ವಿವಿಯಲ್ಲಿ ಜಿನ್ನಾ ಫೋಟೋ

ಅಲಿಗಡ: ಉತ್ತರ ಪ್ರದೇಶದ ಅಲಿಗಡ‌ ಮುಸ್ಲಿಂ ವಿಶ್ವವಿದ್ಯಾಲಯದಲ್ಲಿ ಪಾಕಿಸ್ಥಾನ ಸಂಸ್ಥಾಪಕ ಮೊಹಮ್ಮದ್‌ ಅಲಿ ಜಿನ್ನಾ ಫೋಟೋ ಪ್ರದರ್ಶಿಸಿರುವುದು ಇದೀಗ ವಿವಾದಕ್ಕೀಡಾಗಿದೆ. ಬಿಜೆಪಿ ಸಂಸದ ಸತೀಶ್‌ ಗೌತಮ್‌ ಈ ಬಗ್ಗೆ ಆಕ್ಷೇಪಿಸಿ ವಿವಿ ಕುಲಪತಿ ತಾರಿಕ್‌ ಮನ್ಸೂರ್‌ಗೆ ಪತ್ರ ಬರೆದಿದ್ದಾರೆ. ಆದರೆ ಇದನ್ನು ಸಮರ್ಥಿಸಿಕೊಂಡಿರುವ ವಿವಿ ವಕ್ತಾರ ಶಫಿ ಕಿದ್ವಾಯಿ, ಜಿನ್ನಾ ಫೋಟೋ ದಶಕಗಳಿಂದಲೂ ಇದೆ. ಜಿನ್ನಾ ಈ ವಿವಿ ಸಂಸ್ಥಾಪಕರು ಮತ್ತು ವಿದ್ಯಾರ್ಥಿ ಸಂಘಟನೆಯ ಖಾಯಂ ಸದಸ್ಯರು. ಖಾಯಂ ಸದಸ್ಯತ್ವ ಹೊಂದಿರುವ ಎಲ್ಲರ ಫೋಟೋವನ್ನು ವಿದ್ಯಾರ್ಥಿ ಯೂನಿಯನ್‌ ಕಚೇರಿಯಲ್ಲಿ ಪ್ರದರ್ಶಿಸುವುದು ಇಲ್ಲಿನ ಸಂಪ್ರದಾಯ ಎಂದಿದ್ದಾರೆ. ಅಷ್ಟೇ ಅಲ್ಲ, ಜಿನ್ನಾ ಜತೆಗೆ ಮಹಾತ್ಮ ಗಾಂಧಿ, ಮೌಲಾನಾ ಆಜಾದ್‌, ಸರ್ವೇಪಲ್ಲಿ ರಾಧಾಕೃಷ್ಣನ್‌ ಸೇರಿ ಹಲವು ಗಣ್ಯರ ಭಾವಚಿತ್ರಗಳನ್ನು ಪ್ರದರ್ಶಿಸಲಾಗಿದೆ ಎಂದಿದ್ದಾರೆ.