ಚೌತಿ ಹಬ್ಬಕ್ಕೆ ಖಾಸಗಿ ಬಸ್‌ನಲ್ಲಿ ಊರಿಗೆ ಬರಲು ಮೂರುಪಟ್ಟು ದರ ಹೆಚ್ಚಳ !

ಮಂಗಳೂರು: ಇನ್ನೇನು ಒಂದು ತಿಂಗಳಿನಲ್ಲಿ ಗಣೇಶ ಚತುರ್ಥಿ ಹಬ್ಬ ಬರುತ್ತಿದ್ದು, ದೂರದ ಊರಿನಲ್ಲಿರುವ ಮಂದಿ ಹಬ್ಬಕ್ಕೆಂದು ತಮ್ಮ ಮನೆಗಳಿಗೆ ಆಗಮಿಸುವುದು ಸಾಮಾನ್ಯ. ಇದನ್ನೇ ಗುರಿಯಾಗಿರಿಸಿ ಖಾಸಗಿ ಬಸ್‌ ಮಾಲಕರು ಬಸ್‌ ಪ್ರಯಾಣ ದರವನ್ನು ಒಂದು ತಿಂಗಳ ಮುಂಚಿತವಾಗಿಯೇ ದುಪ್ಪಟ್ಟು ಏರಿಕೆ ಮಾಡಿದ್ದಾರೆ. ಮುಂದಿನ ದಿನಗಳಲ್ಲಿ ಮತ್ತಷ್ಟು ಏರಿಕೆಯಾಗುವ ಸಾಧ್ಯತೆಗಳಿವೆ.

ಸಾಮಾನ್ಯ ದಿನಗಳಲ್ಲಿ ಖಾಸಗಿ ಬಸ್‌ಗಳಲ್ಲಿ ಬೆಂಗಳೂರಿನಿಂದ ಮಂಗಳೂರಿಗೆ ಸುಮಾರು 700 ರೂ. ಇದೆ. ಆದರೆ ಆನ್‌ಲೈನ್‌ ಮೂಲಕ ಗಣೇಶ ಹಬ್ಬದ ಎರಡು ದಿನ ಹಿಂದೆ ಅಂದರೆ ಶುಕ್ರವಾರ (ಆ. 30) ಬೆಂಗಳೂರಿನಿಂದ ಮಂಗಳೂರಿಗೆ ಬರಲು 1,800 ರೂ. ಗರಿಷ್ಠ ದರ ನೀಡಬೇಕಾಗಿದೆ. ಈ ಬಾರಿ ಚತುರ್ಥಿ ಹಬ್ಬ ಸೆ. 2ರಂದು ಸೋಮವಾರ ಬಂದಿದ್ದು, ರವಿವಾರ ಖಾಸಗಿ ಮತ್ತು ಸರಕಾರಿ ಕಚೇರಿಗಳಿಗೆ ರಜೆ ಇರುತ್ತದೆ. ಆದ್ದರಿಂದ ಹೆಚ್ಚಿನವರು ಶುಕ್ರವಾರವೇ ಪ್ರಯಾಣಿಸುತ್ತಾರೆ.

ಖಾಸಗಿ ಬಸ್‌ಗಳಲ್ಲಿ ಗಣೇಶ ಹಬ್ಬದ ಸಂದರ್ಭ (ಆ. 30 ಗರಿಷ್ಠ ದರ) ರೂಟ್‌ ಟಿಕೆಟ್‌ ದರ
ಬೆಂಗಳೂರು-ಮಂಗಳೂರು 1,800
ಮಂಗಳೂರು-ಮೈಸೂರು 900
ಮಂಗಳೂರು ಹುಬ್ಬಳ್ಳಿ 1,500
ಮಂಗಳೂರು-ಕೊಪ್ಪಳ 710

‌ಗಣೇಶ ಚತುರ್ಥಿ ವೇಳೆ ಕೆಎಸ್ಸಾರ್ಟಿಸಿ ಬಸ್‌ ದರದಲ್ಲಿ ಯಾವುದೇ ಬದಲಾವಣೆಯಾಗಿಲ್ಲ. ವಿಶೇಷ ದರ ಪಟ್ಟಿಯೂ ಜಾರಿಯಾಗಿಲ್ಲ.
-ಅಶ್ರಫ್‌ ಕೆ.ಎಂ., ಕೆಎಸ್ಸಾರ್ಟಿಸಿ ಮಂಗಳೂರು, ವಿ.ಭಾಗ ನಿಯಂತ್ರಣಾಧಿಕಾರಿ