ಈ ಹಿಂದೆ “ಫ‌ಸ್ಟ್‌ Rank ರಾಜು’ ಚಿತ್ರದ ಮೂಲಕ ಹೆಸರಾಗಿದ್ದ ಗುರುನಂದನ್‌ ಮುಖ್ಯಭೂಮಿಕೆಯಲ್ಲಿರುವ ಚಿತ್ರ “ರಾಜು ಕನ್ನಡ ಮೀಡಿಯಂ’. ಈ ಚಿತ್ರದಲ್ಲಿ ಸುದೀಪ್‌ ಅವರೂ ಒಂದು ಪಾತ್ರ ನಿರ್ವಹಿಸಿ ಹೊಸಬರ ತಂಡಕ್ಕೆ ಉತ್ತೇಜನ ನೀಡುತ್ತಿದ್ದಾರೆ.
ಸುದೀಪ್‌ ಅಭಿನಯದ ಚಿತ್ರೀಕರಣ ನಿನ್ನೆ ಈಗಲ್ಟನ್‌ ರೆಸಾರ್ಟಿನಲ್ಲಿ ನಿಗಧಿಯಾಗಿತ್ತು. ಇಡೀ ಚಿತ್ರತಂಡವೇ ಉತ್ಸಾಹದಿಂದ ರೆಡಿಯಾಗಿ ರೆಸಾರ್ಟಿನ ಆವರಣದಲ್ಲಿ ನೆರೆದಿತ್ತು. ಹನ್ನೊಂದು ಘಂಟೆ ಹೊತ್ತಿಗೆಲ್ಲಾ ಸುದೀಪ್‌ ಕೂಡಾ ಅಲ್ಲಿಗೆ ಹಾಜರಾಗಿದ್ದರು. ಆದರೆ, ಆ ಹೊತ್ತಿಗೆಲ್ಲಾ ಐಟಿ ಅಧಿಕಾರಿಗಳು ಈಗಲ್ಟನ್‌ ರೆಸಾರ್ಟಿನಲ್ಲಿ ಪರಿಶೀಲನೆ ನಡೆಸುತ್ತಿದ್ದರು. ಆದ ಕಾರಣ ಚಿತ್ರ ತಂಡ ಏನೇ ಪ್ರಯತ್ನ ಪಟ್ಟರೂ ಕೂಡಾ ಒಂದು ಘಂಟೆ ಕಾಲ ಸುದೀಪ್‌ ಸೇರಿದಂತೆ ಯಾರನ್ನೂ ಒಳ ಬಿಟ್ಟಿರಲಿಲ್ಲ.
ಕಡೆಗೆ ಚಿತ್ರ ತಂಡ ಬಿಡದಿ ಪೊಲೀಸರ ಸಹಕಾರದೊಂದಿಗೆ ಈಗಲ್ಟನ್‌ ರೆಸಾರ್ಟ್‌ ಒಳಗಿರೋ ಗಾಲ್ಫ್ ಮೈದಾನದಲ್ಲಿ ಚಿತ್ರೀಕರಣ ಆರಂಭಿಸಿತ್ತು. ಇಷ್ಟೆಲ್ಲ ಆಗುವವರೆಗೂ ತಾಳ್ಮೆಯಿಂದ ಕಾದು ನಂತರ ಸರಿರಾತ್ರಿ ಒಂದು ಘಂಟೆಯವರೆಗೂ ಸುದೀಪ್‌ ಉತ್ಸಾಗದಿಂದ ಚಿತ್ರೀಕರಣದಲ್ಲಿ ಭಾಗಿಯಾಗಿದ್ದರು.
“ರಾಜು ಕನ್ನಡ ಮೀಡಿಯಂ’ ಚಿತ್ರದಲ್ಲಿ ಗುರುನಂದನ್‌, ಆಶಿಕಾ, ಆವಂತಿಕಾ ಶೆಟ್ಟಿ ಮುಂತಾದವರು ನಟಿಸಿದ್ದು, ಆ್ಯಂಜಲೀನಾ ಎಂಬ ರಷ್ಯದ ಮಾಡೆಲ್‌ ನಟಿಸಿರುವುದು ವಿಶೇಷ. ಜೊತೆಗೆ, “ಬಿಗ್‌ ಬಾಸ್‌ ಸೀಸನ್‌-4′ ವಿನ್ನರ್‌ ಪ್ರಥಮ್‌ ಕೂಡಾ ಅತಿಥಿ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಅಂದಹಾಗೆ, ಈ ಚಿತ್ರವನ್ನು ನರೇಶ್‌ ಕುಮಾರ್‌ ನಿರ್ದೇಶನ ಮಾಡುತ್ತಿದ್ದಾರೆ. ಈ ಹಿಂದೆ “ಫ‌ಸ್ಟ್‌ Rank ರಾಜು’ ಸಿನಿಮಾ ಮೂಲಕ ಗಾಂಧಿನಗರದಲ್ಲಿ ಸುದ್ದಿಯಾದ ನರೇಶ್‌ ಈಗ ಮತ್ತೂಮ್ಮೆ ಗುರುನಂದನ್‌ ಜೊತೆಗೆ ಸಿನಿಮಾ ಮಾಡಿದ್ದಾರೆ. ಚಿತ್ರಕ್ಕೆ ಕಥೆ, ಚಿತ್ರಕಥೆ ಮತ್ತು ಸಂಭಾಷಣೆ ಅವರದ್ದೇ. ಇನ್ನು ಕಿರಣ್‌ ರವೀಂದ್ರನಾಥ್‌ ಸಂಗೀತ, ಶೇಖರ್‌ ಚಂದ್ರ ಛಾಯಾಗ್ರಹಣವಿದೆ.
