ವರ್ಷಾಂತ್ಯದಲ್ಲಿ ಸಾನಿಯಾ ಮತ್ತೆ ಟೆನಿಸ್‌ಗೆ ವಾಪಸ್‌

ಬೆಂಗಳೂರು: ಅಮ್ಮನಾಗಿರುವ ಖ್ಯಾತ ಟೆನಿಸ್‌ ಆಟಗಾರ್ತಿ ಸಾನಿಯಾ ಮಿರ್ಜಾ ಸದ್ಯ ಮುದ್ದಿನ ಮಗುವಿನ ಆರೈಕೆಯಲ್ಲಿ ಬ್ಯುಸಿಯಾಗಿದ್ದಾರೆ. ಈ ವರ್ಷದ ಅಂತ್ಯಕ್ಕೆ ಅವರು ಮತ್ತೆ ಟನಿಸ್‌ ಲೋಕಕ್ಕೆ ವಾಪಸ್‌ ಆಗಲಿದ್ದಾರೆ. ಸ್ವತಃ ಈ ವಿಷಯವನ್ನು ಸಾನಿಯಾ ಮಿರ್ಜಾ ಅವರು ತಿಳಿಸಿದ್ದಾರೆ.

ಮುಂದಿನ ಹತ್ತು ದಿನಗಳಲ್ಲಿ ಮತ್ತೆ ಅಭ್ಯಾಸ ಆರಂಭಿಸುತ್ತೇನೆ. ಮೊದಲು ತೂಕವನ್ನು ಇಳಿಸಿಕೊಳ್ಳಬೇಕಿದೆ. ನಾನೀಗ ಯುವ ಟೆನಿಸ್‌ ಆಟಗಾರ್ತಿ ಅಲ್ಲ. ನನಗೀಗ 32 ವರ್ಷದ ಆಗಿದೆ. ಟೆನಿಸ್‌ ನನ್ನ ಜೀವನ. ಎಲ್ಲವನ್ನೂ ನನಗೆ ನೀಡಿದೆ. ಯಾವುದೇ ಕಾರಣಕ್ಕೂ ಪ್ರಯತ್ನ ಮಾಡದೆ ಸುಮ್ಮನೆ ಕುಳಿತುಕೊಳ್ಳುವುದಿಲ್ಲ ಎಂದರು. ಇದೇ ವೇಳೆ ಮಾತು ಮುಂದುವರಿಸಿದ ಅವರು, ಸ್ಟೆಫಿ ಗ್ರಾಫ್ ಎರಡೂ ಮಕ್ಕಳ ತಾಯಿಯಾಗಿದ್ದರೂ ಟೆನಿಸ್‌ ಲೋಕದಲ್ಲಿ ಮಿಂಚಿದ್ದಾರೆ. ಅವರು ನನಗೆ ಸ್ಫೂರ್ತಿ ಎಂದು ತಿಳಿಸಿದರು. ಸಾನಿಯಾ ಮಿರ್ಜಾ 2017ರಲ್ಲಿ ಕೊನೆಯದಾಗಿ ಚೀನಾ ಓಪನ್‌ ಕೂಟದಲ್ಲಿ ಪಾಲ್ಗೊಂಡಿದ್ದರು. ಆಸ್ಟ್ರೇಲಿಯ ಓಪನ್‌, ಫ್ರೆಂಚ್ ಒಪನ್‌, ವಿಂಬಲ್ಡನ್‌ ಮತ್ತು ಯುಎಸ್‌ ಓಪನ್‌ ಟೆನಿಸ್‌ ಕೂಟದ ಡಬಲ್ಸ್‌ನಲ್ಲಿ ಅತ್ಯುತ್ತಮ ಪ್ರದರ್ಶನ ನೀಡಿದ್ದರು.