ಮುಜಫ‌ರನಗರ : ಹುಡುಗಿಯರ ಚುಡಾವಣೆ, ಆಕ್ಷೇಪಿಸಿದವರಿಗೆ ಹಲ್ಲೆ

ಮುಜಫ‌ರನಗರ : ಶಾಲೆಯಿಂದ ಮರಳುತ್ತಿದ್ದ 12ನೇ ತರಗತಿಯ ಮೂವರು ವಿದ್ಯಾರ್ಥಿನಿಯರನ್ನು ಚುಡಾಯಿಸಿದ್ದಲ್ಲದೆ ಇದನ್ನು ಆಕ್ಷೇಪಿಸಿದ ಇಬ್ಬರನ್ನು ದುಷ್ಕರ್ಮಿ ತರುಣರು ಅಮಾನುಷವಾಗಿ ಹೊಡೆದು ಹಲ್ಲೆ ನಡೆಸಿದ ಘಟನೆ ವರದಿಯಾಗಿದೆ. 

ಕೋತ್ವಾಲಿ ಪೊಲೀಸ್‌ ಠಾಣೆ ಸಮೀಪದ ಫ‌ತೇರ್‌ಶಾ ಚೌಕದಲ್ಲಿ ಈ ಘಟನೆ ನಡೆದಿದೆ. 12ನೇ ತರಗತಿಯ ಮೂವರು ವಿದ್ಯಾರ್ಥಿನಿಯರನ್ನು ಬೈಕಿನಲ್ಲಿ ಬಂದ ಇಬ್ಬರು ಕಾಮುಕ ತರುಣರು ಚುಡಾಯಿಸಿದರು. ಅಲ್ಲೇ ಸಾಗುತ್ತಿದ್ದ ಇಬ್ಬರು ವ್ಯಕ್ತಿಗಳು ಇದಕ್ಕೆ ಆಕ್ಷೇಪಿಸಿದಾಗ ಅವರ ಮೇಲೆ ಈ ತರುಣರು ಹಲ್ಲೆ ನಡೆಸಿದ್ದಲ್ಲದೇ ಹುಡುಗಿಗೆ ಕಪಾಳ ಮೋಕ್ಷ ಮಾಡಿದರು.

ಪೊಲೀಸರು ಕೇಸು ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ. ಘಟನೆಯ ಬಳಿಕ ದುಷ್ಕರ್ಮಿ ತರುಣರು ಪರಾರಿಯಾಗಿದ್ದು ಅವರಿಗಾಗಿ ಶೋಧ ನಡೆದಿದೆ.