ನಗರದ ವಿವಿಧೆಡೆ ಇಂದು ರಾಜ್ಯೋತ್ಸವ ಸಂಭ್ರಮ

ಬೆಂಗಳೂರು: ರಾಜ್ಯೋತ್ಸವಕ್ಕೆ ನಗರದಲ್ಲಿ ವಿವಿಧ ಸಂಘ ಸಂಸ್ಥೆಗಳು ವಿಶೇಷ ಕಾರ್ಯಕ್ರಮಗಳ ಆಯೋಜನೆ ಮಾಡುವ ಜತೆಗೆ ವಿಭಿನ್ನವಾಗಿ ರಾಜ್ಯೋತ್ಸವ ಆಚರಿಸಿ ಗಮನ ಸೆಳೆಯಲು ಸಜ್ಜಾಗಿವೆ.

ಸರಿಗಮಪ ಇಂಡಿಯಾ ಸಂಸ್ಥೆ ನ.1ರಂದು ಕನ್ನಡ ರಾಜ್ಯೋತ್ಸವ ಆಚರಣೆಯನ್ನು ವಿಶಿಷ್ಟ ಹಾಗೂ ವಿಭಿನ್ನವಾಗಿ ಆಚರಿಸಲು ಮುಂದಾಗಿದ್ದು, “ದೂರದಿಂದ ಬಂದಂತ ಸುಂದರಾಂಗ ಜಾಣ’ ಆಡಿಯೋ-ವೀಡಿಯೋ ರೆಟ್ರೊರೀ ಮಿಕ್ಸಿ ಅನಾವರಣಕ್ಕೆ ಸಜ್ಜಾಗಿದೆ. ಈ ಆಡಿಯೋ ವೀಡಿಯೋ ಮೂಲಕ ಫಿಟ್‌ನೆಸ್‌ ಎಕ್ಸ್‌ಫ‌ರ್ಟ್‌ ವನಿತಾ ಅಶೋಕ್‌ ಕನ್ನಡಿಗರಲ್ಲಿ ಕನ್ನಡ ಜಾಗೃತಿ ಮೂಡಿಸಲು ಹೊರಟಿದ್ದಾರೆ. 

ಸಪ್ನ ಸುವರ್ಣ ಸಂಭ್ರಮ: ಸಪ್ನ ಬುಕ್‌ಹೌಸ್‌ ಪುಸ್ತಕ ಜಗತ್ತಿಗೆ ಪರಿಚಯವಾಗಿ 50 ವರ್ಷಗಳ ಸೇವೆ ಸಲ್ಲಿಸಿದ ಶುಭ ಸಂದರ್ಭದಲ್ಲಿ ಜತೆಗೆ ಕನ್ನಡ ರಾಜ್ಯೋತ್ಸವದ ಸಂದರ್ಭದಲ್ಲಿ, ಕನ್ನಡದ 50 ಪುಸ್ತಕಗಳ ಲೋಕಾರ್ಪಣೆಗಾಗಿ ಇಂದು ಜ್ಞಾನಪೀಠ ಪುರಸ್ಕೃತ ಚಂದ್ರಶೇಖರ ಕಂಬಾರ ಅವರ ಅಧ್ಯಕ್ಷತೆಯಲ್ಲಿ ಗಾಂಧಿ ಸ್ಮಾರಕ ನಿಧಿ ಭವನದಲ್ಲಿ ಕಾರ್ಯಕ್ರಮ ಹಮ್ಮಿಕೊಂಡಿದೆ. ಜತೆಗೆ ಈ ಸಂಸ್ಥೆಯು ಕನ್ನಡದ ಭಾಗ್ಯವನ್ನು ಬೆಳೆಸುತ್ತಿರುವ 50 ಮಂದಿ ಸಾಹಿತಿಗಳು ಮತ್ತು ಲೇಖಕರಿಗೆ ಸನ್ಮಾನಿಸಿ ಗೌರವಿಸುತ್ತಿದೆ. 

ರಾಜ್ಯೋತ್ಸವ ಪ್ರಶಸ್ತಿ: ರಾಜ್ಯ ಸರ್ಕಾರ ಬುಧವಾರ ಸಂಜೆ 5ಕ್ಕೆ ರವೀಂದ್ರ ಕಲಾಕ್ಷೇತ್ರದಲ್ಲಿ ಹಮ್ಮಿಕೊಂಡಿರುವ ರಾಜ್ಯೋತ್ಸವ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಹಿರಿಯ ಸಾಹಿತಿ ವೈದೇಹಿ, ಮುಖ್ಯಮಂತ್ರಿ ಚಂದ್ರು, ಹಿರಿಯ ಗಾಯಕ ಯೇಸುದಾಸ್‌ ಸೇರಿದಂತೆ 62 ಮಂದಿ ಸಾಧಕರಿಗೆ ರಾಜ್ಯೋತ್ಸವ ಪುರಸ್ಕಾರ ಪ್ರದಾನ ಮಾಡಲಿದೆ. ಈ ಮೂಲಕ ಕನ್ನಡ ನಾಡನ್ನು ಸಾಂಸ್ಕೃತಿಕವಾಗಿ, ಕಲಾತ್ಮಕವಾಗಿ ರೂಪಿಸುವಲ್ಲಿ ಶ್ರಮಿಸಿದವರಿಗೆ ಗೌರವಿಸುತ್ತಿದೆ. 

ಕನ್ನಡ ಕ್ರೀಡಾ ಚಾನಲ್‌: ಇದೇ ಮೊದಲ ಬಾರಿಗೆ ಸ್ಟಾರ್‌ನ್ಪೋಟ್ಸ್‌ ಕನ್ನಡ ಕ್ರೀಡಾ ಚಾನಲ್‌ ನ.1ರಂದು ಆರಂಭವಾಗುತ್ತಿದೆ. ಇದುವರೆಗೂ ವಿವಿಧ ಕ್ರೀಡೆಗಳ ಇಂಗ್ಲೀಷ್‌ ವೀಕ್ಷಕ ವಿವರಣೆ ಕೇಳಿದ್ದ ನಾವು, ಇನ್ನು ಮುಂದೆ ಕನ್ನಡದಲ್ಲಿ ವೀಕ್ಷಕ ವಿವರಣೆ ಕೇಳುವಂತಾಗಲಿದೆ.

ವಿವಿಧ ಕಾರ್ಯಕ್ರಮಗಳು: ರಾಜ್ಯೋತ್ಸವ ಅಂಗವಾಗಿ ಬಸವನಗುಡಿಯ ಕಹಳೆ ಬಂಡೆ ಉದ್ಯಾನದಲ್ಲಿ ಡಿವಿಜಿ ಪುತ್ಥಳಿಗೆ ಮಾಲಾರ್ಪಣೆ, ಗೀತ ಗಾಯನ ಮತ್ತು ನುಡಿನಮನ ನಡೆಯಲಿದೆ. 62ನೇ ರಾಜ್ಯೋತ್ಸವ ಸಮಾರಂಭದ ಪ್ರಯುಕ್ತ ಮುಖ್ಯಮಂತ್ರಿ ಸಿದ್ದರಾಮಯ್ಯ ವಿಧಾನಸೌಧದ ಬ್ಯಾಂಕ್ವೆಟ್‌ ಹಾಲ್‌ನಲ್ಲಿ ಸಂತೋಷ ಕೂಟ ಏರ್ಪಡಿಸಿದ್ದಾರೆ.

ಅಂಚೆ ಕಚೇರಿಯಿಂದ ಜಿಪಿಒ ಕಟ್ಟಡದಲ್ಲಿ ಬೆಳಗ್ಗೆ 11ಕ್ಕೆ ಕವಿ ಮುದ್ದಣ, ಆದಿಕವಿ ನನ್ನಯ ಮತ್ತು ದ್ರಾಕ್ಷಾರಾಮಂ ಭಿಮೇಶ್ವರ ದೇವಸ್ಥಾನದ ಅಂಚೆ ಚೀಟಿ ಬಿಡುಗಡೆ ಮಾಡಲಾಗುತ್ತಿದೆ.  ಕರುನಾಡ ಗೆಳೆಯರು ಸಂಸ್ಥೆಯಿಂದ ರಾಜ್ಯೋತ್ಸವ ಅಂಗವಾಗಿ ಚಿತ್ರಕಲಾ ಪ್ರದರ್ಶನ ಹಾಗೂ ಜನರಿಗೆ ಕನ್ನಡ ಪುಸ್ತಕದ ಬಗ್ಗೆ ಅರಿವು ಮೂಡಿಸುವ ಸಲುವಾಗಿ ಕನ್ನಡ ಪುಸ್ತಕಗಳ ಪ್ರದರ್ಶನವಿದೆ.

ಜತೆಗೆ ವಾಹನಗಳಿಗೆ ಉಚಿತವಾಗಿ ಕರ್ನಾಟಕದ ನಕ್ಷೆಯನ್ನು ಅಂಟಿಸುವ ಸಮಾರಂಭವೂ ನಡೆಯಲಿದೆ. ಉದಯಭಾನು ಕಲಾಸಂಘದಿಂದ ಬೆಳಗ್ಗೆ 9ಕ್ಕೆ ಕನ್ನಡ ಧ್ವಜಾರೋಹಣ ಸಹಿತ ವಿದ್ಯಾರ್ಥಿಗಳಿಂದ ಸಾಂಸ್ಕೃತಿಕ ಕಾರ್ಯಕ್ರಮ ಇದೆ. ಕನ್ನಡ ಸಾಹಿತ್ಯ ಪರಿಷತ್ತು ಕೇಂದ್ರ ಕಚೇರಿ ಸೇರಿದಂತೆ 28 ವಿಧಾನಸಭಾ ಕ್ಷೇತ್ರಗಳ ಕಸಾಪ ಘಟಕಗಳಲ್ಲಿ ಕನ್ನಡ ಧ್ವಜಾರೋಹಣ ಮತ್ತು ವಿವಿಧ ಕಾರ್ಯಕ್ರಮ, ಸಿಹಿ ವಿತರಣೆ ಆಯೋಜಿಸಲಾಗಿದೆ.