ಹತ್ತೇ ದಿನದಲ್ಲಿ ಸೇತುವೆ ನಿರ್ಮಾಣ

ವಿಶ್ವಸಂಸ್ಥೆ: ಕಳೆದ ವರ್ಷದ ಜೂನ್‌ ತಿಂಗಳಲ್ಲಿ ನಡೆದ ಮೇಘ ಸ್ಫೋಟದಿಂದಾಗಿ ಈ ಗ್ರಾಮವನ್ನು ನಗರಕ್ಕೆ ಸಂಪರ್ಕಿಸಲು ಇದ್ದ ಏಕೈಕ ಸೇತುವೆ ಕೊಚ್ಚಿ ಹೋಗಿತ್ತು. ಅಂದಿನಿಂದ ಗ್ರಾಮಸ್ಥರ ಜೀವನವೇ ದುರ್ಬರವಾಗಿತ್ತು. ಆವಶ್ಯಕ ವಸ್ತುಗಳನ್ನು ತರಬೇಕಿದ್ದರೂ ಪ್ರಾಣದ ಹಂಗು ತೊರೆದು, ಕುತ್ತಿಗೆಯವರೆಗಿನ ನೀರಲ್ಲಿ ಮುಳುಗಿಕೊಂಡು ನದಿ ದಾಟಿ ಪಟ್ಟಣ ತಲುಪಬೇಕಿತ್ತು. ಇವರ ಈ ಸಮಸ್ಯೆಯನ್ನು ಇದೀಗ ಭಾರ,ತೀಯ ಶಾಂತಿದೂತರು ಪರಿಹರಿಸಿದ್ದಾರೆ.

ಹೌದು. ದಕ್ಷಿಣ ಸುಡಾನ್‌ನ ಅಕೋಕಾ ಗ್ರಾಮದಲ್ಲಿ ಕೊಚ್ಚಿಹೋಗಿದ್ದ ಸೇತುವೆಯನ್ನು ವಿಶ್ವಸಂಸ್ಥೆಯ ಮಿಷನ್‌ನಲ್ಲಿರುವ ಭಾರತೀಯ ಶಾಂತಿಸಂದೇಶವಾಹಕರು ಮರು ನಿರ್ಮಾಣ ಮಾಡಿದ್ದಾರೆ. ಅದೂ ಕೇವಲ 10 ದಿನಗಳಲ್ಲಿ. ಭಾರತೀಯರ ಈ ಕಾರ್ಯ ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿದೆ. ಸರಕಾರದ ನೆರವಿನೊಂದಿಗೆ ಶಾಂತಿದೂತರು ಸಮರೋಪಾದಿಯಲ್ಲಿ ಕೆಲಸ ನಿರ್ವಹಿಸಿ ಸೇತುವೆ ನಿರ್ಮಿಸಿದ್ದಾರೆ. ಹೀಗಾಗಿ ಆ ಪ್ರದೇಶಕ್ಕೆ ಸಂಪರ್ಕ ಸಾಧಿಸಲು ಸಾಧ್ಯವಾಗಿದ್ದು, ಭದ್ರತಾ ಗಸ್ತು, ಮಾನವೀಯ ನೆರವು, ಆಹಾರ ವಸ್ತುಗಳ ಪೂರೈಕೆ ಎಲ್ಲವೂ ಸುಲಭವಾಗಿದೆ ಎಂದು ವಿಶ್ವಸಂಸ್ಥೆ ಹೇಳಿದೆ.