ಜಮ್ಮು ಕಾಶ್ಮೀರ : ಶಾಲಾ ಬಸ್ಸಿಗೆ ಕಲ್ಲೆಸೆತ; 2ನೇ ತರಗತಿ ಮಗುವಿಗೆ ಗಾಯ

ಶ್ರೀನಗರ : ಜಮ್ಮು ಕಾಶ್ಮೀರದ ಶೋಪಿಯಾನ್‌ ಜಿಲ್ಲೆಯ ಝವೂರಾ ಎಂಬಲ್ಲಿ ಇಂದು ಬುಧವಾರ ಬೆಳಗ್ಗೆ ರೇನ್‌ಬೋ ಹೈಸ್ಕೂಲ್‌ ಎಂಬ ಖಾಸಗಿ ಶಾಲೆಯ ಬಸ್ಸಿನ ಮೇಲೆ ದುಷ್ಕರ್ಮಿಗಳು ಕಲ್ಲೆಸೆದ ಕಾರಣ ಎರಡನೇ ತರಗತಿಯ ಮಗುವಿಗೆ ತಲೆಗೆ ಗಂಭೀರ ಏಟು ಬಿದ್ದು ಅದನ್ನು ಒಡನೆಯೇ ಶೇರ್‌ ಈ ಕಾಶ್ಮೀರ್‌ ಇನ್‌ಸ್ಟಿಟ್ಯೂಟ್‌ ಆಫ್ ಮೆಡಿಕಲ್‌ ಸಯನ್ಸಸ್‌ ಆಸ್ಪತ್ರೆಗೆ ದಾಖಲಿಸಲಾಯಿತು.

ಘಟನೆಯ ಬಗ್ಗೆ ಮಾಧ್ಯಮದೊಂದಿಗೆ ಮಾತನಾಡಿ ಮಾಹಿತಿ ನೀಡಿದ ಶೋಪಿಯಾನ್‌ ಎಸ್‌ಎಸ್‌ಪಿ ಶೈಲೇಂದ್ರ ಕುಮಾರ್‌ ಅವರು, “ಇಂದು ಬೆಳಗ್ಗೆ ಕೆಲವು ದುಷ್ಕರ್ಮಿಗಳು ಖಾಸಗಿ ಶಾಲೆಯ ಬಸ್ಸನ್ನು ಘೇರಾವ್‌ ಮಾಡಿ ಕಲ್ಲೆಸೆದರು. 2ನೇ ತರಗತಿಯ ಮಗುವಿನ ತಲೆಗೆ ಗಾಯವಾಗಿ ಅದನ್ನು ಕೂಡಲೇ ಆಸ್ಪತ್ರೆಗೆ ಒಯ್ದು ಚಿಕಿತ್ಸೆ ನೀಡಲಾಯಿತು. ಘಟನೆಯನ್ನು ಅನುಸರಿಸಿ ಕಲ್ಲೆಸೆದ ದುಷ್ಕರ್ಮಿಗಳನ್ನು ಸೆರೆ ಹಿಡಿಯಲು ಇಡಿಯ ಪ್ರದೇಶವನ್ನು ಪೊಲೀಸರು ಸುತ್ತುವರಿದರು. ದುಷ್ಕಮಿಗಳನ್ನು ಬೇಗನೆ ಬಂಧಿಸಲಾಗುವುದು’ ಎಂದು ಹೇಳಿದರು. 

ಘಟನೆಯ ಬಗ್ಗೆ ಆಘಾತ, ಆಕ್ರೋಶ ವ್ಯಕ್ತಪಡಿಸಿ  ಖಂಡಿಸಿರುವ ಜಮ್ಮು ಕಾಶ್ಮೀರ ಮುಖ್ಯಮಂತ್ರಿ ಮೆಹಬೂಬ ಮುಫ್ತಿ ಅವರು ದಾಳಿಕೋರರನ್ನು ಬೇಗನೆ ಸೆರೆ ಹಿಡಿಯಲಾಗುವುದು ಎಂದು ಹೇಳಿದರು. 

ಮಾಜಿ ಮುಖ್ಯಮಂತ್ರಿ ಉಮರ್‌ ಅಬ್ದುಲ್ಲ ಅವರು ಘಟನೆಯನ್ನು ಖಂಡಿಸಿ “ಶಾಲಾ ಮಕ್ಕಳ ಮೇಲೆ ಕಲ್ಲೆಸೆಯುವ ಮೂಲಕ ದುಷ್ಕರ್ಮಿಗಳ ಯಾವ ಉದ್ದೇಶ ಈಡೇರಲು ಸಾಧ್ಯ? ಇದನ್ನು ನಾವೆಲ್ಲರೂ ಒಗ್ಗೂಡಿ ಏಕಮತದಿಂದ ಖಂಡಿಸಬೇಕು’ ಎಂದು ಟ್ವಿಟರ್‌ನಲ್ಲಿ ಬರೆದಿದ್ದಾರೆ.