ಬ್ಯಾಟಿಂಗ್‌ ವೈಫ‌ಲ್ಯವೇ ಕಾರಣ: ಡ್ಯುಮಿನಿ

ಜೋಹಾನ್ಸ್‌ಬರ್ಗ್‌: “ಭಾರತದೆದುರಿನ ಸೀಮಿತ ಓವರ್‌ಗಳ ಸರಣಿಯುದ್ದಕ್ಕೂ ಬ್ಯಾಟಿಂಗ್‌ ವೈಫ‌ಲ್ಯ ಎನ್ನುವುದು ನಮ್ಮ ದೊಡ್ಡ ಸಮಸ್ಯೆಯಾಗಿ ಕಾಡುತ್ತಿದೆ. ಇದಕ್ಕೆ ಟಿ20 ಪಂದ್ಯವೂ ಹೊರತಾಗಿಲ್ಲ. ಇದೊಂದು ದುರದೃಷ್ಟಕರ ಬೆಳವಣಿಗೆ. ತಂಡದ ಹಿರಿಯ ಬ್ಯಾಟ್ಸ್‌ಮನ್‌ಗಳಾದ ನಾವೆಲ್ಲ ಹೆಚ್ಚುವರಿ ಜವಾಬ್ದಾರಿ ಹೊರಬೇಕಾದ ತುರ್ತು ಅಗತ್ಯವಿದೆ’ ಎಂಬುದು ದಕ್ಷಿಣ ಆಫ್ರಿಕಾ ತಂಡದ ಉಸ್ತುವಾರಿ ನಾಯಕ ಜೆಪಿ ಡ್ಯುಮಿನಿ ಅವರ ಹತಾಶೆಯ ನುಡಿಗಳು.

“ನಮ್ಮನ್ನೇ ನಾವು ವಿಶ್ಲೇಷಣೆಗೆ ಒಳಪಡಿಸಿಕೊಳ್ಳಬೇಕಾದ ಕಾಲವಿದು. ನಮ್ಮ ಬ್ಯಾಟಿಂಗ್‌ನಲ್ಲಿ ಹೇಗೆ ಸುಧಾರಣೆ ತರಬೇಕು ಎಂಬುದನ್ನು ನಾವು ವಿಶ್ಲೇಷಿಸಿಕೊಳ್ಳಬೇಕು. ನಮ್ಮ ಸುಧಾರಿತ ಆಟ ಬುಧವಾರದ ಟಿ20 ಪಂದ್ಯದಲ್ಲಿ ಕಂಡುಬಂದೀತೆಂಬ ವಿಶ್ವಾಸದಲ್ಲಿದ್ದೇನೆ’ ಎಂದು ಡ್ಯುಮಿನಿ ಹೇಳಿದರು.