ವಾಮಂಜೂರು: ಇಬ್ಬರು ಮಕ್ಕಳ ಜತೆ ತಾಯಿ ನಾಪತ್ತೆ  

ಮಂಗಳೂರು: ಮಕ್ಕಳನ್ನು ಶಾಲೆಗೆ ಬಿಟ್ಟು ಬರುತ್ತೇನೆಂದು   ಹೋಗಿದ್ದ  ಮಹಿಳೆಯೊಬ್ಬರು ಇಬ್ಬರು ಮಕ್ಕಳ ಸಹಿತ ನಾಪತ್ತೆಯಾದ ಘಟನೆ ನಗರದ ಪಚ್ಚನಾಡಿಯಲ್ಲಿ  ಸಂಭವಿಸಿದೆ. 

ರೇಣುಕಾ (28) ಮತ್ತು ಆಕೆಯ ಮಕ್ಕಳಾದ ನಿಶಾ (9) ಮತ್ತು ವರ್ಷ (5) ನಾಪತ್ತೆಯಾದವರು. 

ಬೋಂದೆಲ್‌ ಪಚ್ಚನಾಡಿಯ ರಾಜೇಶ್‌ ಅವರ ಪತ್ನಿ ರೇಣುಕಾ ಜ.29ರಂದು ಬೆಳಗ್ಗೆ 9 ಗಂಟೆಗೆ ಮಕ್ಕಳನ್ನು ವಾಮಂಜೂರಿನ ಮಂಗಳಜ್ಯೋತಿ ಶಾಲೆಗೆ ಬಿಟ್ಟು, ಕೆಲಸಕ್ಕೆ ಹೋಗಿ ಬರುತ್ತೇನೆಂದು ಹೇಳಿ ಮನೆಯಿಂದ ಹೊರಟು ಹೋದವರು ವಾಪಸಾಗದೆ ಮಕ್ಕಳ ಜತೆ ಕಾಣೆಯಾಗಿದ್ದಾರೆ.  ರಾಜೇಶ್‌ ಅವರು ಮಂಗಳೂರು ಗ್ರಾಮಾಂತರ  ಠಾಣೆಗೆ ದೂರು ನೀಡಿದ್ದಾರೆ. ರಾಜೇಶ್‌ ಪೈಂಟಿಂಗ್‌ ಕೆಲಸ ಮಾಡುತ್ತಿದ್ದು, ಪತ್ನಿ ರೇಣುಕಾ ಪ್ರಸ್‌ ಒಂದಕ್ಕೆ ಕೆಲಸಕ್ಕೆ ಹೋಗುತ್ತಿದ್ದರು.  ಪತ್ತೆಯಾದಲ್ಲಿ ಮಂಗಳೂರು ಗ್ರಾಮಾಂತರ ಪೊಲೀಸ್‌ ಠಾಣೆಗೆ ಮಾಹಿತಿ ನೀಡಲು ಕೋರಲಾಗಿದೆ.