ಆಪ್‌ ರಾಲಿಯಲ್ಲಿ ಮೋದಿ, ಮೋದಿ ಘೋಷಣೆ; ಜನರು ಹುಚ್ಚರು ಎಂದ ಕೇಜ್ರಿ

ಹೊಸದಿಲ್ಲಿ : ದಿಲ್ಲಿ ಮುನಿಸಿಪಲ್‌ ಕಾರ್ಪೊರೇಶನ್‌ ಚುನಾವಣೆಗೆ ಪೂರ್ವಭಾವಿಯಾಗಿ ಈಶಾನ್ಯ ದಿಲ್ಲಿಯ ಘೋಂದಾದಲ್ಲಿ  ನಡೆದ ಆಮ್‌ ಆದ್ಮಿ ಪಕ್ಷದ rallyಯಲ್ಲಿ ದಿಲ್ಲಿ ಮುಖ್ಯಮಂತ್ರಿ ಅರವಿಂದ ಕೇಜ್ರಿವಾಲ್‌ ಅವರನ್ನು ನೆರೆದ ಜನಸಮೂಹವು “ಮೋದಿ, ಮೋದಿ’ ಎಂಬ ಮುಗಿಲು ಮುಟ್ಟುವ ಘೋಷಣೆಯೊಂದಿಗೆ ಸ್ವಾಗತಿಸಿತು. 

ಇದರಿಂದ ಸಂಯಮ ಕಳೆದುಕೊಂಡು ಕ್ರುದ್ಧರಾದ ಕೇಜ್ರಿವಾಲ್‌ ಕೆಲವು ವ್ಯಕ್ತಿಗಳ ಗುಂಪೊಂದನ್ನು ಉದ್ದೇಶಿಸಿ, “ಹೀಗೆ ಮೋದಿ ಮೋದಿ ಘೋಷಣೆ ಕೂಗುವ ಮೂಲಕ ನಿಮ್ಮ ಹಸಿವು ಹಿಂಗುವುದಿಲ್ಲ’ ಎಂದರು. ಕೇಜ್ರಿ ಮತ್ತೂ ಮುಂದುವರಿದು, “ಜನರಿಗೆ ಹುಚ್ಚು ಹಿಡಿದಿದೆ’ ಎಂದು ಅರಚಿದರು. 

ಬಳಿಕ ಅಂಬೇಡ್ಕರ್‌ ನಗರದ ಗೌತಮ್‌ ವಿಹಾರ್‌ ಚೌಕದಲ್ಲಿ ನಡೆದ ಇನ್ನೊಂದು ಆಪ್‌ rallyಯಲ್ಲಿ ಕೂಡ “ಮೋದಿ ಮೋದಿ’ ಎಂಬ ಮುಗಿಲು ಮುಟ್ಟುವ ಘೋಷಣೆಗಳು ಕೇಳಿ ಬಂದಾಗ ಕೇಜ್ರಿವಾಲ್‌ ಪೂರ್ತಿಯಾಗಿ ಹತಾಶರಾದರು.

ಎಂಸಿಡಿ ಚುನಾವಣೆ ಎಪ್ರಿಲ್‌ 23ರಂದು ನಡೆಯಲಿದೆ.