗಜ’ ಚಿತ್ರವನ್ನು ಮೂರು ಹಂತದಲ್ಲಿ ಚಿತ್ರೀಕರಿಸಲು ನಿರ್ದೇಶಕರು ಯೋಚಿಸಿದ್ದಾರೆ.
ಶೇ.30 ರಷ್ಟು ಭಾಗದ ಚಿತ್ರೀಕರಣ ವಿದೇಶದಲ್ಲೇ ನಡೆಯಲಿದೆ. ಅಲ್ಲೊಂದು ಭರ್ಜರಿ ಫೈಟು, ಎಂಟು ಸೀನು, ಹಾಡು ಇರಲಿದೆ. ವಿಶೇಷವೆಂದರೆ, ವಿದೇಶಿ ನೆಲದಲ್ಲಿ ಗೂಳಿ ಫೈಟ್‌ವೊಂದನ್ನು ಭರ್ಜರಿಯಾಗಿ ಚಿತ್ರಿಸುವ ಯೋಚನೆ ನಿರ್ದೇಶಕರಿಗಿದೆಯಂತೆ.
ಈಗಾಗಲೇ ಅದಕ್ಕೆಲ್ಲಾ ತಯಾರಿಯೂ ನಡೆಸಿರುವ ಅವರು, ಅಲ್ಲಿ ಗೂಳಿಗಳ ಜಂಪಿಂಗ್‌ ನಡುವೆ ಹೀರೋ ಇಂಟ್ರೋಡಕ್ಷನ್‌ ಸೀನ್ ಶೂಟ್‌ ಮಾಡಲಾಗುತ್ತದೆ. ಆ ಬಳಿಕ ಬೆಂಗಳೂರು, ರಾಮೋಜಿ ಫಿಲ್ಮ್ಸಿಟಿಯಲ್ಲಿ ಚಿತ್ರೀಕರಿಸಲಾಗುವುದು ಎನ್ನುವುದು ಮಹೇಶ್‌ ಕೊಡುವ ವಿವರ. ಜೂನ್‌ ಮೊದಲ ವಾರದಲ್ಲಿ “ಮದಗಜ’ ಚಿತ್ರ ಶುರುವಾಗಲಿದೆ ಎನ್ನುತ್ತಾರೆ.
