ಕ್ಷುಲ್ಲಕ ಜಗಳದ ಪರಾಕಾಷ್ಠೆ: ಪತ್ನಿ, ಪುತ್ರನನ್ನು ಇರಿದು ಕೊಂದ ಪತಿ

ಬಂದಾ, ಉತ್ತರ ಪ್ರದೇಶ : ವ್ಯಕ್ತಿಯೋರ್ವ ಕ್ಷುಲ್ಲಕ ಕಾರಣಕ್ಕೆ  ತನ್ನ  23ರ ಹರೆಯದ ಪತ್ನಿ ಮತ್ತು ಎರಡು ವರ್ಷ ಪ್ರಾಯದ ಮಗನನ್ನು ಇರಿದು ಕೊಂದ ಘಟನೆ ಗರ್ಗ್‌ ಪುರ ಗ್ರಾಮದಲ್ಲಿ ನಡೆದಿರುವುದು ವರದಿಯಾಗಿದೆ. 

ಕೊಲೆಗಡುಕ ಪತಿ ರೋಹಿತ್‌ ಯಾವುದೋ ಕ್ಷುಲ್ಲಕ ಕಾರಣಕ್ಕೆ  ಉಂಟಾದ ಮಾತಿನ ಜಗಳದ ಪರಾಕಾಷ್ಠೆಯಲ್ಲಿ  ಪತ್ನಿ ನೀಲಂ ಮತ್ತು ಎರಡು ವರ್ಷದ ಗಂಡು ಮಗುವನ್ನು ಹರಿತವಾದ ಆಯುಧದಿಂದ ಇರಿದು ಕೊಂದ ಎಂದು ಎಎಸ್‌ಪಿ ಎಲ್‌ ಬಿ ಕುಮಾರ್‌ ಪಾಲ್‌ ತಿಳಿಸಿದ್ದಾರೆ.

ಕೊಲೆಗಡುಕ ಪತಿ ರೋಹಿತ್‌ನ ಇರಿತದಿಂದ ತೀವ್ರ ಗಾಯಗೊಂಡ ಇಬ್ಬರನ್ನೂ ಒಡನೆಯೇ ಆಸ್ಪತ್ರೆಗೆ ದಾಖಲಿಸಲಾಯಿತಾದರೂ ಅವರು ಅಲ್ಲಿ ಮೃತಪಟ್ಟರು. ಹತ್ಯೆಗೆ ಬಳಸಲಾದ ಆಯುಧವನ್ನು ಪೊಲೀಸರು ವಶಪಡಿಸಿಕೊಂಡಿದ್ದು ಕೃತ್ಯದ ಬಳಿಕ ತಲೆ ಮರೆಸಿಕೊಂಡಿರುವ ಆರೋಪಿಗಾಗಿ ಶೋಧ ಕಾರ್ಯ ನಡೆಸುತ್ತಿದ್ದಾರೆ.