“ಮತ್ತೆ ಮಳೆಯಾಗಿದೆ”: ಫೈನಲ್ ಟೆಸ್ಟ್ ಗೆ ವರುಣನ ಕಾಟ, ಆರಂಭವಾಗದ ನಾಲ್ಕನೇ ದಿನದಾಟ

ಸೌಥಂಪ್ಟನ್: ವಿಶ್ವ ಟೆಸ್ಟ್ ಚಾಂಪಿಯನ್ ಶಿಪ್ ಫೈನಲ್ ಪಂದ್ಯಕ್ಕೆ ಮಳೆ ಮತ್ತೆ ಮತ್ತೆ ಕಾಡುತ್ತಿದೆ. ಸೌಥಂಪ್ಟನ್ ನಲ್ಲಿ ಮಳೆಯಾಗುತ್ತಿದ್ದು,  ನಾಲ್ಕನೇ ದಿನದಾಟ ಆರಂಭವಾಗುವುದು ತಡವಾಗಲಿದೆ.

ಮೂರನೇ ದಿನದ ಅಂತ್ಯಕ್ಕೆ ನ್ಯೂಜಿಲ್ಯಾಂಡ್ ತಂಡ ಎರಡು ವಿಕೆಟ್ ನಷ್ಟಕ್ಕೆ 101 ರನ್ ಗಳಿಸಿದೆ. ಈಗಾಗಲೇ ಮೊದಲ ದಿನ ಮಳೆಯಿಂದಾಗಿ ಸಂಪೂರ್ಣವಾಗಿ ರದ್ದಾಗಿತ್ತು. ಹೀಗಾಗಿ ಹೆಚ್ಚುವರಿ ದಿನವನ್ನು ಅಳವಡಿಸಲಾಗಿದೆ. ಆದರೆ ಎರಡನೇ ದಿನ ಮತ್ತು ಮೂರನೇ ದಿನದಲ್ಲೂ ಮಂದ ಬೆಳಕಿನ ಕಾರಣ ಹೆಚ್ಚಿನ ಆಟ ನಡೆದಿರಲಿಲ್ಲ. ಇದೀಗ ನಾಲ್ಕನೇ ದಿನವೂ ಮಳೆ ಕಾಟ ಕೊಟ್ಟಿದೆ.

ಸೌಥಂಪ್ಟನ್ ನಲ್ಲಿ ಇನ್ನೂ ಮಳೆಯಾಗುತ್ತಿದ್ದು, ಪಿಚ್ ಗೆ ಕವರ್ ಹೊದಿಸಲಾಗಿದೆ. ಸದ್ಯದ ಮಾಹಿತಿಯ ಪ್ರಕಾರ ಮೊದಲ ಸೆಶನ್ ನ ಪಂದ್ಯ ನಡೆಯುವುದು ಅನುಮಾನವಾಗಿದೆ.

ಇದನ್ನೂ ಓದಿ:ಫೈನಲ್ ಟೆಸ್ಟ್: ವಿರಾಟ್ ವಿಕೆಟ್ ನಮಗೆ ದೊಡ್ಡ ತಿರುವು ನೀಡಿತು ಎಂದ ಜ್ಯಾಮಿಸನ್

ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ್ದ ಭಾರತ ತಂಡ 217 ರನ್ ಗಳಿಸಿತ್ತು. ಅಜಿಂಕ್ಯ ರಹಾನೆ 49 ರನ್ ಮತ್ತು ವಿರಾಟ್ ಕೊಹ್ಲಿ 44 ರನ್ ಗಳಿಸಿದ್ದರು. ಕಿವೀಸ್ ಪರ ವೇಗಿ ಕೈಲ್ ಜ್ಯಾಮಿಸನ್ ಐದು ವಿಕೆಟ್ ಪಡೆದಿದ್ದರು.

ಬ್ಯಾಟಿಂಗ್ ಆರಂಭಿಸಿದ್ದ ಕಿವೀಸ್ ಗೆ ಡೆವೋನ್ ಕಾನ್ವೆ ಮತ್ತು ಲಾಥಂ ಉತ್ತಮ ಆರಂಭ ಒದಗಿಸಿದ್ದರು. ಕಾನ್ವೇ ಅರ್ಧಶತಕ ಬಾರಿಸಿದ್ದರು. ಸದ್ಯ ನಾಯಕ ವಿಲಿಯಮ್ಸನ್ ಮತ್ತು ರಾಸ್ ಟೇಲರ್ ಅಜೇಯರಾಗಿದ್ದಾರೆ.