ತಿರುವನಂತಪುರ : ಕೇರಳದ ಬಹುಭಾಷಾ ನಟಿಯನ್ನು ಅಪಹರಿಸಿ ಲೈಂಗಿಕ ಕಿರುಕುಳ ನೀಡಿದ ಪ್ರಕರಣದ ಮಾಸ್ಟರ್‌ ಮೈಂಡ್‌ ಪಲ್ಸರ್‌ ಸುನಿಲ್‌, ಕಾರಿನಲ್ಲಿ ಆಕೆಗೆ ಲೈಂಗಿಕ ಕಿರುಕುಳ ನೀಡುವಾಗಿನ ವಿಡಿಯೋ ಹಾಗೂ ಹಲವಾರು ಚಿತ್ರಗಳನ್ನು ತನ್ನ ಸ್ಮಾರ್ಟ್‌ ಫೋನ್‌ನಲ್ಲಿ ಸೆರೆ ಹಿಡಿದಿದ್ದು ಅವುಗಳನ್ನು ಆತ ತನ್ನ ಸ್ನೇಹಿತರಿಗೆ ತೋರಿಸಿದ್ದಾನೆ ಎಂದು ಕೇರಳ ಪೊಲೀಸರನ್ನು ಉಲ್ಲೇಖೀಸಿ ಸ್ಥಳೀಯ ಮೂಲಗಳು ಹೇಳಿರುವುದಾಗಿ ಟಿವಿ ವರದಿಗಳು ಹೇಳಿವೆ.
ಮಲಯಾಳಂ ಚಿತ್ರ ನಟಿಯ ಅಪಹರಣ, ಲೈಂಗಿಕ ಕಿರುಕುಳ ಘಟನೆಯ ಬಳಿಕ ಹಲವು ದಿನಗಳ ಕಾಲ ತಲೆಮರೆಸಿಕೊಂಡಿದ್ದ ಪಲ್ಸರ್‌ ಸುನಿ, ಆ ದಿನಗಳಲ್ಲಿ ತನ್ನ ಸ್ನೇಹಿತ ಮನು ಎಂಬಾತನನ್ನು ಹಾಗೂ ಅಮಬಲಪ್ಪುಳದಲ್ಲಿನ ಮತ್ತೋರ್ವ ಸ್ನೇಹಿತನನ್ನು ಭೇಟಿಯಾಗಿ ಅವರಿಗೆ ನಟಿಗೆ ಲೈಂಗಿಕ ಕಿರುಕುಳ ನೀಡುತ್ತಿರುವಾಗಿನ ವಿಡಿಯೋ ಹಾಗೂ ಚಿತ್ರಗಳನ್ನು ತೋರಿಸಿದ್ದಾನೆ ಎನ್ನಲಾಗಿದೆ.
ಆದರೆ ದುರದೃಷ್ಟವಶಾತ್‌ ಕೇರಳ ಪೊಲೀಸರಿಗೆ ಪಲ್ಸರ್‌ ಸುನಿಲ್‌ನ ಈ ಸ್ಮಾರ್ಟ್‌ ಫೋನ್‌ ಇನ್ನೂ ಸಿಕ್ಕಿಲ್ಲ. ನ್ಯಾಯಾಲಯಕ್ಕೆ ಶರಣಾಗುವ ಮುನ್ನ ತಾನು ಆ ಸ್ಮಾರ್ಟ್‌ ಫೋನನ್ನು ಗೋಶ್ರೀ ಸೇತುವೆಯ ಕೆಳಕ್ಕೆ ಎಸೆದಿದ್ದೆ ಎಂದು ಪಲ್ಸರ್‌ ಸುನಿಲ್‌ ಪೊಲೀಸರಲ್ಲಿ ಹೇಳಿದ್ದ. ಆ ಪ್ರಕಾರ ಅವರು ನೌಕಾಪಡೆಯ ಮುಳುಗು ತಜ್ಞರ ಸಹಾಯ ಪಡೆದು ನದಿಯಲ್ಲಿ ಸ್ಮಾರ್ಟ್‌ ಫೋನಿಗಾಗಿ ಹುಡುಕಾಡಿಸಿದ್ದರು.
ಆ ಬಳಿಕ ಪಲ್ಸರ್‌ ಸುನಿಲ್‌ ತಾನು ಆ ಸ್ಮಾರ್ಟ್‌ ಫೋನನ್ನು ಬೇರೆಲ್ಲೋ ಒಂದು ಕಡೆ ಎಸದಿದ್ದೇನೆ ಎಂದಿದ್ದ. ಆ ಸ್ಥಳದಲ್ಲೂ ಹುಡುಕಾಟ ನಡೆಸಿದ ಪೊಲೀಸರಿಗೆ ಏನೂ ಸಿಗಲಿಲ್ಲ. ಆ ಸ್ಮಾರ್ಟ್‌ ಫೋನ್‌ ಪೊಲೀಸರಿಗೆ, ಪಲ್ಸರ್‌ ಸುನಿಲ್‌ ವಿರುದ್ಧದ ಸಾಕ್ಷ್ಯಕ್ಕೆ ಅತೀ ಅಗತ್ಯವಾಗಿದೆ.
ಪಲ್ಸರ್‌ ಸುನಿಲ್‌ಗೆ ಮಹಿಳೆಯರನ್ನು ದುಬೈಗೆ ಕಳ್ಳಸಾಗಾಟ ಮಾಡುವ ಜಾಲವೂ ಇದೆ; ಆ ನಿಟ್ಟಿನಲ್ಲಿಯೂ ತನಿಖೆ ನಡೆಸಬೇಕು ಎಂದು ಈ ನಡುವೆ ಶಾಸಕ ಪಿ ಟಿ ಥಾಮಸ್‌ ಪೊಲೀಸರನ್ನು ಆಗ್ರಹಿಸಿದ್ದಾರೆ. ಪಲ್ಸರ್‌ ಸುನಿಲ್‌ ಬಳಿ ಮೂರು ನಕಲಿ ಪಾಸ್‌ ಪೋರ್ಟ್‌ಗಳಿದ್ದು ಆತ ಅವುಗಳನ್ನು ಬಳಸಿ ನಾಲ್ಕು ಬಾರಿ ದುಬೈಗೆ ಹೋಗಿ ಬಂದಿರುವುದು ಪತ್ತೆಯಾಗಿದೆ. ಸಿನೆಮಾದಲ್ಲಿ ಅವಕಾಶಕ್ಕಾಗಿ ತೀವ್ರವಾಗಿ ಹಂಬಲಿಸುವ ಹುಡುಗಿಯರನ್ನು ಬುಟ್ಟಿಗೆ ಹಾಕಿಕೊಂಡು, ಬ್ಲಾಕ್‌ ಮೇಲ್‌ ಮಾಡಿ, ಬಳಿಕ ಅವರನ್ನು ಉಪಾಯದಿಂದ ದುಬೈಗೆ ಕಳ್ಳಸಾಗಣೆ ಮಾಡುವಲ್ಲಿಯೂ ಪಲ್ಸರ್‌ ಸುನಿಲ್‌ ಅಗ್ರಗಣ್ಯನಾಗಿದ್ದ ಎಂಬುದನ್ನು ಪೊಲೀಸರು ಕಂಡುಕೊಂಡಿದ್ದಾರೆ.
ದುಬೈಯಲ್ಲಿ ಸೆಕ್ಸ್‌ ರಾಕೆಟ್‌ ನಡೆಸುತ್ತಿದ್ದ ಸುನೀಲ್‌ ಸುರೇಂದ್ರನ್‌ ಎಂಬ ವ್ಯಕ್ತಿ ಇದೇ ಪಲ್ಸರ್‌ ಸುನಿಲ್‌ ಇರಬಹುದೇ ಎಂಬ ಗುಮಾನಿ ಈಗ ಪೊಲೀಸರಿಗೆ ಇದೆ. ಸುನೀಲ್‌ ಸುರೇಂದ್ರನ್‌ ನ ದುಬೈ ಸೆಕ್ಸ್‌ ರಾಕೆಟ್‌ ಬಗ್ಗೆ ಸಿಬಿಐ ತನಿಖೆ ಈಗಲೂ ಜಾರಿಯಲ್ಲಿದೆ.
