ಕೋವಿಡ್ 19; ಚೀನಾ, ಇಟಲಿಯನ್ನು ಮೀರಿಸಿದ ಅಮೆರಿಕ; 82 ಸಾವಿರಕ್ಕೂ ಅಧಿಕ ಮಂದಿಗೆ ಸೋಂಕು ದೃಢ

ವಾಷಿಂಗ್ಟನ್: ಜಾಗತಿಕವಾಗಿ ಅತೀ ಹೆಚ್ಚು ಕೋವಿಡ್ 19 ಮಾರಣಾಂತಿಕ ವೈರಸ್ ದೃಢಪಟ್ಟ ರಾಷ್ಟ್ರಗಳ ಪಟ್ಟಿಯಲ್ಲಿ ಅಮೆರಿಕ ಮೊದಲ ಸ್ಥಾನಕ್ಕೇರಿದೆ. ಇದರೊಂದಿಗೆ ಚೀನಾ ಮತ್ತು ಇಟಲಿಯನ್ನು ಹಿಂದಿಕ್ಕಿದೆ. ಡೆಡ್ಲಿ ಕೋವಿಡ್ ವೈರಸ್ ನಿಂದಾಗಿ ಅಮೆರಿಕದ ಜನಜೀವನದ ಮೇಲೆ ಅಪಾರ ಹೊಡೆತ ಬಿದ್ದಿರುವುದಾಗಿ ಯುಎಸ್ ಎ ಟುಡೇ ವರದಿ ಮಾಡಿದೆ.

ಅಮೆರಿಕದ ಜಾನ್ಸ್ ಹಾಪ್ ಕಿನ್ಸ್ ಯೂನಿರ್ವಸಿಟಿ ಡ್ಯಾಶ್ ಬೋರ್ಡ್ ಅಂಕಿ ಅಂಶದ ಪ್ರಕಾರ, ಗುರುವಾರ ರಾತ್ರಿ 6ಗಂಟೆವರೆಗೆ ಅಮೆರಿಕದಲ್ಲಿ ಕೋವಿಡ್ 19 ದೃಢಪಟ್ಟವರ ಸಂಖ್ಯೆ 82,404 ಮಂದಿ! ಇಟಲಿಯಲ್ಲಿ 80,589 ಜನರು ಸೋಂಕು ಪೀಡಿತರಾಗಿದ್ದು, ಚೀನಾದಲ್ಲಿ 81,782 ಮಂದಿಗೆ ಕೋವಿಡ್ 19 ತಗುಲಿತ್ತು. ಅಲ್ಲದೇ ಅಮೆರಿಕದಲ್ಲಿ ಕೋವಿಡ್ 19 ವೈರಸ್ ಗೆ ಸಾವನ್ನಪ್ಪಿದ್ದವರ ಸಂಖ್ಯೆ 1,100.

ಅಮೆರಿಕದಲ್ಲಿ ಸಾವಿರಾರು ಮಂದಿ ಪರೀಕ್ಷೆಗೊಳಗಾಗುತ್ತಿದ್ದಾರೆ. ಅಷ್ಟೇ ಕ್ಷಿಪ್ರವಾಗಿ ಕೋವಿಡ್ 19 ಸೋಂಕು ದೃಢಪಡಿಸುತ್ತಿದ್ದಾರೆ. ಇದರಿಂದಾಗಿ ಅಮೆರಿಕ ಇದೀಗ ಕಂಗಾಲಾಗಿದೆ ಎಂದು ವರದಿ ವಿವರಿಸಿದೆ. ಶಟ್ ಡೌನ್ ನಿಂದಾಗಿ ಅಮೆರಿಕದ ಆರ್ಥಿಕ ಸ್ಥಿತಿ ಕುಸಿಯತೊಡಗಿದೆ.

ಅಮೆರಿಕದಲ್ಲಿನ ರೆಸ್ಟೋರೆಂಟ್ಸ್, ಶಾಪ್, ಸಿನಿಮಾ ಥಿಯೇಟರ್ಸ್ಸ್ ಸೇರಿದಂತೆ ಬಹುತೇಕ ಎಲ್ಲವೂ ಅಮೆರಿಕದಲ್ಲಿ ಸ್ತಬ್ಧವಾಗಿದೆ. ಅಲ್ಲದೇ ಹಲವಾರು ಮಂದಿಯನ್ನು ದೊಡ್ಡ, ದೊಡ್ಡ ಕಂಪನಿಗಳು ಉದ್ಯೋಗಿಗಳನ್ನು ಕೆಲಸದಿಂದ ವಜಾ ಮಾಡತೊಡಗಿದೆ ಎಂದು ವರದಿ ವಿವರಿಸಿದೆ.