ಫ್ಲಾಟ್‌ ಮಾರಾಟಕ್ಕೆ ಜಿಎಸ್‌ಟಿ ಇಲ್ಲ

ನವದೆಹಲಿ: ಮಾರಾಟದ ವೇಳೆ ಪೂರ್ಣತೆ ಪ್ರಮಾಣ ಪತ್ರ ಪಡೆದ ರಿಯಲ್‌ ಎಸ್ಟೇಟ್‌ ಸ್ವತ್ತಿನ ಮೇಲೆ ಜಿಎಸ್‌ಟಿ ವಿಧಿಸಲಾಗುವುದಿಲ್ಲ ಎಂದು ಹಣಕಾಸು ಸಚಿವಾಲಯ ಶನಿವಾರ ಸ್ಪಷ್ಟ ಪಡಿಸಿದೆ. ಆದರೆ ನಿರ್ಮಾಣ ಹಂತದಲ್ಲಿರುವ ಸ್ವತ್ತು ಅಥವಾ ಪೂರ್ಣತೆ ಪ್ರಮಾಣಪತ್ರ ಪಡೆಯದ ಫ್ಲಾಟ್‌ಗಳಿಗೆ ಜಿಎಸ್‌ಟಿ ವಿಧಿಸಲಾಗುತ್ತದೆ. ಹೀಗಾಗಿ ಪೂರ್ಣಗೊಂಡ ನಂತರ ಮಾರಾಟ ಮಾಡುವಾಗ ಫ್ಲಾಟ್‌ ದರವನ್ನು ಇಳಿಸ ಬೇಕು ಎಂದು ಸಚಿವಾಲಯ ಸೂಚನೆ ನೀಡಿದೆ.

ಇನ್ನೊಂದೆಡೆ ಜವಾಹರ ಲಾಲ್‌ ನೆಹರು ರಾಷ್ಟ್ರೀಯ ನಗರ ನವೀಕರಣ ಮಿಷನ್‌, ರಾಜೀವ್‌ ಆವಾಸ ಯೋಜನೆ, ಪ್ರಧಾನ ಮಂತ್ರಿ ಆವಾಸ ಯೋಜನೆ ಹಾಗೂ ಇತರೆ ಯೋಜನೆ ಅಡಿ ಮನೆ ನಿರ್ಮಾಣಕ್ಕೆ ಶೇ.18ರ ಜಿಎಸ್‌ಟಿ ವಿಧಿಸಲಾಗುತ್ತದೆ. ಇದನ್ನು ಬಿಲ್ಡರ್‌ಗಳು ಇನ್‌ಪುಟ್‌ ಟ್ಯಾಕ್ಸ್‌ ಕ್ರೆಡಿಟ್‌ ಮೂಲಕ ಹೊಂದಿ ಸಿಕೊಳ್ಳಬಹುದಾಗಿದೆ. ಹೀಗಾಗಿ ಇಂತಹ ಯೋಜನೆ ಗಳಲ್ಲಿ ಗ್ರಾಹಕರಿಗೆ ಜಿಎಸ್‌ಟಿ ವಿಧಿಸುವ ಅಗತ್ಯವಿರುವುದಿಲ್ಲ. 

ಮಾ.31ರ ವರೆಗೆ ಅವಕಾಶ: ವಾರ್ಷಿಕ ಜಿಎಸ್‌ಟಿ ರಿಟರ್ನ್ಸ್ ಸಲ್ಲಿಕೆ ಮಾಡಲು 2019ರ ಮಾರ್ಚ್‌ 31ರ ವರೆಗೆ ಕಾಲಾವ ಕಾಶ ವನ್ನು ವಿತ್ತ ಸಚಿವಾಲಯ ಒದಗಿಸಿದೆ.