Paris Olympic: ಟೇಬಲ್‌ ಟೆನಿಸ್‌ ಸ್ಪರ್ಧೆಯಲ್ಲಿ ಶ್ರೀಜಾಗೆ ಜಯ, ಮಣಿಕಾ ಪರಾಭವ

ಪ್ಯಾರಿಸ್‌: ಪ್ಯಾರಿಸ್‌ ಟೇಬಲ್‌ ಟೆನಿಸ್‌ ಸ್ಪರ್ಧೆಯಲ್ಲಿ ಶ್ರೀಜಾ ಅಕುಲಾ ಪ್ರಿ ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿದರೆ, ಮಣಿಕಾ ಬಾತ್ರಾ ಇದೇ ಸುತ್ತಿನಲ್ಲಿ ಸೋಲನುಭವಿಸಿ ಹೊರಬಿದ್ದರು.

ಬುಧವಾರದ 32ರ ಸುತ್ತಿನ ಸ್ಪರ್ಧೆಯಲ್ಲಿ ಕಠಿನ ಹೋರಾಟ ಸಂಘಟಿಸಿದ ಶ್ರೀಜಾ ಅಕುಲಾ, ಸಿಂಗಾಪುರದ ಜಿಯಾನ್‌ ಜೆಂಗ್‌ ವಿರುದ್ಧ 4-2 ಅಂತರದಿಂದ ಗೆದ್ದು ಬಂದರು (9-11, 12-10, 11-4, 11-5, 10-12, 12-10). ಮಣಿಕಾ ಬಾತ್ರಾ ಅವರನ್ನು ಜಪಾನ್‌ನ ಮಿಯು ಹಿರಾನೊ 4-1 ಅಂತರದಿಂದ ಸೋಲಿಸಿದರು.

ಮೊದಲ ಗೇಮ್‌ ಕಳೆದುಕೊಂಡ ಬಳಿಕ ಶ್ರೀಜಾ ದಿಟ್ಟ ಹೋರಾಟ ನಡೆಸಿದರು. 51 ನಿಮಿಷಗಳಲ್ಲಿ ಗೆಲುವು ಸಾಧಿಸಿದರು. ಇವರ ಮುಂದಿನ ಎದುರಾಳಿ, ಚೀನದ ವಿಶ್ವದ ನಂ.1 ಆಟಗಾರ್ತಿ ಸನ್‌ ಯಿಂಗ್ಯಾ.

ಎರಡು ಬಾರಿಯ ರಾಷ್ಟ್ರೀಯ ಚಾಂಪಿಯನ್‌ ಆಗಿರುವ ಶ್ರೀಜಾ ಅಕುಲಾ, 2022ರ ಕಾಮನ್ವೆಲ್ತ್‌ ಗೇಮ್ಸ್‌ ಮಿಶ್ರ ಡಬಲ್ಸ್‌ನಲ್ಲಿ ಅಚಂತ ಶರತ್‌ ಕಮಲ್‌ ಜತೆಗೂಡಿ ಚಿನ್ನ ಜಯಿಸಿದ್ದರು.