‘ಔನ್ನತ್ಯದೊಂದಿಗೆ ನಿನ್ನ ಆಗಸ ಚುಂಬನ – Happy Landing’: Rafaleಗೆ INS ಕೊಲ್ಕತಾ ಸಂದೇಶ

ಹೊಸದಿಲ್ಲಿ: ಭಾರತೀಯ ವಾಯುಸೇನೆಗೆ ಅಮಿತ ಬಲವನ್ನು ತುಂಬಲು ಫ್ರಾನ್ಸ್ ನಿಂದ ಆಗಮಿಸುತ್ತಿರುವ ಐದು ರಫೇಲ್ ಫೈಟರ್ ಜೆಟ್ ಗಳು ಭಾರತದ ಸಾಗರ ವಲಯವನ್ನು ಪ್ರವೇಶಿಸಿವೆ.

ಫ್ರಾನ್ಸ್ ನಿಂದ ಯು.ಎ.ಇ.ಗೆ ಬಂದು ಅಲ್ಲಿಂದ ಹರ್ಯಾಣದ ಅಂಬಾಲ ವಾಯುನೆಲಗೆ ಸಾಗುವ ಹಾದಿಯಲ್ಲಿರುವ ಈ ಯುದ್ಧ ವಿಮಾನಗಳು ಅರಬ್ಬೀ ಸಮುದ್ರದ ಮೂಲಕ ಭಾರತದ ವ್ಯಾಪ್ತಿ ವಲಯವನ್ನು ಪ್ರವೇಶಿಸುತ್ತಿದ್ದಂತೆ ಇಲ್ಲಿ ನಿಯೋಜಿತ ಗಸ್ತು ನೌಕೆ ಐ.ಎನ್.ಎಸ್. ಕೊಲ್ಕತಾ ‘ರಫೇಲ್’ ಜೆಟ್ ಗಳನ್ನು ಹಾರ್ಧಿಕವಾಗಿ ಬರಮಾಡಿಕೊಳ್ಳುವ ರೆಡಿಯೋ ಸಂದೇಶವನ್ನು ಕಳುಹಿಸಿದೆ.

‘ನಿನ್ನ ಔನ್ನತ್ಯದೊಂದಿಗೆ ಆಗಸವನ್ನು ಸ್ಪರ್ಶಿಸು – ಹ್ಯಾಪಿ ಲ್ಯಾಂಡಿಂಗ್’ ಎಂಬ ರೆಡಿಯೋ ಸಂದೇಶ ಐ.ಎನ್.ಎಸ್. ಕೊಲ್ಕತಾ ಸಮರ ನೌಕೆಯಿಂದ 5 ರಫೇಲ್ ಜೆಟ್ ಗಳಿಗೆ ಸಂವಹನಗೊಂಡಿದೆ.

ಇದಕ್ಕೆ ಪ್ರತಿಯಾಗಿ ರಫೇಲ್ ಜೆಟ್ ಗಳ ಕಪ್ತಾನ ‘ವಿಶ್ ಯು ಫೇರ್ ವಿಂಡ್ಸ್. ಹ್ಯಾಪಿ ಹಂಟಿಂಗ್. ಓವರ್ ಆಂಡ್ ಔಟ್’ ಎಂದು ಪ್ರತಿ ಸಂದೇಶವನ್ನು ರವಾನಿಸಿದ್ದಾರೆ.

ಎರಡು ಸುಖೋಯ್ SU-30 MKI ಯುದ್ಧ ವಿಮಾನಗಳ ಎಸ್ಕಾರ್ಟ್ ನೊಂದಿಗೆ 5 ರಫೇಲ್ ಜೆಟ್ ಗಳು ಭಾರತೀಯ ಆಗಸದಲ್ಲಿ ಹಕ್ಕಿಗಳಂತೆ ಹಾರಿ ಬರುತ್ತಿರುವ ಸುಂದರ ವಿಡಿಯೋ ಒಂದನ್ನು ರಕ್ಷಣಾ ಸಚಿವರ ಸಚಿವಾಲಯದ ಟ್ವಿಟ್ಟರ್ ಅಕೌಂಟ್ ನಲ್ಲಿ ಪೋಸ್ಟ್ ಮಾಡಲಾಗಿದೆ.

ಈ ಐದು ರಫೇಲ್ ಫೈಟರ್ ಜೆಟ್ ಗಳು ಅಂಬಾಲದಲ್ಲಿರುವ ವಾಯುನೆಲೆಯಲ್ಲಿ ಐ.ಎ.ಎಫ್.ನ 17ನೇ ಸ್ಕ್ಯಾಡ್ರನ್ ಗೆ ‘ಚಿನ್ನದ ಬಾಣಗಳಾಗಿ’ ಸೇರ್ಪಡೆಗೊಳ್ಳಲಿವೆ.