2 ನಿಮಿಷಗಳಲ್ಲಿ 2 ಲಕ್ಷ ರೂ. ಸಾಲ!

ಹೊಸದಿಲ್ಲಿ: ಆನ್‌ಲೈನ್‌ ಮೂಲಕ ಹಣಪಾವತಿ ಮಾಡುವ ಆ್ಯಪ್‌ ಪೇಟಿಎಂ ಇತ್ತೀಚೆಗಿನ ದಿನಗಳಲ್ಲಿ ತನ್ನ ಜನಪ್ರಿಯತೆಯನ್ನು ತುಸು ಕಳೆದು ಕೊಂಡಿದೆ. ಇದಕ್ಕೆ ಕಾರಣ ಗೂಗಲ್‌ ಪೇ, ಭೀಮ್‌, ಮೊಬಿಕ್ವಿಕ್‌, ಫೋನ್‌ ಪೇಗಳ ಅಬ್ಬರ. ಇದೀಗ ಪೇಟಿಎಂ ತನ್ನ ಕಳೆದುಕೊಂಡ ಜನಪ್ರಿಯತೆಯನ್ನು ಮರಳಿ ಗಳಿಸಲು ಹೊಸ ಯೋಜನೆಯೊಂದಕ್ಕೆ ಕೈಹಾಕಿದೆ.

ಪೇಟಿಎಂನ 10 ಲಕ್ಷ ಗ್ರಾಹಕರು ಕೇವಲ ಎರಡೇ ನಿಮಿಷದಲ್ಲಿ 2 ಲಕ್ಷ ರೂ.ಗಳವರೆಗೆ ಸಾಲ ಪಡೆಯಬಹುದು. ಅಂತಹದ್ದೊಂದು ವ್ಯವಸ್ಥೆಯೊಂದನ್ನು ಆ್ಯಪ್‌ನಲ್ಲಿ ಸೃಷ್ಟಿಸಲಾಗಿದೆ. ಇದಕ್ಕಾಗಿ ಪೇಟಿಎಂ, ಬ್ಯಾಂಕೇತರ ಹಣಕಾಸು ಸಂಸ್ಥೆಗಳು (ಎನ್‌ಬಿಎಫ್ಸಿ) ಮತ್ತು ಬ್ಯಾಂಕ್‌ಗಳ ಜೊತೆಗೆ ಒಪ್ಪಂದ ಮಾಡಿಕೊಂಡಿದೆ.

ಅರ್ಹ ಗ್ರಾಹಕರು ಯಾವುದೇ ಭೌತಿಕ ದಾಖಲೆಗಳನ್ನು ಸಲ್ಲಿಸುವ ಅಗತ್ಯವಿಲ್ಲದೇ ಆ್ಯಪ್‌ ಮೂಲಕವೇ ಸಾಲಕ್ಕೆ ಅರ್ಜಿ ಸಲ್ಲಿಸಬಹುದು. ಬ್ಯಾಂಕ್‌ಗಳಿಂದ ತತ್‌ಕ್ಷಣ ಹಣ ಪಾವತಿಯಾಗಲಿದೆ. ಅದನ್ನು ಮರಳಿ ಸಲು 18ರಿಂದ 36 ತಿಂಗಳವರೆಗೆ ಸಮಯವಿರುತ್ತದೆ. ಕಂತುಗಳನ್ನು ಎಷ್ಟು ಅವಧಿಗೆ ಸಾಲ ತೆಗೆದುಕೊಳ್ಳಲಾಗಿದೆ ಎನ್ನುವುದನ್ನು ನೋಡಿ ನಿರ್ಧರಿಸಲಾಗುತ್ತದೆ. ಆದರೆ ಸಾಲ ಪಡೆಯಲು ಯಾವೆಲ್ಲ ಅರ್ಹತೆ ಇರಬೇಕು ಎನ್ನುವುದು ಗೊತ್ತಾಗಿಲ್ಲ.

ಸ್ವ ಉದ್ಯೋಗಿಗಳು, ವೇತನದಾರರು, ಹೊಸತಾಗಿ ಸಾಲ ಪಡೆಯುವವರಿಗೆ ನೆರವಾಗುವುದು ಪೇಟಿಎಂ ಉದ್ದೇಶ. ಹಾಗೆಯೇ ಸಾಂಪ್ರದಾಯಿಕ ಬ್ಯಾಂಕಿಂಗ್‌ ವ್ಯವಸ್ಥೆಗೆ ಹೋಲಿಸಿ ದರೆ ಇದೊಂದು ಹೊಸ ಪರಿವರ್ತನೆ ಎನ್ನುವುದು ಅದರ ಅಭಿಪ್ರಾಯ.