ಸೋದರನ ಅಂತ್ಯಕ್ರಿಯೆಯಲ್ಲಿ ರೌಡಿಶೀಟರ್‌ ನಾಗ ಭಾಗಿ

ಬೆಂಗಳೂರು: ಸಹೋದರನ ಅಂತ್ಯಕ್ರಿಯೆಯಲ್ಲಿ ಪಾಲ್ಗೊಳ್ಳುವ ಸಲುವಾಗಿ ರೌಡಿಶೀಟರ್‌ ನಾಗರಾಜನನ್ನು ಶನಿವಾರ ಭದ್ರತೆಯಲ್ಲಿ ಕರೆತರಲಾಗಿತ್ತು. ಶ್ರೀರಾಂಪುರದ ರುದ್ರಭೂಮಿಗೆ ನಾಗನನ್ನು ಕರೆತಂದಾಗ ಆತನ ಬೆಂಬಲಿಗರು ಸುತ್ತುವರೆದಿದ್ದರಿಂದ ಪೊಲೀಸರು ಲಘು ಲಾಠಿ ಪ್ರಹಾರ ನಡೆಸಿ ಚದುರಿಸಿದರು.

ನಾಗನ ಸಹೋದರ ವಿ.ಧರ್ಮ ಸಾವನ್ನಪ್ಪಿದ್ದು, ಈತನ ಅಂತ್ಯಕ್ರಿಯೆಯಲ್ಲಿ ಪಾಲ್ಗೊಳ್ಳಲು ಅನುಮತಿ ನೀಡುವಂತೆ ಸೆಷನ್‌ ಕೋರ್ಟ್‌ ಅನುಮತಿ ನೀಡಿತ್ತು. ಈ ಹಿನ್ನೆಲೆಯಲ್ಲಿ ವಿಚಾರಣೆ ನಡೆಸಿದ ನ್ಯಾಯಾಲಯ ಬಿಗಿ ಭದ್ರತೆಯಲ್ಲಿ ಕರೆದೊಯ್ಯುವಂತೆ ಸೂಚಿಸಿತ್ತು.

ಹಾಗಾಗಿ ಪರಪ್ಪನ ಅಗ್ರಹಾರ ಜೈಲಿನಿಂದ ನಾಗನನ್ನು ಪೊಲೀಸರು, ಶ್ರೀರಾಮಪುರದ ನಾಗನ ಮನೆಗೆ ಕರೆತಂದರು. ಕಾನೂನು ಸುವ್ಯವಸ್ಥೆ ಕಾಪಾಡಲು ಶ್ರೀರಾಮಪುರ ಪೊಲೀಸರು ಕೆಎಸ್‌ಆರ್‌ಪಿ ಒಂದು ತುಕಡಿಯನ್ನು ನಿಯೋಜಿಸಿದ್ದರು.