ವಾಡಿ-ಯಾದಗಿರಿ ಮಧ್ಯೆ ಬಸ್‌ ಸಂಚಾರ ಶುರು

ವಾಡಿ: ಲಾಕ್‌ಡೌನ್‌ ಸಡಿಲಿಕೆಯಾದ ಹಿನ್ನೆಲೆಯಲ್ಲಿ ವಾಡಿ-ಯಾದಗಿರಿ ಮಧ್ಯೆ ಬುಧವಾರದಿಂದ ಬಸ್‌ ಸಂಚಾರ ಆರಂಭಗೊಂಡಿದ್ದು, ಪ್ರಾಯಾಣಿಕರಿಲ್ಲದ ಕಾರಣ ಬಸ್‌ನ ಆಸನಗಳು ಖಾಲಿ ಖಾಲಿಯಾಗಿದ್ದವು.

ಕಳೆದ 40 ದಿನಗಳಿಂದ ಬಸ್‌ ಸಂಚಾರವಿಲ್ಲದೆ ಬಿಕೋ ಎನ್ನುತ್ತಿದ್ದ ಕಲಬುರಗಿ-ಯಾದಗಿರಿ ನಡುವಿನ ರಾಷ್ಟ್ರೀಯ ಹೆದ್ದಾರಿ ಮೇಲೆ ಆಗೊಂದು ಈಗೊಂದು ಎನ್‌ಇಕೆಎಸ್‌ಆರ್‌ ಟಿಸಿ ಬಸ್‌ ಕಾಣಿಸಿಕೊಳ್ಳುತ್ತಿವೆ. ಜನರು ಇನ್ನೂ ಮನೆಯಲ್ಲಿಯೇ ಲಾಕ್‌ಡೌನ್‌ ಫಜೀತಿ ಅನುಭವಿಸುತ್ತಿರುವುದರಿಂದ ಪ್ರಯಾಣಿಕರ ಸಂಖ್ಯೆ ಕ್ಷೀಣಿಸಿದೆ. ಬೆಳಗ್ಗೆ 8:00ರ ನಂತರ ವಾಡಿ ನಗರಕ್ಕೆ ಬಂದು ಹೋಗುತ್ತಿರುವ ಯಾದಗಿರಿ ಡಿಪೋದ ಬಸ್‌ನಲ್ಲಿ ಪ್ರಯಾಣಿಕರ ಕೊರತೆ ಎದ್ದು ಕಾಣಿಸಿತು.

ಆರಂಭಿಕವಾಗಿ ಕೇವಲ ಬೆಳಗ್ಗೆ ಮಾತ್ರ ಒಂದು ಬಸ್‌ ಯಾದಗಿರಿಯಿಂದ ವಾಡಿ ನಗರಕ್ಕೆ ಬಂದು ಹೋಗುತ್ತಿದೆ. ಕಲಬುರಗಿ ಹಾಗೂ ಯಾದಗಿರಿ ಡಿಪೋಗಳಿಗೆ ಸೇರಿದ ಎಕ್ಸ್ ಪ್ರಸ್‌ ಬಸ್‌ ಸಂಖ್ಯೆಗಳಲ್ಲೂ ಏರಿಕೆ ಕಂಡಿಲ್ಲ. ಪ್ರಯಾಣಿಕರ ಸಂಖ್ಯೆ ಹೆಚ್ಚಾಗುತ್ತಿದ್ದಂತೆ ಬಸ್‌ಗಳ ಸಂಖ್ಯೆಯೂ ಹೆಚ್ಚಿಸಲಾಗುವುದು ಎಂದು ಯಾದಗಿರಿ ಬಸ್‌ ಡಿಪೋ ಅಧಿಕಾರಿಗಳು ತಿಳಿಸಿದ್ದಾರೆ.