ಕೊಲಂಬೊ: ಶ್ರೀಲಂಕಾ ವಿರುದ್ಧ ಏಕದಿನ ಸರಣಿಯನ್ನು ಕಳೆದುಕೊಂಡಿದ್ದ ಪ್ರವಾಸಿ ನ್ಯೂಜಿಲ್ಯಾಂಡ್‌ ವನಿತೆಯರು ಟಿ20 ಸರಣಿ ಗೆಲ್ಲುವ ಮೂಲಕ ಸೇಡು ತೀರಿಸಿಕೊಂಡಿದ್ದಾರೆ.
ಸೋಮವಾರ ಕೊಲಂಬೊದ “ಪಿ. ಸಾರಾ ಓವಲ್‌’ನಲ್ಲಿ ನಡೆದ 2ನೇ ಟಿ20 ಪಂದ್ಯವನ್ನು ನ್ಯೂಜಿಲ್ಯಾಂಡ್‌ 8 ವಿಕೆಟ್‌ಗಳಿಂದ ಭರ್ಜರಿಯಾಗಿ ಗೆದ್ದು ಸರಣಿ ವಶಪಡಿಸಿಕೊಂಡಿತು. ಮೊದಲ ಪಂದ್ಯವನ್ನು ಕಿವೀಸ್‌ 5 ವಿಕೆಟ್‌ಗಳಿಂದ ಜಯಿಸಿತ್ತು. ಕೊನೆಯ ಪಂದ್ಯ ಬುಧವಾರ ನಡೆಯಲಿದೆ.
ಮೊದಲು ಬ್ಯಾಟಿಂಗ್‌ ನಡೆಸಿದ ಶ್ರೀಲಂಕಾ 6 ವಿಕೆಟ್‌ ನಷ್ಟಕ್ಕೆ ಕೇವಲ 118 ರನ್‌ ಗಳಿಸಿತು. ನ್ಯೂಜಿಲ್ಯಾಂಡ್‌ 18.4 ಓವರ್‌ಗಳಲ್ಲಿ 2 ವಿಕೆಟಿಗೆ 119 ರನ್‌ ಬಾರಿಸಿ ಗೆದ್ದು ಬಂದಿತು.
ಮಧ್ಯಮ ವೇಗಿ ಲೀ ಟಹುಹು ಲಂಕೆಗೆ ಭರ್ಜರಿ ಕಡಿವಾಣ ಹಾಕಿದರು. 21 ರನ್ನಿತ್ತು 4 ವಿಕೆಟ್‌ ಕೆಡವಿದರು. 2 ವಿಕೆಟ್‌ಗಳನ್ನು ತಮ್ಮ ಮೊದಲ ಓವರ್‌ನಲ್ಲೇ ಉಡಾಯಿಸಿದರು. ಲಂಕೆಯ 3 ವಿಕೆಟ್‌ 14 ರನ್‌ ಆಗುವಷ್ಟರಲ್ಲಿ ಉರುಳಿತು. ಹಾಸಿನಿ ಪರೆರ, ಹರ್ಷಿತಾ ಮಾಧವಿ ಮತ್ತು ನೀಲಾಕ್ಷಿ ಡಿ ಸಿಲ್ವ ಪ್ರಯತ್ನದಿಂದ ಮೊತ್ತ ನೂರರ ಗಡಿ ದಾಟಿತು. ಹಾಸಿನಿ ಸರ್ವಾಧಿಕ 33 ರನ್‌ ಹೊಡೆದರು. ಮಾಧವಿ 23 ಮತ್ತು ನೀಲಾಕ್ಷಿ 22 ರನ್‌ ಮಾಡಿದರು.ನ್ಯೂಜಿಲ್ಯಾಂಡ್‌ ಚೇಸಿಂಗ್‌ ವೇಳೆ ಓಪನರ್‌ ಸುಝೀ ಬೇಟ್ಸ್‌ ಆರ್ಧ ಶತಕದೊಂದಿಗೆ ಮಿಂಚಿದರು (52).
