ಭೂಗರ್ಭದಲ್ಲಿ 3 ದಿನ ಧ್ಯಾನಸ್ಥರಾಗಿದ್ದ ಸ್ವಾಮೀಜಿ!

ಸೇಡಂ(ಕಲಬುರಗಿ): ಲೋಕ ಕಲ್ಯಾಣಕ್ಕಾಗಿ ಸತತ ಮೂರು ದಿನಗಳ ಕಾಲ ಭೂಗರ್ಭ ಪ್ರವೇಶಿಸಿದ್ದ ಊಡಗಿ ರಸ್ತೆಯಲ್ಲಿನ ವಿಶ್ವಲಿಂಗ ವಿಷ್ಣು ಆಶ್ರಮದ ಶ್ರೀಮಂತ ತಾತನವರು ಶನಿವಾರ ಹೊರ ಬಂದರು. ಜ.23ರಂದು ತಾಲೂಕಿನ ಕಲಕಂಭ ಗ್ರಾಮದ ಗ್ರಾಮ ದೇವತೆ ದೇವಾಲಯದ ಬಳಿ ಗುಂಡಿ ತೋಡಿ ಜ.26ರವರೆಗೆ ಮೂರು ದಿನಗಳ ಕಾಲ ಅನ್ನ, ನೀರು, ಗಾಳಿ ತ್ಯಜಿಸಿ ಶ್ರೀಗಳು ಅನುಷ್ಠಾನ ಕೈಗೊಂಡಿದ್ದರು.

ಮೊದಲ ದಿನ ಭೂಗರ್ಭ ಪ್ರವೇಶಿಸಿದಾಗ ಕಲ್ಲು ಬಂಡೆ ಮತ್ತು ಮಣ್ಣಿನಿಂದ ಸಂಪೂರ್ಣವಾಗಿ ಗುಂಡಿಯನ್ನು ಭಕ್ತರೇ ಮುಚ್ಚಿದ್ದರು. ನಂತರ ಭಜನೆ, ಪೂಜೆ ಕೈಗೊಂಡಿದ್ದರು. ಶನಿವಾರ ಶ್ರೀಮಂತ ತಾತನವರು ತಮ್ಮ ಅನುಷ್ಠಾನ ಮಂಗಲಗೊಳಿಸಿದರು. ಭೂಗರ್ಭ ಪ್ರವೇಶಿಸುವ ಮುನ್ನ ಅನೇಕರು ಸ್ವಾಮೀಜಿ ದೇಹಾರೋಗ್ಯದಲ್ಲಿ ಏರುಪೇರಾಗುವ ಆತಂಕ ವ್ಯಕ್ತಪಡಿಸಿದ್ದರು. ಆದರೆ ಆರೋಗ್ಯವಂತರಾಗಿಯೇ ಸ್ವಾಮೀಜಿ ಹೊರಬಂದಿದ್ದು, ನೆರೆದವರಲ್ಲಿ ಅಚ್ಚರಿ ಉಂಟು ಮಾಡಿದೆ. ಸ್ವಾಮೀಜಿ ಭೂಗರ್ಭದಿಂದ ಹೊರಬಂದ ನಂತರ ಭಕ್ತರು ಆನೆ ಮೇಲೆ ಮೆರವಣಿಗೆ ಮಾಡಿದರು. ಇದೇ ವೇಳೆ‌ ಶ್ರೀಮಂತ ತಾತನವರನ್ನು ಸತ್ಕರಿಸಲಾಯಿತು.