ಲಾಕ್‌ಡೌನ್‌ಗೆ ಜನರ ಸಹಕಾರ

ಹರಿಹರ: ಕರ್ಫ್ಯೂ ನಿಮಿತ್ತ ಭಾನುವಾರ ತಾಲೂಕಿನಾದ್ಯಂತ ವ್ಯಾಪಾರ, ವಹಿವಾಟು ಸಂಪೂರ್ಣ ಸ್ಥಗಿತಗೊಂಡಿತ್ತು. ಜನರು ಮನೆಯಿಂದ ಹೊರಗೆ ಸುಳಿಯದೆ ಸರ್ಕಾರದ ಆದೇಶಕ್ಕೆ ಸ್ವಯಂಪ್ರೇರಿತರಾಗಿ ಸಹಕರಿಸಿದರು.

ನಗರದ ಅಂಗಡಿ ಮುಂಗಟ್ಟುಗಳು ಬಾಗಿಲು ಮುಚ್ಚಿದ್ದವು. ಸದಾ ಲಾರಿ, ಬಸ್‌ ಸಂಚಾರದಿಂದ ಗಿಜಿಗಿಡುತ್ತಿದ್ದ ನಗರದೊಳಗಿನ ಶಿವಮೊಗ್ಗ-ಹೊಸಪೇಟೆ ಹೆದ್ದಾರಿ ಸೇರಿದಂತೆ ಪ್ರಮುಖ ರಸ್ತೆಗಳು ಬಿಕೋ ಎನ್ನುತ್ತಿದ್ದವು. ಹೆಚ್ಚಿನ ಪೊಲೀಸ್‌ ಕಾವಲು, ಚೆಕ್‌ಪೋಸ್ಟ್‌ಗಳಿಲ್ಲದಿದ್ದರೂ ಜನ-ವಾಹನ ಸಂಚಾರವಿರಲಿಲ್ಲ. ರಂಜಾನ್‌ ಮುನ್ನಾ ದಿನವಾದ ಭಾನುವಾರ ನಗರದ ವ್ಯಾಪಾರ ವಹಿವಾಟು ಕಳೆ ಕಟ್ಟಬೇಕಿತ್ತು. ದಿನಸಿ, ತರಕಾರಿ, ಇತರೆ ಅಗತ್ಯ ವಸ್ತುಗಳ ಖರೀದಿಯಲ್ಲಿ ಜನಜಂಗುಳಿ ಇರಬೇಕಿತ್ತು. ಆದರೆ ಲಾಕ್‌ಡೌನ್‌ನಿಂದಾಗಿ ಆ ಸಡಗರ, ಸಂಭ್ರಮವೂ ಮಾಯವಾಗಿತ್ತು.