ಜನರೊಂದಿಗೆ ಬೆಸೆದ ಗ್ರಾಮವಾಸ್ತವ್ಯ: ಸಚಿವ ಆರ್‌.ಅಶೋಕ್‌

ಕಲಾದಗಿ: ಗ್ರಾಮವಾಸ್ತವ್ಯದ ನೆನಪು ನನ್ನ ಜೀವನದಲ್ಲಿ ಅಚ್ಚಳಿಯದೆ ಉಳಿದಿದೆ ಎಂದು ಕಂದಾಯ ಸಚಿವ ಆರ್‌. ಅಶೋಕ್‌ ಹೇಳಿದರು.

ಬಾಗಲಕೋಟೆ ಜಿಲ್ಲೆಯ ಕಲಾದಗಿಯಲ್ಲಿ ರವಿವಾರ ಮಾಧ್ಯಮದವರ ಜತೆ ಮಾತನಾಡಿದ ಅವರು, ಗ್ರಾಮವಾಸ್ತವ್ಯ ಅಪರೂಪದ ಕಾರ್ಯಕ್ರಮ. ಜನರ ಜತೆ ಬೆರೆತ ಕ್ಷಣಗಳು, ಪ್ರೀತಿ- ವಿಶ್ವಾಸ ಕೇವಲ ಕಾರ್ಯಕ್ರಮ ಉದ್ಘಾಟನೆ ಮಾಡಿ ಹೋದರೆ ಸಿಗುವುದಿಲ್ಲ. ಇಲ್ಲಿಯೇ ಜನರ ಜತೆಗಿದ್ದಾಗ ಮಾತ್ರ ಅವರ ಪ್ರೀತಿ-ವಿಶ್ವಾಸ-ನಂಬಿಕೆ ವೃದ್ಧಿಯಾಗುತ್ತದೆ.

ಪ್ರತಿಯೊಬ್ಬ ರಾಜಕಾರಣಿ ಕೂಡ ಈ ತರಹದ ಕಾರ್ಯಕ್ರಮ ಮಾಡಬೇಕು, ಜನರಿಗೆ ಹತ್ತಿರ ಆಗಬೇಕು. ನಮ್ಮನ್ನು ಆಯ್ಕೆ ಮಾಡುವ ಜನಗಳ ಜತೆ ಇದ್ದು, ಅವರ ಕಷ್ಟ ಸುಖದಲ್ಲಿ ನಾವೂ ಇದ್ದೇವೆ ಅನ್ನುವ ಭಾವನೆ ಬೆಳೆಸಬೇಕು ಎಂದು ಹೇಳಿದರು.