ಕುಡಿಯುವ ನೀರು ಪೂರೈಕೆಗೆ ಆಗ್ರಹಿಸಿ ರಸ್ತೆ ತಡೆ

ರೋಣ: ಪಟ್ಟಣದ ಕುರಬಗಲ್ಲಿ ಓಣಿಯಲ್ಲಿ 25 ದಿನಗಳಾದರೂ ನೀರು ಪೂರೈಕೆಯಾಗದೆ ಇರುವುದರಿಂದ, ಜನ ಮತ್ತು ಜಾನುವಾರುಗಳಿಗೆ ಕುಡಿವ ನೀರಿನ ಸಮಸ್ಯೆಯಾಗಿದೆ ಎಂದು 17 ಮತ್ತು 18 ನೇ ವಾರ್ಡ್‌ ನಿವಾಸಿಗಳು ಗುರುವಾರ ಪಟ್ಟಣದ ಜಕ್ಕಲಿ ಕ್ರಾಸ್‌ನಲ್ಲಿ 2 ಗಂಟೆಗೂ ಹೆಚ್ಚು ಕಾಲ ರಾಜ್ಯ ಹೆದ್ದಾರಿ ತಡೆದು ಪ್ರತಿಭಟಿಸಿದರು.

ವಾರಕ್ಕೊಮ್ಮ ನೀರು ಪೂರೈಸುವುದಾಗಿ ಪುರಸಭೆ ಅಧಿಕಾರಿಗಳ ಹೇಳುತ್ತಾ ಬಂದಿದ್ದೂ, ಆದರೆ 25 ದಿನ ಕಳೆದರೂ ನೀರು ಪೂರೈಸುವಲ್ಲಿ ಮುಂದಾಗಿಲ್ಲ. ಈ ಕುರಿತು ನೀರು ಸರಬರಾಜು ಸಿಬ್ಬಂದಿ ಕೇಳಿದಲ್ಲಿ ಸ್ಪಂದನೆ ನೀಡದೇ ಹಾರಿಕೆ ಉತ್ತರ ನೀಡುತ್ತಿದ್ದಾರೆ. ಪುರಸಭೆ ಅಧಿಕಾರಿಗಳ ಗಮನಕ್ಕೆ ತಂದರೂ ಯಾವುದೇ ಪ್ರಯೋಜವಾಗಿಲ್ಲ. ನೀರಿಗಾಗಿ ನಿತ್ಯ ನಲ್ಲಿ ಎದುರು ಕಾಯುತ್ತಾ ಕುಳಿತುಕೊಳ್ಳಬೇಕಾಗಿದೆ. ಮನುಷ್ಯರಾದರೆ ಎಲ್ಲೆಂದರಲ್ಲಿ ಹೋಗಿ ನೀರು ಕುಡಿದು ಬರುತ್ತಾರೆ. ಆದರೆ ಜಾನುವಾರುಗಳ ಏನು ಮಾಡಬೇಕು? ಎಂದು ಪ್ರತಿಭಟನಾನಿರತರು ಆಕ್ರೋಶ ವ್ಯಕ್ತಪಡಿಸಿದರು. ಸುದ್ದಿ ತಿಳಿಯುತ್ತಿದಂತೆ ಘಟನಾ ಸ್ಥಳಕ್ಕೆ ದೌಡಾಯಿಸಿದ ಪೊಲೀಸರು ಪ್ರತಿಭಟನಾನಿರತರನ್ನು ಮನವೊಲಿಸಲು ಯತ್ನಿಸಿದರು. ಈ ವೇಳೆ ಪ್ರತಿಭಟನಾನಿರತರು ಮತ್ತು ಪೊಲೀಸರ ಮದ್ಯೆ ತೀವ್ರ ವಾಗ್ವಾದ ನಡೆಯಿತು.

ಈ ಕೂಡಲೇ ನಿಮ್ಮ ಬಡಾವಣೆಗೆ ನೀರು ಬಿಡಿಸುವವಲ್ಲಿ ನಾವೇ ಖುದ್ದಾಗಿ ಶ್ರಮಿಸುತ್ತೆವೆ ಎಂದು ಪೊಲೀಸರು ಭರವಸೆ ನೀಡಿದರೂ ಕೇಳದ ಪ್ರತಿಭಟನಾನಿರತರು, ಸ್ಥಳಕ್ಕೆ ಪುರಸಭೆ ಮುಖ್ಯಾಧಿಕಾರಿಗಳು ಬರುವಂತೆ ಒತ್ತಾಸಿಯಿಸಿದರು. ಮುಖ್ಯಾಧಿಕಾರಿ ಲಕ್ಷ್ಮಣ ಕಟ್ಟಿಮನಿ ಪರವಾಗಿ ಸ್ಥಳಕ್ಕೆ ಆಗಮಿಸಿದ ಪುರಸಭೆ ವ್ಯವಸ್ಥಾಪಕ ಪಿ.ಎಫ್‌. ಶೇರಖಾನೆ, ನಿತ್ಯವು ಸರದಿಯಂತೆ ವಿವಿದ ವಾರ್ಡ್‌ಗಳಿಗೆ ನೀರು ಪೂರೈಸಲಾಗುತ್ತಿದ್ದು, ವಿದ್ಯುತ್‌ ಸಮಸ್ಯೆಯಿಂದ ನೀರು ಪೂರೈಸಲು ವಿಳಂಬವಾಗುತ್ತಿದೆ. ಈ ಕೂಡಲೇ 17 ಮತ್ತು 18ನೇ ವಾರ್ಡ್‌ಗಳಿಗೆ ನೀರು ಪೂರೈಸಲಾಗುವುದು. ಇನ್ನು ಮುಂದೆ ನೀರು ಪೂರೈಕೆಯಲ್ಲಿ ವ್ಯತ್ಯಯವಾಗದಂತೆ ಗಮನ ಹರಿಸಲಾಗುವದು ಎಂದು ಭರವಸೆ ನೀಡಿದರು. ಬಳಿಕ ಕುರಬಗಲ್ಲಿ ಓಣಿಯ ನಿವಾಸಿಗಳು ಪ್ರತಿಭಟನೆ ಕೈಬಿಟ್ಟರು. ಪ್ರತಿಭಟನೆಯಲ್ಲಿ ಬಸವರಾಜ ಮುಗಳಿ, ಅಜೀಜ ಯಲಿಗಾರ, ಇಮಾಮಸಾಬ ನಧಾಪ, ರಂಜಾನಬೀ ನರಗುಂದ, ಶಿವಬಸವ್ವ ಶಾಡಲಗೇರಿ, ಇಮಾಬೀ ನಧಾಪ, ಅಬ್ದುಲಸಾಬ ಕಂಪೌಂಡರ, ಹುಸೇನಸಾಬ ನಧಾಪ, ದಸ್ತಗಿರಸಾಬ ಗಡವಾಲಿ ಸೇರಿದಂತೆ ನೂರಾರು ಜನತೆ ಭಾಗವಹಿಸಿದ್ದರು.