ಮೋದಿಗೆ ‘ಸಿಯೋಲ್‌ ಶಾಂತಿ ಪ್ರಶಸ್ತಿ’

ಹೊಸದಿಲ್ಲಿ: ದಕ್ಷಿಣ ಕೊರಿಯಾ ಸರಕಾರ ನೀಡುವ ‘ಸಿಯೋಲ್‌ ಶಾಂತಿ ಪ್ರಶಸ್ತಿ’ಗೆ ಪ್ರಧಾನಿ ನರೇಂದ್ರ ಮೋದಿ ಭಾಜನರಾಗಿದ್ದಾರೆ. ಈ ಪ್ರಶಸ್ತಿಯನ್ನು 2 ವರ್ಷಗಳಿಗೊಮ್ಮೆ ನೀಡಲಾಗುತ್ತದೆ. ಈವರೆಗೆ ವಿಶ್ವಸಂಸ್ಥೆಯ ಮಾಜಿ ಪ್ರಧಾನ ಕಾರ್ಯದರ್ಶಿ ಕೋಫಿ ಅನ್ನಾನ್‌ (ಘಾನಾ), ಹಾಲಿ ಕಾರ್ಯದರ್ಶಿ ಬಾನ್‌ ಕಿ ಮೂನ್‌ (ದಕ್ಷಿಣ ಕೊರಿಯಾ), ಏಂಜೆಲಾ ಮರ್ಕೆಲ್‌ (ಜರ್ಮನಿ) ಸಹಿತ 13 ನಾನಾ ದೇಶಗಳ ನಾಯಕರು ಈ ಪ್ರಶಸ್ತಿಗೆ ಭಾಜನರಾಗಿದ್ದು, ಮೋದಿ ಈ ಪ್ರಶಸ್ತಿ ಪಡೆಯಲಿರುವ 14ನೇ ವ್ಯಕ್ತಿ ಹಾಗೂ ಮೊದಲ ಭಾರತೀಯರೆನಿಸಿದ್ದಾರೆ.

ಈ ಬಗ್ಗೆ ಪ್ರತಿಕ್ರಿಯಿಸಿದ ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಅಮಿತ್‌ ಶಾ, ‘ಮೋದಿ ನಾಮಿಕ್ಸ್‌’ ಮೂಲಕ ಆರ್ಥಿಕತೆಯನ್ನು ಪ್ರಗತಿ ಪಥಕ್ಕೆ ತಂದಿರುವುದಲ್ಲದೆ, ಪ್ರಜಾಪ್ರಭುತ್ವ ರಕ್ಷಣೆಗೆ ಮೋದಿ ನೀಡಿದ ಕಾಣಿಕೆ ಪರಿಗಣಿಸಿ ಪ್ರಶಸ್ತಿಗೆ ಆಯ್ಕೆ ಮಾಡಲಾಗಿದೆ ಎಂದಿದ್ದಾರೆ.