ಭಾರತದೊಂದಿಗೆ ಉಂಟಾಗಿದ್ದ ಯುದ್ಧ ಸನ್ನಿವೇಶವನ್ನು ಪಾಕ್‌ ಪ್ರಧಾನಿ ಇಮ್ರಾನ್‌ ಖಾನ್‌ ನಿವಾರಿಸಿದ್ದಾರೆ. ಹೀಗಾಗಿ ಅವರಿಗೆ ನೊಬೆಲ್‌ ಶಾಂತಿ ಪ್ರಶಸ್ತಿ ನೀಡಿ ಪುರಸ್ಕರಿಸಬೇಕು! ಹೀಗೆಂದು ಪಾಕಿಸ್ಥಾನದ ಸಂಸತ್ತಿನಲ್ಲಿ ನಿಲುವಳಿ ಮಂಡಿಸಲಾಗಿದೆ. ಅಭಿನಂದನ್‌ ಬಿಡುಗಡೆಯಿಂದಾಗಿ ಭಾರತ- ಪಾಕಿಸ್ಥಾನದ ಮಧ್ಯೆ ಉಂಟಾಗಿದ್ದ ಉದ್ವಿಗ್ನ ಪರಿಸ್ಥಿತಿ ನಿವಾರಣೆಯಾಗಿದೆ. ಖಾನ್‌ ಜವಾಬ್ದಾರಿಯುತವಾಗಿ ನಡೆದುಕೊಂಡಿದ್ದಾರೆ. ಹೀಗಾಗಿ ಅವರಿಗೆ ನೊಬೆಲ್‌ ಶಾಂತಿ ಪ್ರಶಸ್ತಿ ಸಿಗಬೇಕು ಎಂದು ಮಾಹಿತಿ ಸಚಿವ ಫ‌ವಾದ್‌ ಚೌಧರಿ ಹೇಳಿದ್ದಾರೆ. ಸೋಮವಾರ ಸಂಸತ್‌ನಲ್ಲಿ ಈ ನಿಲುವಳಿ ಅಂಗೀಕಾರವಾಗುವ ಸಾಧ್ಯತೆಯಿದೆ. ಆದರೆ ವಿಪಕ್ಷಗಳು ಬೆಂಬಲಿಸುತ್ತವೆಯೇ ಎಂಬುದು ಕುತೂಹಲದ ಸಂಗತಿ. “ಖಾನ್‌ಗೆ ನೊಬೆಲ್‌ ಶಾಂತಿ ಪ್ರಶಸ್ತಿ ಪುರಸ್ಕರಿಸಲಿ. ಆದರೆ ಪಾಕ್‌ನ ಉಗ್ರರ ಬಗ್ಗೆಯೂ ಎಚ್ಚರವಿರಲಿ’ ಎಂದು ಬಿಜೆಪಿ ವಕ್ತಾರ ರಾಮ್‌ ಮಾಧವ್‌ ಹೇಳಿದ್ದಾರೆ.
