ಪುಣೆ: ಸೋಮವಾರದ ಪ್ರೊ ಕಬಡ್ಡಿ ಮುಖಾಮುಖಿಯಲ್ಲಿ ಜೈಪುರ್‌ ಪಿಂಕ್‌ ಪ್ಯಾಂಥರ್ ನ ರೈಡರ್‌ ಅರ್ಜುನ್‌ ದೇಶ್ವಾಲ್‌ ಅಮೋಘ ಪ್ರದರ್ಶನದೊಂದಿಗೆ ಯು ಮುಂಬಾ ಮೇಲೆ ಸವಾರಿ ಮಾಡುವಲ್ಲಿ ಯಶಸ್ವಿಯಾಗಿದ್ದಾರೆ. ಇದರೊಂದಿಗೆ ಜೈಪುರ್‌ 42-39 ಅಂತರದ ಗೆಲುವು ದಾಖಲಿಸಿದೆ.
ಅರ್ಜುನ್‌ 17 ರೈಡ್‌ಗಳಿಂದ ಒಟ್ಟು 15 ಅಂಕ ತಂದು ಕೊಟ್ಟರು. ಇದರಲ್ಲಿ 10 ಟಚ್‌ ಪಾಯಿಂಟ್‌ ಜತೆಗೆ 5 ಬೋನಸ್‌ ಪಾಯಿಂಟ್‌ ಒಳಗೊಂಡಿದೆ. ಇವರನ್ನು ಹೊರತುಪಡಿಸಿದರೆ ಲೆಫ್ಟ್ ಕಾರ್ನರ್‌ ಅಂಕುಶ್‌ 5 ಅಂಕ, ರೈಡರ್‌ ವಿ. ಅಜಿತ್‌ 4 ಅಂಕ ಗಳಿಸಿದರು.
ಮುಂಬಾ ಪರ ರೈಡರ್‌ಗಳಾದ ಆಶಿಷ್‌ ಮತ್ತು ಜೈ ಭಗವಾನ್‌ ಆಟ ಗಮನಾರ್ಹ ಮಟ್ಟದಲ್ಲಿತ್ತು. ಕ್ರಮವಾಗಿ 11 ಹಾಗೂ 6 ಅಂಕ ತಂದಿತ್ತರು.
ಎರಡೂ ತಂಡಗಳು ಸಮಬಲದ ಸಾಧನೆಯೊಂದಿಗೆ ಕಣಕ್ಕಿಳಿದಿದ್ದವು. ಜೈಪುರ್‌ ಹ್ಯಾಟ್ರಿಕ್‌ ಸೋಲಿನ ಬಳಿಕ ಸತತ 2 ಜಯ ಸಾಧಿಸಿದರೆ, ಮುಂಬಾ ಹ್ಯಾಟ್ರಿಕ್‌ ಗೆಲುವಿನ ಅನಂತರ ಸತತ 2 ಪಂದ್ಯಗಳಲ್ಲಿ ಎಡವಿತು.
ಪಾಟ್ನಾ ಸತತ ಗೆಲುವು
ಸಮಬಲರ ಮತ್ತೊಂದು ಮೇಲಾಟದಲ್ಲಿ ಪಾಟ್ನಾ ಪೈರೇಟ್ಸ್‌ 41-32 ಅಂಕಗಳಿಂದ ಹರ್ಯಾಣ ಸ್ಟೀಲರ್ಗೆ ಸೋಲುಣಿಸಿತು. ಇದು ಪಾಟ್ನಾದ ಸತತ 4ನೇ ಹಾಗೂ ಒಟ್ಟಾರೆ 5ನೇ ಗೆಲುವು. ಹರ್ಯಾಣ 11 ಪಂದ್ಯಗಳಲ್ಲಿ 5ನೇ ಸೋಲನುಭವಿಸಿತು.
