Kundapur: ರಸ್ತೆ ಮಧ್ಯೆ ಅಪಾಯಕಾರಿ ಹೊಂಡ!

ಕುಂದಾಪುರ: ಶಾಸ್ತ್ರಿ ಪಾರ್ಕ್‌ ಬಳಿ ಇರುವ ಗುಂಡಿ ಇದು. ನಿತ್ಯ ಒಬ್ಬಿಬ್ಬರು ಎಂಬಂತೆ ವಾಹನಗಳು, ಸಾರ್ವಜನಿಕರು ಈ ಗುಂಡಿಗೆ ಆಹಾರವಾಗುತ್ತಿದ್ದಾರೆ. ದ್ವಿಚಕ್ರವಾಹಗಳು ಬೀಳುತ್ತಿವೆ. ಕತ್ತಲಲ್ಲಿ ಪ್ರಯಾಣಿಕರು, ಪಾದಚಾರಿಗಳು ಬೀಳುತ್ತಿದ್ದಾರೆ. ಸಾರ್ವನಿಕರು ಹೆದ್ದಾರಿ ಗುತ್ತಿಗೆದಾರರಿಗೆ ಅನೇಕ ಬಾರಿ ದೂರು ನೀಡಿದರೂ ಪ್ರಯೋಜನ ಆಗಲಿಲ್ಲ.

ಇಂತದ್ದೇ ಒಂದು ಗುಂಡಿ ಅಥವಾ ಇದಕ್ಕಿಂತ ಅಪಾಯಕಾರಿಯಾದ ಗುಂಡಿ ಭಂಡಾರ್‌ಕಾರ್ಸ್‌ ಕಾಲೇಜಿಗೆ ಹೋಗುವ ರಸ್ತೆ ಬಳಿ ಇದೆ. ಇಲ್ಲಿ ಕಾಮಗಾರಿ ನಡೆಸಲಾಗಿದ್ದರೂ ಕಾಮಗಾರಿ ಆಗಿ ಎರಡು ಮುರು ದಿನಗಳಲ್ಲಿ ಆ ಕಳಪೆ ಕಾಮಗಾರಿ ಕುಸಿದದ್ದು ಸುಳ್ಳಲ್ಲ. ಇದರಿಂದ ಬಸ್‌ಗಳೂ ಸೇರಿದಂತೆ ಅನೇಕ ವಾಹನಗಳು ಇದಕ್ಕೆ ಬೀಳುತ್ತಿವೆ. ರಾತ್ರಿ ವೇಳೆ ಇತರ ವಾಹನಗಳೂ ಬೀಳುತ್ತಿವೆ.

ಕುಂದಾಪುರ ಮುಖ್ಯ ರಸ್ತೆ ಸಂಪರ್ಕಕ್ಕೆ ಸಮೀಪದ ಸರ್ವೀಸ್‌ ರಸ್ತೆ ಮಧ್ಯೆ ಉಂಟಾದ ಈ ಬೃಹದಾಕಾರದ ಗುಂಡಿಯನ್ನು ಸಾರ್ವಜನಿಕರು ಬಿದ್ದು ಇನ್ನಷ್ಟು ಅವಘಡ ಆಗುವ ಮೊದಲು ದುರಸ್ತಿ ಪಡಿಸಬೇಕಾಗಿ ಸಾರ್ವಜನಿಕರು ಒತ್ತಾಯಿಸಿದ್ದಾರೆ. ಹೊಂಡ ಸರಿಪಡಿಸುವ ಕಾರ್ಯವನ್ನು ಸಂಬಂಧಪಟ್ಟ ಇಲಾಖೆ ಮಾಡದಿರುವುದಕ್ಕೆ ಸಾರ್ವಜನಿಕರಿಂದ ಆಕ್ರೋಶ ವ್ಯಕ್ತವಾಗಿದೆ. ಶಾಸ್ತ್ರೀ ಪಾರ್ಕ್‌ ಬಳಿ ಸಾವಿಗಾಗಿ ಕಾಯುತ್ತಿರುವ ಸಾವು ಗುಂಡಿ ಎಂದೇ ಇದಕ್ಕೆ ನಾಮಕರಣ ಮಾಡಲಾಗಿದೆ.