Udupi: ಪುತ್ತಿಗೆ ಕಿರಿಯ ಶ್ರೀಗಳ 34ನೇ ಜನ್ಮನಕ್ಷತ್ರ ಕಾರ್ಯಕ್ರಮ ಸಂಪನ್ನ

ಉಡುಪಿ: ಪರ್ಯಾಯ ಶ್ರೀ ಪುತ್ತಿಗೆ ಮಠದ ಕಿರಿಯ ಶ್ರೀಪಾದರಾದ ಪರಮಪೂಜ್ಯ ಶ್ರೀ ಸುಶ್ರೀಂದ್ರ ತೀರ್ಥ ಶ್ರೀಪಾದರ 34ನೇ ಜನ್ಮನಕ್ಷತ್ರ ಕಾರ್ಯಕ್ರಮ ವಿವಿಧ ಹೋಮ ಹವನಗಳೊಂದಿಗೆ ಸಂಪನ್ನಗೊಂಡಿತು.

ಈ ಸಂದರ್ಭದಲ್ಲಿ ಉಡುಪಿಯ ಕೃಷ್ಣ ದೇವರಿಗೆ ಉಯ್ಯಾಲೆಯಲ್ಲಿ ಕುಳಿತ ಭಂಗಿಯ ಅಲಂಕಾರವನ್ನು ವಿಶೇಷವಾಗಿ ಶ್ರೀಪಾದರು ನಡೆಸಿದ್ದರು .ಅಷ್ಟೇ ಅಲ್ಲದೆ ಶ್ರೀಮಠದ ವಿದ್ವಾಂಸರಾದ ಡಾ. ಶತಾವಧಾನಿ ಉಡುಪಿ ರಾಮನಾಥ ಆಚಾರ್ಯ ಅವರ ಸೇವಾ ರೂಪವಾಗಿ ಪರ್ಯಾಯ ಶ್ರೀಪಾದರ ಮೂಲಕ 51 ಅಕ್ಷರರೂಪಗಳ ಪ್ರತಿನಿಧಿಸುವ ಸುವರ್ಣ ನಾಣ್ಯಗಳ ಅಭಿಷೇಕವನ್ನು ಕಿರಿಯ ಶ್ರೀಪಾದರಿಗೆ ಮಾಡಿಸುವ ಮೂಲಕ ಗುರುಪರಂಪರೆಯ ವಿದ್ಯಾಪರಂಪರೆಯ ಅನುಗ್ರಹದ ಶಕ್ತಿಪಾತವಾಗುವಂತೆ ಭಗವಂತನಲ್ಲಿ ಪ್ರಾರ್ಥಿಸಲಾಯಿತು.

ಪರ್ಯಾಯ ಶ್ರೀಪಾದರು ಕಿರಿಯ ಶ್ರೀಪಾದರ  ಕೃಷ್ಣ ಭಕ್ತಿ, ಅವರು ನಡೆಸುವ ಅಲಂಕಾರ ನೈಪುಣ್ಯ, ಗುರುಭಕ್ತಿ ಇತ್ಯಾದಿಗಳನ್ನು ಮುಕ್ತ ಕಂಠದಿಂದ ಶ್ಲಾಘಿಸಿ ಇವರಿಂದ ಶ್ರೀ ಪುತ್ತಿಗೆಮಠದ ಪರಂಪರೆ ಸಾರ್ಥಕವಾಗಿ ಬೆಳಗಲಿ ಎಂದು ಹರಸಿದರು.

ನೆರೆದಿದ್ದ ವಿದ್ವಾಂಸರು ಹಾಗೂ ಭಕ್ತ ಸಮೂಹ ಶ್ರೀ ಕೃಷ್ಣ ಮುಖ್ಯ ಪ್ರಾಣರ ಅನುಗ್ರಹವನ್ನು ಹಾರೈಸಿದರು.