ಕ್ಯಾಂಡಿ ಏಕದಿನ: ಲಂಕೆಗೆ ಗೆಲುವಿನ ಸಿಹಿ

ಕ್ಯಾಂಡಿ: ಪ್ರವಾಸಿ ದಕ್ಷಿಣ ಆಫ್ರಿಕಾ ವಿರುದ್ಧ ಈಗಾಗಲೇ ಏಕದಿನ ಸರಣಿ ಕಳೆದುಕೊಂಡಿರುವ ಶ್ರೀಲಂಕಾ, ಬುಧವಾರದ ಮಳೆಪೀಡಿತ ಕ್ಯಾಂಡಿ ಪಂದ್ಯದಲ್ಲಿ 3 ರನ್ನುಗಳ ರೋಚಕ ಜಯ ಸಾಧಿಸಿದೆ. ಇದರೊಂದಿಗೆ ಸರಣಿ ಸೋಲಿನ ಅಂತರವನ್ನು 1-3ಕ್ಕೆ ಇಳಿಸಿಕೊಂಡಿದೆ.

ಆಗಾಗ ಸುರಿದ ಮಳೆಯಿಂದಾಗಿ ಈ ಪಂದ್ಯದ ಓವರ್‌ಗಳ ಸಂಖ್ಯೆಯನ್ನು ಕಡಿತಗೊಳಿಸುತ್ತಲೇ ಬರಲಾಯಿತು. ಮೊದಲು ಬ್ಯಾಟಿಂಗ್‌ ನಡೆಸಿದ ಶ್ರೀಲಂಕಾಕ್ಕೆ ನಿಗದಿಯಾದದ್ದು 39 ಓವರ್‌. ಪ್ರಚಂಡ ಪ್ರದರ್ಶನ ನೀಡಿದ ಲಂಕಾ 7 ವಿಕೆಟಿಗೆ 306 ರನ್‌ ಪೇರಿಸಿ ಸವಾಲೊಡ್ಡಿತು.

21 ಓವರ್‌, 191 ರನ್‌ ಸವಾಲು
ದಕ್ಷಿಣ ಆಫ್ರಿಕಾದ ಚೇಸಿಂಗ್‌ ವೇಳೆ, ದ್ವಿತೀಯ ಓವರ್‌ ಮುಗಿದೊಡನೆಯೇ ಮತ್ತೆ ಮಳೆ ಸುರಿಯಿತು. ಅಂತಿಮವಾಗಿ 21 ಓವರ್‌ಗಳಲ್ಲಿ 191 ರನ್‌ ಗಳಿಸುವ ಸವಾಲು ಎದುರಾಯಿತು. ದಕ್ಷಿಣ ಆಫ್ರಿಕಾ ಇದನ್ನು ದಿಟ್ಟ ರೀತಿಯಲ್ಲೇ ಸ್ವೀಕರಿಸಿತು. ಸುರಂಗ ಲಕ್ಮಲ್‌ ಪಾಲಾದ ಅಂತಿಮ ಓವರಿನಲ್ಲಿ ಆಫ್ರಿಕಾ 8 ರನ್‌ ಮಾಡಬೇಕಿತ್ತು. ಡೇವಿಡ್‌ ಮಿಲ್ಲರ್‌ ಕ್ರೀಸಿನಲ್ಲಿದ್ದುದರಿಂದ ಪ್ರವಾಸಿ ಪಡೆಗೆ ಇದೇನೂ ಅಸಾಧ್ಯವಾಗಿರಲಿಲ್ಲ. ಆದರೆ 2ನೇ ಎಸೆತದಲ್ಲಿ ಮಿಲ್ಲರ್‌ ಔಟಾಗುವುದರೊಂದಿಗೆ ಪಂದ್ಯಕ್ಕೆ ತಿರುವು ಲಭಿಸಿತು. ಎನ್‌ಗಿಡಿ ಮತ್ತು ಮೊದಲ ಪಂದ್ಯ ಆಡಲಿಳಿದಿದ್ದ ಜೂನಿಯರ್‌ ಡಾಲಾ ಅವರಿಗೆ ಕೊನೆಯ 4 ಎಸೆತಗಳ ಒತ್ತಡವನ್ನು ನಿಭಾಯಿಸಲಾಗಲಿಲ್ಲ. ಅಂತಿಮವಾಗಿ 9ಕ್ಕೆ 187 ರನ್‌ ಗಳಿಸಿ ಶರಣಾಯಿತು.

ಇದು ದಕ್ಷಿಣ ಆಫ್ರಿಕಾ ವಿರುದ್ಧ ಅನುಭವಿಸಿದ ಸತತ 11 ಸೋಲುಗಳ ಬಳಿಕ ಶ್ರೀಲಂಕಾ ಸಾಧಿಸಿದ ಮೊದಲ ಗೆಲುವು. 2 ವರ್ಷಗಳ ಬಳಿಕ ಮೊದಲ ಅರ್ಧ ಶತಕ ಹೊಡೆದ ದಸುನ್‌ ಶಣಕ ಪಂದ್ಯಶ್ರೇಷ್ಠ ಗೌರವಕ್ಕೆ ಪಾತ್ರರಾದರು.

ಸಂಕ್ಷಿಪ್ತ ಸ್ಕೋರ್‌: ಶ್ರೀಲಂಕಾ-39 ಓವರ್‌ಗಳಲ್ಲಿ 7 ವಿಕೆಟಿಗೆ 306 (ಶಣಕ 65, ತಿಸರ ಪೆರೆರ ಔಟಾಗದೆ 51, ಕುಸಲ್‌ ಪೆರೆರ 51, ಡ್ಯುಮಿನಿ 35ಕ್ಕೆ 2, ಎನ್‌ಗಿಡಿ 65ಕ್ಕೆ 2). ದಕ್ಷಿಣ ಆಫ್ರಿಕಾ-21 ಓವರ್‌ಗಳಲ್ಲಿ 9 ವಿಕೆಟಿಗೆ 187 (ಆಮ್ಲ 40, ಡ್ಯುಮಿನಿ 38, ಡಿ ಕಾಕ್‌ 23, ಲಕ್ಮಲ್‌ 46ಕ್ಕೆ 3, ತಿಸರ ಪೆರೆರ 32ಕ್ಕೆ 2). ಪಂದ್ಯಶ್ರೇಷ್ಠ: ದಸುನ್‌ ಶಣಕ.