ಕೋವಿಡ್‌ ಮಾದರಿ ಸಂಗ್ರಹದ ವೇಳೆ ಮೂಗಿನೊಳಗೆ ಮುರಿದ ಸ್ವಾಬ್‌ ಸ್ಟಿಕ್‌!

ಹೈದರಾಬಾದ್‌: ಕೋವಿಡ್‌ ಪರೀಕ್ಷೆ ಮಾದರಿ ಸಂಗ್ರಹದ ವೇಳೆ ಬಳಸಿದ ಸ್ವಾಬ್‌ ಸ್ಟಿಕ್‌ ಮೂಗಿನೊಳಗೆ ಮುರಿದು ಹೋಗಿರುವ ಘಟನೆ ತೆಲಂಗಾಣ ಕರೀಂನಗರ ಜಿಲ್ಲೆಯ ಹಳ್ಳಿಯೊಂದರಲ್ಲಿ ನಡೆದಿದೆ.

ಗ್ರಾಮದ ಸರಪಂಚ್‌ ಜುವಾಜಿ ಶೇಖರ್‌ ಅವರು ಹಳ್ಳಿಯಲ್ಲಿ ಆಯೋಜಿಸಿದ್ದ ರ್ಯಾಪಿಡ್‌ ಆ್ಯಂಟಿಜೆನ್‌ ಟೆಸ್ಟ್‌ನಲ್ಲಿ ತಾವೇ ಮೊದಲು ಪರೀಕ್ಷೆಗೆ ಒಳಗಾಗಿದ್ದರು. ಅವರ ಮೂಗಿನೊಳಗೇ ಸ್ಟಿಕ್‌ ಮುರಿದಿದ್ದು, ಅದನ್ನು ಹೊರತೆಗೆಯಲು ಸ್ಥಳೀಯ ವೈದ್ಯರು ವಿಫ‌ಲವಾದ ಹಿನ್ನೆಲೆಯಲ್ಲಿ, ಖಾಸಗಿ ಆಸ್ಪತ್ರೆಯಲ್ಲಿ ಎಂಡೋಸ್ಕೊಪಿ ಮೂಲಕ ಹೊರತೆಗೆಯಲಾಯಿತು.

ಚೇತರಿಕೆ ಬಳಿಕ ಶೇಖರ್‌ ಪ್ರತಿಕ್ರಿಯಿಸಿ, ಅನನುಭವಿ ವೈದ್ಯ ಸಿಬ್ಬಂದಿಯಿಂದ ಹೀಗಾಯಿತು ಎಂದು ಆರೋಪಿಸಿದ್ದಾರೆ.