ಗಂಟೆ 11 ಆದ್ರೂ ಕೆಲಸಕ್ಕೆ ಬಾರದ ಸಿಬ್ಬಂದಿ

ಬೆಂಗಳೂರು: ಬಿಬಿಎಂಪಿ ಕೇಂದ್ರ ಕಚೇರಿಯ ವಿವಿಧ ವಿಭಾಗಗಳಲ್ಲಿ ಸೋಮವಾರ ಮೇಯರ್‌ ಪದ್ಮಾವತಿ ಅವರು ಬೆಳಿಗ್ಗೆ ಪಾಲಿಕೆ ಸಿಬ್ಬಂದಿ ಹಾಜರಾತಿ ತಪಾಸಣೆ ನಡೆಸುವಾಗ ಖಾಲಿ ಕುರ್ಚಿಗಳು ಅವರಿಗೆ ಸ್ವಾಗತ ಕೋರಿದವು!

ಹೌದು, ಬಿಬಿಎಂಪಿ ಅಕಾರಿಗಳು ಹಾಗೂ ನೌಕರರ ಹಾಜರಾತಿ ಪರಿಶೀಲಿಸಲು ಸೋಮವಾರ ಬೆಳಗ್ಗೆ 10.30ಕ್ಕೆ ಮೇಯರ್‌, ಬಿಬಿಎಂಪಿ ಕೇಂದ್ರ ಕಚೇರಿಯ ಆವರಣದಲ್ಲಿರುವ ಹಣಕಾಸು ವಿಭಾಗದ ವಿಶೇಷ ಆಯುಕ್ತರ ಕಚೇರಿ, ಮುಖ್ಯ ಲೆಕ್ಕಾಕಾರಿಗಳ ಕಚೇರಿ, ಆಸ್ತಿ ವಿಭಾಗದ ಜಂಟಿ ಆಯುಕ್ತರ ಕಚೇರಿ, ಕಂದಾಯ ವಿಭಾಗದ ಜಂಟಿ ಆಯುಕ್ತರ ಕಚೇರಿ, ಟಿವಿಸಿಸಿ ಕಚೇರಿಗಳು ಸೇರಿದಂತೆ ಪಾಲಿಕೆಯ 10ಕ್ಕೂ ಹೆಚ್ಚು ವಿಭಾಗಗಳ ಕಚೇರಿಗಳಿಗೆ ಭೇಟಿ ನೀಡಿ ಹಾಜರಾತಿ ಬಗ್ಗೆ ತಪಾಸಣೆ ನಡೆಸಿದರು. 

ಬೆಳಗ್ಗೆ 11.30 ಆದರೂ, ಶೇ.40ರಷ್ಟು ಅಕಾರಿ, ಸಿಬ್ಬಂದಿ ಕರ್ತವ್ಯಕ್ಕೆ ಹಾಜರಾಗದಿರುವುದ ಕಂಡು ಕೋಪಗೊಂಡ ಮೇಯರ್‌ ಪದ್ಮಾವತಿ, ಕಚೇರಿಯಲ್ಲಿದ್ದ ಹಿರಿಯ ಅಕಾರಿಗಳನ್ನು ತರಾಟೆಗೆ ತೆಗೆದುಕೊಂಡರು. ಜತೆಗೆ ಎಲ್ಲ ಕಚೇರಿಗಳಲ್ಲಿನ ಹಾಜರಾತಿ ಪುಸ್ತಕಗಳನ್ನು ವಶಕ್ಕೆ ಪಡೆದುಕೊಂಡು ಸಮಯ ಪಾಲನೆ ಮಾಡದ ಅಕಾರಿಗಳು ಮತ್ತು ಸಿಬ್ಬಂದಿಗೆ ಕೂಡಲೇ ಶೋಕಾಸ್‌ ನೋಟಿಸ್‌ ಜಾರಿಗೊಳಿಸಿ, ಗೈರು ಹಾಜರಾದವರಿಗೆ ವೇತನ ರಹಿತ ರಜೆ ನೀಡುವಂತೆ ಸಂಬಂಸಿದ ಅಕಾರಿಗಳಿಗೆ ಸೂಚಿಸಿದರು. 

“ನಾನು ಮತ್ತೆ ಯಾವಾಗ ದಿಢೀರ್‌ ಪರಿಶೀಲನೆ ನಡೆಸುತ್ತೇನೋ ಗೊತ್ತಿಲ್ಲ. ಆಗಲೂ ಅಕಾರಿಗಳು ಮತ್ತು ಸಿಬ್ಬಂದಿಗಳು ಸರಿಯಾದ ಸಮಯಕ್ಕೆ ಕರ್ತವ್ಯಕ್ಕೆ ಹಾಜರಿರಾಗದಿರುವುದು ಕಂಡು ಬಂದರೆ ಅಂತಹವರ ವಿರುದ್ಧ ಶಿಸ್ತು ಕ್ರಮಕೈಗೊಳ್ಳಲಾಗುವುದು” ಎಂದು ಎಚ್ಚರಿಕೆ ನೀಡಿದರು. 

ಪರಿಶೀಲನೆ ವೇಳೆ ಹಾಜರಾತಿಯಲ್ಲಿ ಪಾರದರ್ಶಕತೆ ತರುವ ನಿಟ್ಟಿನಲ್ಲಿ ಅಳವಡಿಸಿರುವ 5 ಬಯೋಮೆಟ್ರಿಕ್‌ ಯಂತ್ರಗಳಲ್ಲಿ ಕೇವಲ ಒಂದು ಮಾತ್ರ ಕಾರ್ಯನಿರ್ವಹಿಸುತ್ತಿರುವುದನ್ನು ಕಂಡು ಮತ್ತಷ್ಟು ಕೆಂಡಾಮಂಡಲರಾದ ಮೇಯರ್‌, ಪಾಲಿಕೆಯ ಮಾಹಿತಿ ತಂತ್ರಜ್ಞಾನ (ಐಟಿ) ವಿಭಾಗದ ಅಕಾರಿಗಳನ್ನು ತರಾಟೆಗೆ ತೆಗೆದುಕೊಂಡರು. ಕೂಡಲೇ ಬಯೋ ಮೆಟ್ರಿಕ್‌ ಯಂತ್ರಗಳನ್ನು ದುರಸ್ತಿಪಡಿಸುವಂತೆ ಮತ್ತು ಸಿಬ್ಬಂದಿಗಳು ಬಯೋಮೆಟ್ರಿಕ್‌ ಬಳಕೆಗೆ ಮುಂದಾಗದಿದ್ದರೆ ಅಂತಹವರಿಗೆ ಗೈರು ಎಂದು ಪರಿಗಣಿಸುವಂತೆ ಹಿರಿಯ ಅಕಾರಿಗಳಿಗೆ ಸೂಚಿಸಿದರು. 

ಧೂಳು ಹಿಡಿಯುತ್ತಿರುವ ಕಡತಗಳು!
ಮೇಯರ್‌ ಪಾಲಿಕೆಯ ವಿವಿಧ ವಿಭಾಗಗಳಿಗೆ ಭೇಟಿ ನೀಡಿ ಪರಿಶೀಲಿಸುವ ವೇಳೆ ಹಲವಾರು ಕಡತಗಳು ಧೂಳು ಹಿಡಿಯುತ್ತಿರುವುದು ಬೆಳಕಿಗೆ ಬಂದಿತು. ಇದರಿಂದ ಸಿಡಿಮಿಡಿಗೊಂಡ ಮಹಾಪೌರರು ಕಡತಗಳನ್ನು ಕೂಡಲೇ ವಿಲೇವಾರಿ ಮಾಡಲು ನಿಮಗೇನು ಕಷ್ಟ? ಕಡತಗಳ ನಿರ್ವಹಣೆ ಮಾಡಲು ಸಾಧ್ಯವಾಗದಿದ್ದರೆ ಸಾರ್ವಜನಿಕರ ಸೇವೆ ಹೇಗೆ ಮಾಡುತ್ತೀರಾ? ಸಿಬ್ಬಂದಿಗಳು ಮೊದಲು ತಮ್ಮ ಕರ್ತವ್ಯ ಸ್ಥಳವನ್ನು ಶುಚಿಯಾಗಿಟ್ಟುಕೊಳ್ಳಬೇಕು ಎಂದು ಸಲಹೆ ನೀಡಿದರು.

ಮೇಯರ್‌, ಆಯುಕ್ತರು ಮತ್ತು ವಿಶೇಷ ಆಯುಕ್ತರು ನಿತ್ಯ ಬರುವಂತಹ ಕೇಂದ್ರ ಕಚೇರಿಯಲ್ಲಿಯೇ ಅಕಾರಿಗಳು ಮತ್ತು ನೌಕರರು ಸಮಯಕ್ಕೆ ಸರಿಯಾಗಿ ಹಾಜರಾಗದಿದ್ದರೆ, ವಲಯ ಕಚೇರಿಗಳಲ್ಲಿ ಇನ್ಯಾವ ಪರಿಸ್ಥಿತಿ ಇರುತ್ತದೆ ಎಂದು ಊಹೆ ಮಾಡಿಕೊಳ್ಳಲು ಸಾಧ್ಯವಾಗುತ್ತಿಲ್ಲ. ಗೈರು ಹಾಜರಾಗಿರುವ ಎಲ್ಲ ಸಿಬ್ಬಂದಿಗೆ ಶೋಕಾಸ್‌ ನೋಟಿಸ್‌ ನೀಡುವಂತೆ ಅಕಾರಿಗಳಿಗೆ ಸೂಚಿಸಿದ್ದು, ಮುಂದಿನ ದಿನಗಳಲ್ಲಿ ಇದೇ ನಿರ್ಲಕ್ಷ್ಯ ಮುಂದುವರಿಸುವವರ ವಿರುದ್ಧ ಕಠಿಣ ಕ್ರಮಕೈಗೊಳ್ಳಲಾಗುವುದು. 
-ಜಿ.ಪದ್ಮಾವತಿ, ಮೇಯರ್‌