“ಪ್ರತಿಬಿಂಬ’ಮಾಹಿತಿ ಕೋಶಕ್ಕೆ ಚಾಲನೆ

ಬೆಂಗಳೂರು: ರಾಜ್ಯ ಸರ್ಕಾರದ ಎಲ್ಲಾ ಇಲಾಖೆಗಳ ಕಾರ್ಯ ಚಟುವಟಿಕೆ, ಯೋಜನೆ, ಕಾರ್ಯಕ್ರಮಗಳ ವಿವರ ಮತ್ತು ಆರ್ಥಿಕ ಪ್ರಗತಿಯ ಮಾಹಿತಿ ಜನರ ಮುಂದಿಡುವ ಮುಖ್ಯಮಂತ್ರಿಯವರ ಮಾಹಿತಿ ಕೋಶ “ಪ್ರತಿಬಿಂಬ” ಅನಾವರಣಗೊಂಡಿತು.

ವಿಧಾನಸೌಧದ ಸಮ್ಮೇಳನ ಸಭಾಂಗಣ ದಲ್ಲಿ ಮಂಗಳವಾರ “ಪ್ರತಿಬಿಂಬ’ ಮಾಹಿತಿ ಕೋಶಕ್ಕೆ ಚಾಲನೆ ನೀಡಿ ಮಾತನಾಡಿದ ಸಿಎಂ ಸಿದ್ದರಾಮಯ್ಯ, “ಸರ್ಕಾರದ ಗುರಿ ಮತ್ತು ಸಾಧನೆಗಳ ಬಗ್ಗೆ ನಾಡಿನ ಜನತೆಗೆ ಮಾಹಿತಿ ಒದಗಿಸುವ ವೇದಿಕೆಯಾಗಿ ಪ್ರತಿಬಿಂಬ ಮಾಹಿತಿ ಕೋಶ ರೂಪುಗೊಂಡಿದೆ. ಜನಪ್ರತಿನಿಧಿಗಳು ಜನರಿಗೆ ಉತ್ತರದಾಯಿಗಳಾಗಿರಬೇಕು. ಐದು ವರ್ಷಕ್ಕೊಮ್ಮೆ ಚುನಾವಣೆಯಲ್ಲಿ ಆಯ್ಕೆಯಾಗಿ ಬರುವ ಸರ್ಕಾರವು ಚುನಾವಣೆ ವೇಳೆ ನೀಡಿದ ಭರವಸೆಗಳಿಗೆ ಉತ್ತರ ಈ ಮಾಹಿತಿ ಕೋಶದಲ್ಲಿದೆ ಎಂದರು.

ಉದಾಹರಣೆಗೆ ಕೃಷಿ ಭಾಗ್ಯ ಯೋಜನೆಯಡಿ ಒಂದು ಲಕ್ಷ ಕೃಷಿ ಹೊಂಡ ನಿರ್ಮಿಸಲಾಗಿದೆ. ವರ್ಷಾಂತ್ಯದಲ್ಲಿ ಇನ್ನೂ 30 ಸಾವಿರ ಕೃಷಿ ಹೊಂಡ ನಿರ್ಮಿಸುವ ಗುರಿಯಿದ್ದು, ಕಾಮಗಾರಿಗಳು ನಾನಾ ಹಂತದಲ್ಲಿವೆ. ಹೀಗೆ ಪ್ರಮುಖ ಇಲಾಖೆಗಳ ಮುಖ್ಯ ಯೋಜನೆಗಳ ಮಾಹಿತಿ, ಆಯಾ ತಿಂಗಳಿನ ಸಾಧನೆ ಬಗ್ಗೆ ಮಾಹಿತಿ ಒದಗಿಸಲಿದೆ ಎಂದು ವಿವರಿಸಿದರು.

ಚುನಾವಣೆ ವೇಳೆ ನೀಡಲಾಗಿದ್ದ 165 ಭರವಸೆಗಳ ಪೈಕಿ ಕಳೆದ 4 ವರ್ಷದಲ್ಲಿ  125ಕ್ಕೂ ಹೆಚ್ಚು ಭರವಸೆಗಳನ್ನು ಸರ್ಕಾರ ಈಡೇರಿಸಿದೆ. ರಾಜ್ಯ ಹಾಗೂ ದೇಶದ ಜನರಿಗೆ ಸರ್ಕಾರದ ಸಾಧನೆಯ ಮಾಹಿತಿ ಒದಗಿಸಲು ‘ಪ್ರತಿಬಿಂಬ’ ವೇದಿಕೆಯಾಗಲಿದೆ. ಆಂಧ್ರ ಪ್ರದೇಶ ಸರ್ಕಾರ ಈಗಾಗಲೇ ಈ ರೀತಿಯ ಮಾಹಿತಿ ಕೋಶ ಆರಂಭಿಸಿದೆ.

“ಪ್ರತಿಬಿಂಬ’ದ ವಿವರ
ರಾಜ್ಯ ಸರ್ಕಾರದ ಯೋಜನೆ, ಕಾರ್ಯಕ್ರಮಗಳ ಜಾರಿ ಹಾಗೂ ನೀಡಿದ ಭರವಸೆಗಳ ಅನುಷ್ಠಾನ, ಪ್ರಮುಖ ಇಲಾಖೆಗಳ ಮಾಸಿಕವಾರು ಪ್ರಗತಿ ಬಗ್ಗೆ ವಿವರ ನೀಡುವ ಮುಖ್ಯಮಂತ್ರಿಗಳ ಮಾಹಿತಿ ಕೋಶ “ಪ್ರತಿಬಿಂಬ’ ರೂಪುಗೊಂಡಿದೆ.

ರಾಜ್ಯದ ಪ್ರಗತಿ ಪಥದ ಮೈಲುಗಲ್ಲುಗಳ ಮಾಹಿತಿ ಬಿಂಬಿಸುವ ಹಾಗೂ ಅಭಿವೃದ್ಧಿಯ ಚಿತ್ರಣ ನೀಡುವ ಉದ್ದೇಶದಿಂದ ರಾಜ್ಯ ಸರ್ಕಾರವೇ ಅಧಿಕೃತವಾಗಿ ಮಾಹಿತಿ ಕೋಶಕ್ಕೆ ಚಾಲನೆ ನೀಡಿದೆ. ಸರ್ಕಾರದ ಪ್ರಮುಖ ಯೋಜನೆ, ಮಹತ್ವದ ಕಾರ್ಯಕ್ರಮಗಳ ಮಾಹಿತಿಯನ್ನು ತ್ವರಿತ ಹಾಗೂ ನಿಖರವಾಗಿ ನೀಡಲಿದೆ. ಇದರಿಂದ ಸರ್ಕಾರದ ಪ್ರಗತಿ ಪರಿಶೀಲನೆಗೆ ಅನುಕೂಲವಾಗಲಿದೆ.