ಹಣಕಾಸಿನ ವಿಚಾರವಾಗಿ ಸ್ನೇಹಿತನ ಕೊಲೆ

ಬೆಂಗಳೂರು: ಹಣಕಾಸಿನ ವಿಚಾರವಾಗಿ ಇಬ್ಬರ ನಡುವೆ ನಡೆದ ಜಗಳ ಕೊಲೆಯಲ್ಲಿ ಅಂತ್ಯವಾದ ಘಟನೆ ಕೆ.ಆರ್‌.ಮಾರುಕಟ್ಟೆ ಪೊಲೀಸ್‌ ಠಾಣೆ ವ್ಯಾಪ್ತಿಯ ಸೀಗೆಬೇಲಿ ರಸ್ತೆಯಲ್ಲಿ ನಡೆದಿದೆ. ಅಸ್ಸಾಂ ಮೂಲದ ಮೊಹಮ್ಮದ್‌ ನಜ್ಮುಲ್‌ (21) ಕೊಲೆಯಾದ ವ್ಯಕ್ತಿ. ಹತ್ಯೆ ಮಾಡಿದ ಆರೋಪಿ ಮಣಿಪುರದ ಜುಮಖಾನ್‌ (22) ತಲೆಮರೆಸಿಕೊಂಡಿದ್ದು, ಆತನಿಗಾಗಿ ಹುಡುಕಾಟ ನಡೆಯುತ್ತಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಆರೋಪಿ ಜುಮಖಾನ್‌ ಚಿಕನ್‌ ಅಂಗಡಿಯಲ್ಲಿ ಮತ್ತು ನಜ್ಮುಲ್‌ ಶಿವಾಜಿನಗರದ ಲಸ್ಸಿ ಜ್ಯೂಸ್‌ ಸೆಂಟರ್‌ನಲ್ಲಿ ಕೆಲಸ ಮಾಡುತ್ತಿದ್ದರು. ಸೀಗೆಬೇಲಿಯಲ್ಲಿರುವ ಪೌಲಿ ಸೆಂಟರ್‌ನಲ್ಲಿ ಇವರ ಸ್ನೇಹಿತ ಉತ್ತರ ಭಾರತ ಮೂಲದ ಮಾಮುಯ್‌ ಎಂಬಾತ ಕೆಲಸ ಮಾಡುತ್ತಿದ್ದು, ಪಕ್ಕದ ಲಾಡ್ಜ್ನಲ್ಲೇ ವಾಸಿಸುತ್ತಿದ್ದ. ಹೀಗಾಗಿ ಜುಮಖಾನ್‌ ಹಾಗೂ ನಜ್ಮುಲ್‌ ಆಗಾಗೆ ಮಾಮುಯ್‌ ತಂಗಿದ್ದ ಲಾಡ್ಜ್ಗೆ ಬರುತ್ತಿದ್ದರು. 

ಸೋಮವಾರ ರಾತ್ರಿ 9 ಗಂಟೆ ಸುಮಾರಿಗೆ ಮೊಹಮ್ಮದ್‌ ನಜ್ಮುಲ್‌ ಮತ್ತು ಜಮಖಾನ್‌ ಒಟ್ಟಿಗೆ ಮಾಮುಯ್‌ ತಂಗಿದ್ದ ಲಾಡ್ಜ್ಗೆ ಬಂದಿದ್ದು, ಮೂವರೂ ಸೇರಿ ಮದ್ಯ ಸೇವಿಸಿದ್ದಾರೆ. ಮದ್ಯದ ಅಮಲಿನಲ್ಲಿ ಹಣಕಾಸಿನ ವಿಚಾರವಾಗಿ ನಜ್ಮುಲ್‌ ಹಾಗೂ ಜುಮಖಾನ್‌ ನಡುವೆ ಜಗಳವಾಗಿದ್ದು, ವಿಕೋಪಕ್ಕೆ ಹೋದಾಗ ಜುಮಖಾನ್‌ ತನ್ನ ಬಳಿಯಿದ್ದ ಚಾಕುವಿನಿಂದ ನಜ್ಮುಲ್‌ ಹೊಟ್ಟೆ ಭಾಗಕ್ಕೆ ಇರಿದು ಓಡಿ ಹೋಗಿದ್ದಾನೆ. ಕೂಡಲೇ ಸ್ಥಳೀಯರು ನಜ್ಮುಲ್‌ನನ್ನು ಆಸ್ಪತ್ರೆಗೆ ಕರೆದೊಯ್ದರಾದರೂ ಚಿಕಿತ್ಸೆ ಫ‌ಲಕಾರಿಯಾಗದೆ ಸಾವನ್ನಪ್ಪಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.