ಒಂದೇ ದಿನ ಎರಡೂವರೆ ಲಕ್ಷ ಹಿಟ್ಸ್‌!

ಯೋಗರಾಜ್‌ ಭಟ್‌ ನಿರ್ದೇಶನದ, ಗಣೇಶ್‌ ಅಭಿನಯದ “ಮುಗುಳು ನಗೆ’ ಚಿತ್ರವು ಸೆಪ್ಟೆಂಬರ್‌ ಒಂದರಂದು ಬಿಡುಗಡೆಯಾಗಲಿದೆ. ಅದಕ್ಕೂ ಮುನ್ನ ಚಿತ್ರದ ಟ್ರೈಲರ್‌ ಬಿಡುಗಡೆಯಾಗಿದ್ದು, ಒಂದೇ ದಿನದಲ್ಲಿ ಎರಡೂವರೆ ಲಕ್ಷ ಹಿಟ್‌ ಬೀಳುವ ಮೂಲಕ ಹೊಸ ದಾಖಲೆ ಮಾಡಿದೆ.

“ಮುಗುಳು ನಗೆ’ಯ ಟ್ರೇಲರ್‌ ಬಿಡುಗಡೆಯಾಗಿದ್ದು, ಭಾನುವಾರ ರಾತ್ರಿ ಏಳಕ್ಕೆ. ಅದಾಗಿ ಒಂದು ದಿನದ ನಂತರ, ಅಂದರೆ ಸೋಮವಾರ ರಾತ್ರಿ ಏಳರ ಹೊತ್ತಿಗೆ ಯೂಟ್ಯೂಬ್‌ನಲ್ಲಿ ಸುಮಾರು ಎರಡೂವರೆ ಲಕ್ಷ ಹಿಟ್ಸ್‌ ಕಂಡಿದೆ. ಇನ್ನು ಚಿತ್ರದ ಒಂದು ಹಾಡು ಬಿಡುಗಡೆಯಾಗಿದ್ದು, ಅದಕ್ಕೂ ಒಳ್ಳೆಯ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ.

“ಮುಗುಳು ನಗೆ’ ಚಿತ್ರದ ಮೂಲಕ ಗಣೇಶ್‌ ಮತ್ತು ಯೋಗರಾಜ್‌ ಭಟ್‌, ಸುಮಾರು 10 ವರ್ಷಗಳ ನಂತರ ಒಟ್ಟಿಗೆ ಕೆಲಸ ಮಾಡಿದ್ದಾರೆ. ಇನ್ನು ಈ ಚಿತ್ರದಲ್ಲಿ ಗಣೇಶ್‌ ಎದುರು ಆಶಿಕಾ, ಅಪೂರ್ವ ಅರೋರಾ, ನಿಖೀತಾ ನಾರಾಯಣ್‌ ಮತ್ತು ಅಮೂಲ್ಯ ನಾಯಕಿಯರಾಗಿ ನಟಿಸುತ್ತಿದ್ದಾರೆ.

ನಿರ್ದೇಶನದ ಜೊತೆಗೆ ಯೋಗರಾಜ್‌ ಭಟ್‌ ಕಥೆ, ಚಿತ್ರಕಥೆ, ಸಂಭಾಷಣೆ ಮತ್ತು ಸಾಹಿತ್ಯವನ್ನೂ ಬರೆದಿದ್ದು, ವಿ. ಹರಿಕೃಷ್ಣ ಸಂಗೀತ ಸಂಯೋಜಿಸಿದ್ದಾರೆ. ಇನ್ನು ಚಿತ್ರವನ್ನು ಸೈತದ್‌ ಸಲಾಂ ನಿರ್ಮಿಸಿದ್ದು, ಮೈಸೂರ್‌ ಟಾಕೀಸ್‌ ಮೂಲಕ ಜಾಕ್‌ ಮಂಜು ಚಿತ್ರವನ್ನು ಬಿಡುಗಡೆ ಮಾಡುತ್ತಿದ್ದಾರೆ.