Advertisement
ಗುರುವಾರದ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್‌ ನಡೆಸಿದ ಬಾಂಗ್ಲಾದೇಶ 49.2 ಓವರ್‌ಗಳಲ್ಲಿ 175 ರನ್ನುಗಳಿಗೆ ಆಲೌಟಾದರೆ, ಇಂಗ್ಲೆಂಡ್‌ 29.3 ಓವರ್‌ಗಳಲ್ಲಿ 3 ವಿಕೆಟಿಗೆ 177 ರನ್‌ ಬಾರಿಸಿ ಸತತ 2ನೇ ಗೆಲುವನ್ನು ಒಲಿಸಿಕೊಂಡಿತು. ನಾಯಕ ಹ್ಯಾರಿ ಬ್ರೂಕ್‌ ಅವರ ಅಜೇಯ ಶತಕ ಇಂಗ್ಲೆಂಡ್‌ ಸರದಿಯ ವಿಶೇಷವಾಗಿತ್ತು. ಆರಂಭಿಕರಿಬ್ಬರು 19 ರನ್‌ ಆಗುವಷ್ಟರಲ್ಲಿ ಪೆವಿಲಿಯನ್‌ ಸೇರಿದ ಬಳಿಕ ಇನ್ನಿಂಗ್ಸ್‌ ಕಟ್ಟತೊಡಗಿದ ಬ್ರೂಕ್‌, 84 ಎಸೆತ ಎದುರಿಸಿ 102 ರನ್‌ ಬಾರಿಸಿದರು. ಈ ಅವಧಿಯಲ್ಲಿ ಸಿಡಿಸಿದ್ದು 13 ಬೌಂಡರಿ ಹಾಗೂ 3 ಸಿಕ್ಸರ್‌. ಇವಾನ್‌ ವುಡ್‌ ಔಟಾಗದೆ 48 ರನ್‌ ಮಾಡಿದರು.
ಲಿಂಕನ್‌: “ಸಿ’ ವಿಭಾಗದ ಮತ್ತೂಂದು ಪಂದ್ಯ ದಲ್ಲಿ ಕೆನಡಾ ತಂಡ ನಮೀಬಿಯಾವನ್ನು 4 ವಿಕೆಟ್‌ಗಳಿಂದ ಸೋಲಿಸಿತು. ಇದು ಕೆನಡಾಕ್ಕೆ ಒಲಿದ ಮೊದಲ ಜಯ. ನಮೀಬಿಯಾ 46 ಓವರ್‌ಗಳಲ್ಲಿ 193 ರನ್ನಿಗೆ ಆಲೌಟಾದರೆ, ಕೆನಡಾ 42 ಓವರ್‌ಗಳಲ್ಲಿ 6 ವಿಕೆಟ್‌ ನಷ್ಟಕ್ಕೆ 197 ರನ್‌ ಬಾರಿಸಿ ವಿಜಯಿಯಾಯಿತು. ಕೆನಡಾ ತನ್ನ ಕೊನೆಯ ಲೀಗ್‌ ಪಂದ್ಯವನ್ನು ಇಂಗ್ಲೆಂಡ್‌ ವಿರುದ್ಧ ಆಡಲಿದ್ದು, ಇದನ್ನು ಭಾರೀ ಅಂತರದಿಂದ ಗೆದ್ದರಷ್ಟೇ ನಾಕೌಟ್‌ ಪ್ರವೇಶಿಸೀತು. ಕಾರಣ, ಕೆನಡಾದ ರನ್‌ರೇಟ್‌ “ಮೈನಸ್‌’ನಲ್ಲಿದೆ (-0.277). ಬಾಂಗ್ಲಾದೇಶ 4 ಅಂಕಗಳೊಂದಿಗೆ 0.438 ರನ್‌ರೇಟ್‌ ಹೊಂದಿದ್ದು, ದ್ವಿತೀಯ ಸ್ಥಾನದಲ್ಲಿದೆ. ಹೀಗಾಗಿ ಮೂರೂ ಲೀಗ್‌ ಸ್ಪರ್ಧೆ ಮುಗಿಸಿರುವ ಬಾಂಗ್ಲಾದೇಶಕ್ಕೆ ನಾಕೌಟ್‌ ಟಿಕೆಟ್‌ ಸಾಧ್ಯತೆ ಹೆಚ್ಚು.