ರಾಜಸ್ಥಾನ: ದುಷ್ಕರ್ಮಿಗಳಿಂದ ಜೀಪಿಗೆ ಬೆಂಕಿ; ತಹಶೀಲ್ದಾರ್‌ ಪಾರು

ಜೈಪುರ : ರಾಜಸ್ಥಾನದ ಸಿಕಾರ್‌ ಜಿಲ್ಲೆಯಲ್ಲಿ ಉದ್ರಿಕ್ತ ಜನರ ಗುಂಪೊಂದು ತಹಶೀಲ್ದಾರರ ಅಧಿಕೃತ ಜೀಪಿಗೆ ಬೆಂಕಿ ಹಚ್ಚಿ ಸುಟ್ಟ ಘಟನೆ ವರದಿಯಾಗಿದೆ. 

ಈಚೆಗೆ ಹತನಾದ ಗ್ಯಾಂಗ್‌ ಸ್ಟರ್‌ ಆನಂದಪಾಲ್‌ ಸಿಂಗ್‌ ಎಂಬಾತನ ಶಂಕಿತ ಬೆಂಬಲಿಗರು ದುಜೋಡ್‌ ಪ್ರದೇಶದಲ್ಲಿ ರಸ್ತೆಗೆ ತಡೆಯೊಡ್ಡಿದ್ದರು. ಧೋಡ್‌ ತಾಲೂಕಿನ ತಹಶೀಲ್ದಾರ್‌ ಅಶೋಕ್‌ ರಿನ್ವಾ ಅವರು ಆ ಮಾರ್ಗದಲ್ಲಿ ಬಂದಾಗ ರಸ್ತೆ ತಡೆ ಇರುವುದನ್ನು ಕಂಡರು.  

ಜೀಪಿನಿಂದ ಕೆಳಗಿಳಿದು ಜನರೊಡನೆ ವಿಷಯವೇನೆಂದು ತಿಳಿಯಲು ತಹಶೀಲ್ದಾರ್‌ ಮುಂದಾದರು. ಆಗ ಕೆಲವು ದುಷ್ಕರ್ಮಿಗಳು ಅವರ ಜೀಪಿಗೆ ಬೆಂಕಿ ಹಚ್ಚಿದರು. ತಹಶೀಲ್ದಾರ್‌ ರಿನ್ವಾ ಅವರು ಈ ಘಟನೆಯಲ್ಲಿ ಯಾವುದೇ ಗಾಯಗಳಿಲ್ಲದೆ ಪಾರಾದರು ಎಂದು ಪೊಲೀಸರು ತಿಳಿಸಿದ್ದಾರೆ. 

ರಸ್ತೆ ತಡೆಯನ್ನು ತೆರವುಗೊಳಿಸಿ ವಾಹನ ಸಂಚಾರವನ್ನು ಸುಗಮಗೊಳಿಸಲಾಗಿದೆ; ಜೀಪಿಗೆ ಬೆಂಕಿ ಹಚ್ಚಿದ ದುಷ್ಕರ್ಮಿಗಳನ್ನು ಗುರುತಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.