ಗುಜರಾತ್‌ ಪಂಚಾಯತ್‌ ಚುನಾವಣೆ: ಗುಂಪು ಘರ್ಷಣೆಗೆ 6 ಬಲಿ

ಭುಜ್‌, ಗುಜರಾತ್‌ : ಗ್ರಾಮ ಪಂಚಾಯತ್‌ ಚುನಾವಣೆಗೆ ಸಂಬಂಧಿಸಿ ಗುಜರಾತ್‌ನ ಕಚ್‌ ಜಿಲ್ಲೆಯಲ್ಲಿ ಸಂಭವಿಸಿದ ಗುಂಪು ಘರ್ಷಣೆಗೆ ಆರು ಮಂದಿ ಬಲಿಯಾಗಿರುವುದಾಗಿ ಪೊಲೀಸರು ಇಂದು  ಬುಧವಾರ ತಿಳಿಸಿದ್ದಾರೆ.

ಛಾಸ್ರಾ ಗ್ರಾಮದಲ್ಲಿ ಕೆಲ ದಿನಗಳ ಹಿಂದೆ ನಡೆದಿದ್ದ ಗ್ರಾಮ ಪಂಚಾಯತ್‌ ಸರಪಂಚ್‌ ಚುನಾವಣೆಯಲ್ಲಿ ಮಹಿಳೆಯೊಬ್ಬರು ಗೆದ್ದಿದ್ದರು. ಇದಕ್ಕೆ ಸಂಬಂಧಿಸಿ ಎರಡು ಸಮುದಾಯಗಳಿಗೆ ಸೇರಿದ ಸದಸ್ಯರ ನಡುವೆ ಜಗಳ ಉಂಟಾಗಿ ಘರ್ಷಣೆಗೆ ಕಾರಣವಾಗಿ ಆರು ಮಂದಿ ಸ್ಥಳದಲ್ಲೇ ಮೃತಪಟ್ಟರು ಎಂದು ಕಚ್‌ (ಪಶ್ಚಿಮ) ಪೊಲೀಸ್‌ ಸುಪರಿಂಟೆಂಡೆಂಟ್‌ ಎಂ ಎಸ್‌ ಭರಾಡಾ ತಿಳಿಸಿದ್ದಾರೆ. 

ಮೃತರನ್ನು ಮಗನ್‌ ಆಹಿರ್‌ 27, ಭರತ್‌ ಆಹಿರ್‌ 28, ಭಾರ್ಗವ ಆಹಿರ್‌ 26, ಚೇತನ್‌ ಆಹಿರ್‌ 38 ಮತ್ತು ಅಬಿದ್‌ ಸಬ್ಟಾರ್‌ ಭುಲಿಯಾ 25 (ಈತ ಮಹಿಳಾ ಸರಪಂಚ್‌ ಪುತ್ರ) ಮತ್ತು ಅಮದ್‌ ಅಬ್ದುಲ್‌ ಭುಲಿಯಾ 70 ಎಂದು ಗುರುತಿಸಲಾಗಿದೆ ಎಂದು ಭರಾಡಾ ತಿಳಿಸಿದ್ದಾರೆ.