ಪ್ರಿಯಾಂಕಾ ಹೊಸ ಚಿತ್ರ ಸೆಕೆಂಡ್‌ ಹಾಫ್

“ಮಮ್ಮಿ – ಸೇವ್‌ ಮಿ’ ಚಿತ್ರದ ನಂತರ ಪ್ರಿಯಾಂಕಾ ಉಪೇಂದ್ರ ಯಾವ ಸಿನಿಮಾ ಮಾಡುತ್ತಾರೆ ಎಂಬ ಕುತೂಹಲ ಎಲ್ಲರಿಗೂ ಇತ್ತು. ಆ ಚಿತ್ರವನ್ನು ನಿರ್ದೇಶಿಸಿದ ಲೋಹಿತ್‌ ನಿರ್ದೇಶನದಲ್ಲೇ ಇನ್ನೊಂದು ಸಿನಿಮಾ ಮಾಡಬಹುದು ಎಂಬ ಸುದ್ದಿ ಇತ್ತು. ಆದರೆ, ಅದಕ್ಕೂ ಮುನ್ನ ಪ್ರಿಯಾಂಕಾ ಅಭಿನಯದ ಇನ್ನೊಂದು ಚಿತ್ರ ಶುರುವಾಗಿದೆ.

ಅದೇ “ಸೆಕೆಂಡ್‌ ಹಾಫ್’. ವಿಶೇಷವೆಂದರೆ, ಈ ಚಿತ್ರದಲ್ಲಿ ಪ್ರಿಯಾಂಕಾ ಉಪೇಂದ್ರ ಪೊಲೀಸ್‌ ಪೇದೆಯಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. “ಸೆಕೆಂಡ್‌ ಹಾಫ್’ ಚಿತ್ರಕ್ಕೆ “ಫ‌ಸ್ಟ್‌ ಹಾಫ್’ ಎಂಬ ಸಬ್‌-ಟೈಟಲ್‌ ಸಹ ಇದೆ. ಅದೇನು, ಇದೇನು ಎಂಬ ಗೊಂದಲ ಸಹಜ. ಅದನ್ನು ಚಿತ್ರದಲ್ಲೇ ನೋಡಬೇಕು.

ಈ ಚಿತ್ರವನ್ನು ಯೋಗಿ ದೇವಗಂಗೆ ಕಥೆ ಬರೆದು ನಿರ್ದೇಶಿಸಿದರೆ, ಬೃಂದಾವನ್‌ ಎಂಟರ್‌ಪ್ರೈಸಸ್‌ ಲಾಂಛನದಲ್ಲಿ ನಾಗೇಶ್‌ ಕುಮಾರ್‌ ನಿರ್ಮಿಸುತ್ತಿದ್ದಾರೆ. ಇನ್ನು ಶಿವಕುಮಾರ್‌ ಅವರ ಛಾಯಾಗ್ರಹಣ ಮತ್ತು ಚೇತನ್‌ ಅವರ ಸಂಗೀತ ನಿರ್ದೇಶನವಿದೆ. ಪ್ರಿಯಾಂಕಾ ಜೊತೆಗೆ ಇನ್ನೂ ಯಾರ್ಯಾರು ನಟಿಸುತ್ತಿದ್ದಾರೆ ಮತ್ತು ಬೇರೆ ಯಾವ ತಂತ್ರಜ್ಞರು ಇರಲಿದ್ದಾರೆ ಎಂಬ ಮಾಹಿತಿ ಇನ್ನಷ್ಟೇ ಹೊರಬೀಳಬೇಕಿದೆ.