ಪ್ಯಾರಾಲಿಂಪಿಕ್ಸ್‌ : ಮೊದಲ ಆರ್ಚರಿ ಪದಕ ತಂದ ಹರ್ವಿಂದರ್‌ ಸಿಂಗ್‌

ಟೋಕಿಯೊ: ಪ್ಯಾರಾಲಿಂಪಿಕ್ಸ್‌ ಆರ್ಚರಿ ಇತಿಹಾಸದಲ್ಲಿ ಭಾರತ ಮೊದಲ ಪದಕ ಗೆದ್ದಿದೆ. ವೈಯಕ್ತಿಕ ರಿಕರ್ವ್‌ ಸ್ಪರ್ಧೆಯಲ್ಲಿ ಹರ್ವಿಂದರ್‌ ಸಿಂಗ್‌ ಕಂಚಿನ ಪದಕಕ್ಕೆ ಗುರಿ ಇರಿಸಿದರು.

ಹರ್ವಿಂದರ್‌ ಸಿಂಗ್‌ ಕೊರಿಯಾದ ಕಿಮ್‌ ಮಿನ್‌ ಸು ವಿರುದ್ಧ ತೀವ್ರ ಪೈಪೋಟಿ ಎದುರಿಸಿಯೂ ಪದಕ ಗೆಲ್ಲುವಲ್ಲಿ ಯಶಸ್ವಿಯಾದರು. ಶೂಟ್‌ಆಫ್ನತ್ತ ಮುಖ ಮಾಡಿದ ಈ ಜಿದ್ದಾಜಿದ್ದಿ ಸ್ಪರ್ಧೆಯಲ್ಲಿ ಹರ್ವಿಂದರ್‌ ಪರ್ಫೆಕ್ಟ್ 10 ಅಂಕ ಗಳಿಸಿದರೆ, ಮಿನ್‌ ಸು 8 ಅಂಕವನ್ನಷ್ಟೇ ಸಂಪಾದಿಸಿದರು. ಇದಕ್ಕೂ ಮೊದಲಿನ 5 ಸುತ್ತುಗಳ ಸ್ಪರ್ಧೆ 2-2ರಿಂದ ಸಮನಾಗಿತ್ತು (26-24, 27-29, 28-25, 25-25, 26-27). ಸೆಮಿಫೈನಲ್‌ನಲ್ಲಿ ಹರ್ವಿಂದರ್‌ ಸಿಂಗ್‌ ಅಮೆರಿಕದ ಮೆವಿನ್‌ ಮಾಥರ್‌ ವಿರುದ್ಧ 6-4ರಿಂದ ಪರಾಭವಗೊಂಡಿದ್ದರು.

31 ವರ್ಷದ ಹರ್ವಿಂದರ್‌ ಸಿಂಗ್‌ ಹರ್ಯಾಣದ ಕೈಥಾಲ್‌ ಸಮೀಪದ ಗುಹ್ಲಾ ಚೀಕಾ ಗ್ರಾಮದವರು. ಪಟಿಯಾಲದ ಪಂಜಾಬಿ ವಿವಿಯಲ್ಲಿ ಅರ್ಥಶಾಸ್ತ್ರ ಪಿಎಚ್‌ಡಿ ಪಡೆದಿದ್ದಾರೆ.

ಇದನ್ನೂ ಓದಿ :ವರ್ಷಾಂತ್ಯಕ್ಕೆ ಖಾದ್ಯ ತೈಲಗಳ ಬೆಲೆಯಲ್ಲಿ ಇಳಿಕೆ : ಸುಧಾಂಶು ಪಾಂಡೆ

ಕೇವಲ ಒಂದೂವರೆ ವರ್ಷದ ಮಗುವಾಗಿರುವಾಗ ಹರ್ವಿಂದರ್‌ಗೆ ಡೆಂಗ್ಯೂ ಕಾಡಿತ್ತು. ಸ್ಥಳೀಯ ವೈದ್ಯರೊಬ್ಬರು ನೀಡಿದ ಇಂಜೆಕ್ಷನ್‌ ಪರಿಣಾಮವಾಗಿ ಎರಡೂ ಕಾಲುಗಳ ಸ್ವಾಧೀನ ಕಳೆದುಕೊಳ್ಳಬೇಕಾಯಿತು.