ಟೀಮ್‌ ಇಂಡಿಯಾದ ಲಂಕಾ ಕ್ರಿಕೆಟ್‌ ಪ್ರವಾಸ ರದ್ದು

ಹೊಸದಿಲ್ಲಿ: ಈ ತಿಂಗಳ ಕೊನೆಯಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್‌ ಸರಣಿಯನ್ನು ಪುನರಾರಂಭಿಸುವ ಭಾರತದ ನಿರೀಕ್ಷೆ ಹುಸಿಯಾಗಿದೆ. ಟೀಮ್‌ ಇಂಡಿಯಾದ ಶ್ರೀಲಂಕಾ ಪ್ರವಾಸ ರದ್ದುಗೊಂಡಿದೆ. ಇನ್ನೂ ಕೋವಿಡ್ -19 ನಿಯಂತ್ರಣಕ್ಕೆ ಬಾರದ ಕಾರಣ ಎರಡೂ ದೇಶಗಳ ಕ್ರಿಕೆಟ್‌ ಮಂಡಳಿಗಳು ಸೇರಿ ಈ ನಿರ್ಧಾರಕ್ಕೆ ಬಂದವು.

ಜೂನ್‌ ಅಂತ್ಯದಿಂದ ಜುಲೈ ಆರಂಭದ ಅವಧಿಯಲ್ಲಿ ನಡೆಯಲಿದ್ದ ಈ ಸರಣಿ ವೇಳೆ ಭಾರತ-ಶ್ರೀಲಂಕಾ ತಂಡಗಳು 3 ಏಕದಿನ ಹಾಗೂ 3 ಟಿ20 ಪಂದ್ಯಗಳನ್ನು ಆಡುವ ಕಾರ್ಯಕ್ರಮವಿತ್ತು. ಆದರೆ ಇದರ ವೇಳಾಪಟ್ಟಿ ಇನ್ನೂ ಪ್ರಕಟಗೊಂಡಿರಲಿಲ್ಲ.

“ಈಗಿನ ಪರಿಸ್ಥಿತಿಯಲ್ಲಿ ಜುಲೈಯಲ್ಲಿ ಶ್ರೀಲಂಕಾ ಪ್ರವಾಸ ಸಾಧ್ಯವಿಲ್ಲ’ ಎಂದು ಬಿಸಿಸಿಐ ಹೇಳಿದೆ. ಶ್ರೀಲಂಕಾ ಕ್ರಿಕೆಟ್‌ ಮಂಡಳಿ ಕೂಡ ಇದನ್ನು ದೃಢಪಡಿಸಿದೆ.

ಆದರೆ ಈ ಪ್ರವಾಸ ಅಸಾಧ್ಯ ಎಂದು ಈ ಮೊದಲೇ ತಿಳಿದು ಬಂದಿತ್ತು. ದೇಶದಲ್ಲಿ ಕೋವಿಡ್ -19 ವ್ಯಾಪಿಸುತ್ತಲೇ ಇರುವುದರಿಂದ ಭಾರತ ತಂಡದ ಆಟಗಾರರ ಅಭ್ಯಾಸ ಇನ್ನೂ ಆರಂಭಗೊಂಡಿರಲಿಲ್ಲ.