ಅಮೆರಿಕ ಬಿಟ್ಟು ಹೋದ ಅಸ್ತ್ರಗಳು ಪಾಕ್‌ ಉಗ್ರರ ಕೈಲಿ!

ಬಾರಾಮುಲ್ಲ: ಅಫ್ಘಾನಿಸ್ಥಾನ ತೊರೆಯುವ ವೇಳೆ ಅಮೆರಿಕ ಸೇನೆ ಬಿಟ್ಟು ಹೋಗಿದ್ದ ಲಕ್ಷಾಂತರ ಸಣ್ಣಸಣ್ಣ ಆಧುನಿಕ ಸೇನಾ ಉಪಕರಣಗಳು; ಈಗ ಭಾರತ-ಪಾಕ್‌ ಗಡಿ ನಿಯಂತ್ರಣ ರೇಖೆಯ ಬಳಿ ಪತ್ತೆಯಾಗಿವೆ ಎಂದು ಜಮ್ಮು-ಕಾಶ್ಮೀರದಲ್ಲಿರುವ ಭಾರತದ ಹಿರಿಯ ಸೇನಾಧಿಕಾರಿ, ಮೇಜರ್‌ ಜನರಲ್‌ ಅಜಯ್‌ ಚಾಂದ್‌ಪುರಿ ತಿಳಿಸಿದ್ದಾರೆ.

ಹಾಗೆಯೇ ಅಫ್ಘಾನಿಸ್ಥಾನದಲ್ಲಿ ಆಶ್ರಯ ಪಡೆದಿದ್ದ ಪಾಕ್‌ ಉಗ್ರರು ಅಲ್ಲಿ ತಾಲಿಬಾನ್‌ ಆಡಳಿತ ಬಂದ ಅನಂತರ ಪಾಕ್‌ ಆಕ್ರಮಿತ ಕಾಶ್ಮೀರಕ್ಕೆ ಬಂದು ಸೇರಿಕೊಳ್ಳುತ್ತಿದ್ದಾರೆ. ಇವರು ಭಾರತಕ್ಕೆ ನುಸುಳುವ ಯತ್ನ ಮಾಡು­ತ್ತಿ­ದ್ದಾರೆ. ಕಳೆದ ವರ್ಷ 6 ಬಾರಿ ಭಾರತಕ್ಕೆ ಒಳ ನುಸುಳಲು ಪಾಕ್‌ ಉಗ್ರರು ಯತ್ನಿಸಿದ್ದರು. ಅವರನ್ನು ಹೊಡೆದುರುಳಿಸಲಾಗಿತ್ತು.

ಈ ಸಂದರ್ಭದಲ್ಲಿ ಉಗ್ರರಿಂದ ವಶಪಡಿಸಿ­ಕೊಂಡ ಉಪಕರಣಗಳಲ್ಲಿ ಕೆಲವು ಅಮೆರಿಕ ಸೇನೆಗೆ ಸೇರಿದವಾಗಿವೆ. ಅಂದಾಜಿನ ಪ್ರಕಾರ ಅಮೆರಿಕ ಸೇನೆ ಅಫ್ಘಾನ್‌ನಲ್ಲಿ 6 ಲಕ್ಷ ಶಸ್ತ್ರಾಸ್ತ್ರ ಗಳು, ರಾತ್ರಿನೋಟಕ್ಕೆ ಅನುಕೂಲವಾಗುವ ಲಕ್ಷಾಂತರ ಸಾಧನಗಳನ್ನು ಬಿಟ್ಟು ಹೋಗಿದ್ದಾರೆ. ಇವನ್ನು ಬಳಸಿಕೊಂಡು ಬರುವ ದಿನಗಳಲ್ಲಿ, ಇನ್ನಷ್ಟು ಪಾಕ್‌ ಉಗ್ರರು ಭಾರತದೊಳಕ್ಕೆ ನುಸುಳಲು ಯತ್ನಿಸುವುದು ಖಚಿತ ಎಂದು ಅವರು ಹೇಳಿದ್ದಾರೆ.