ಪಾಕಿಸ್ಥಾನಕ್ಕೆ ತಕ್ಕ ಪ್ರತ್ಯುತ್ತರ: ರಘುಪತಿ ಭಟ್‌ ಆಗ್ರಹ

ಉಡುಪಿ: ಹೇಡಿಗಳಂತೆ ಭಾರತದ ಸೈನಿಕರನ್ನು ಕೊಂದ ಪಾಕಿಸ್ಥಾನ ಪ್ರಚೋದಿತ ಉಗ್ರಗಾಮಿಗಳಿಗೆ ಮತ್ತು ಪಾಕಿಸ್ಥಾನಕ್ಕೆ ಸೂಕ್ತ ಉತ್ತರವನ್ನು ಕೊಡಬೇಕಾಗಿದೆ ಎಂದು ಶಾಸಕ ಕೆ.ರಘುಪತಿ ಭಟ್‌ ಆಗ್ರಹಿಸಿದರು. 

ಅಜ್ಜರಕಾಡಿನ ಹುತಾತ್ಮರ ಸ್ಮಾರಕದ ಬಳಿ ಶುಕ್ರವಾರ ಜಿಲ್ಲಾ ಬಿಜೆಪಿ ಆಯೋಜಿಸಿದ ಶ್ರದ್ಧಾಂಜಲಿ ಸಭೆಯಲ್ಲಿ ಅವರು ಮಾತನಾಡಿ, ಉಗ್ರಗಾಮಿಗಳು ಭಾರತಕ್ಕೆ ಉಂಟು ಮಾಡಿದ ನಷ್ಟಕ್ಕಿಂತ ಹತ್ತು ಪಟ್ಟು ನಷ್ಟವನ್ನು ಪಾಕಿಸ್ಥಾನ ಅನುಭವಿಸಲೇಬೇಕು. ಈಗಾಗಲೇ ಪ್ರಧಾನಿಯವರು ಈ ಕುರಿತು ಸೂಚನೆ ನೀಡಿದ್ದಾರೆಂದರು. 

ಬಿಜೆಪಿ ಜಿಲ್ಲಾಧ್ಯಕ್ಷ ಮಟ್ಟಾರ್‌ ರತ್ನಾಕರ ಹೆಗ್ಡೆಯವರು ಮಾತನಾಡಿ, ನಮ್ಮ ಸೈನಿಕರ ಬಲಿದಾನ ದೇಶಕ್ಕೆ ನಷ್ಟ. ಅವರಿಗೆ ನಾವು ಶ್ರದ್ಧಾಂಜಲಿ ಸಲ್ಲಿಸುವುದರ ಜತೆ ಸೈನಿಕರ ಕುಟುಂಬಕ್ಕೆ ನೈತಿಕ ಸ್ಥೈರ್ಯ ತುಂಬಬೇಕು. ಪಾಕಿಸ್ಥಾನಕ್ಕೆ ತಕ್ಕ ಶಾಸ್ತಿ ಮಾಡಬೇಕು ಎಂದರು. 

ಬಿಜೆಪಿ ನಾಯಕರಾದ ಯಶಪಾಲ್‌ ಸುವರ್ಣ, ಶ್ರೀಶ ನಾಯಕ್‌, ರಶ್ಮಿತಾ ಬಾಲಕೃಷ್ಣ ಶೆಟ್ಟಿ, ಗಿರೀಶ್‌ ಅಂಚನ್‌, ರಜನಿ ಹೆಬ್ಟಾರ್‌, ಮಂಜುನಾಥ ಮಣಿಪಾಲ, ಬೈಕಾಡಿ ಸುಪ್ರಸಾದ ಶೆಟ್ಟಿ, ವಿಜಯಕುಮಾರ ಉದ್ಯಾವರ, ಸುಮಿತ್ರಾ ನಾಯಕ್‌, ದಾವುದ್‌ ಅಬೂಬಕ್ಕರ್‌, ತಾ.ಪಂ. ಅಧ್ಯಕ್ಷೆ ನಳಿನಿ ಪ್ರದೀಪ್‌ ರಾವ್‌, ಗೀತಾಂಜಲಿ ಸುವರ್ಣ, ಸಂಧ್ಯಾ ರಮೇಶ್‌ ನಗರಾಧ್ಯಕ್ಷ ಪ್ರಭಾಕರ ಪೂಜಾರಿ ಉಪಸ್ಥಿತರಿದ್ದರು. ಶಿವಕುಮಾರ್‌ ನಿರ್ವಹಿಸಿದರು.