ಎಫ್ಎಟಿಎಫ್ ನಲ್ಲಿ ಭಾರತಕ್ಕೆ ಪಾಕ್‌ ಆಕ್ಷೇಪ!

ಇಸ್ಲಾಮಾಬಾದ್‌: ಉಗ್ರರು ಹಾಗೂ ಉಗ್ರ ಸಂಘಟನೆಗಳಿಗೆ ಹಣಕಾಸು ಲಭ್ಯತೆ ನಿಯಂತ್ರಿಸುವ ವಿಚಕ್ಷಣಾ ಪಡೆ ಎಫ್ಎಟಿಎಫ್ನಲ್ಲಿ ಭಾರತದ ಸದಸ್ಯತ್ವಕ್ಕೆ ಪಾಕಿಸ್ಥಾನ ಕ್ಯಾತೆ ತೆಗೆದಿದೆ. ಭಯೋತ್ಪಾದನೆಯನ್ನು ನಿಯಂತ್ರಿಸಲು ಎಫ್ಎಟಿಎಫ್ ಈಗಾಗಲೇ ಹಲವು ಕ್ರಮಗಳನ್ನು ಪಾಕಿಸ್ಥಾನಕ್ಕೆ ಸೂಚಿಸಿದ್ದು, ಇದರ ಅನುಷ್ಠಾನದ ಬಗ್ಗೆ ಮೇಲ್ವಿಚಾರಣೆ ನಡೆಸಲಾಗುತ್ತಿದೆ.

ಆದರೆ ಈಗ ಪಾಕಿಸ್ಥಾನವು ಭಾರತದ ಸದಸ್ಯತ್ವಕ್ಕೆ ಆಕ್ಷೇಪಿಸಿದ್ದು, ಪಾಕಿಸ್ಥಾನದ ಪರವಾಗಿ ಭಾರತ ಪೂರ್ವಗ್ರಹ ಪೀಡಿತ ನಿಲುವನ್ನು ಹೊಂದಿದೆ. ಹೀಗಾಗಿ ಭಾರತ ಸದಸ್ಯತ್ವ ಹೊಂದಿರುವಾಗ ಪಾಕಿಸ್ಥಾನಕ್ಕೆ ಸೂಕ್ತ ನ್ಯಾಯ ಸಿಗದು ಎಂದು ಪಾಕಿಸ್ಥಾನದ ಹಣಕಾಸು ಸಚಿವ ಅಸದ್‌ ಉಮರ್‌ ಹೇಳಿದ್ದಾರೆ.

ಎಫ್ಎಟಿಎಫ್ ಸೂಚಿಸಿದ ಕ್ರಮಗಳ ಮರುಪರಿಶೀಲನೆಗಾಗಿ ಏಷ್ಯಾ ಪೆಸಿಫಿಕ್‌ ಗ್ರೂಪ್‌ ರಚಿಸಲಾಗಿದ್ದು, ಈ ತಂಡವೇ ಪಾಕಿಸ್ಥಾನದ ಕ್ರಮಗಳನ್ನು ಮರುಪರಿಶೀಲನೆ ನಡೆಸಲಿದೆ. ಈ ತಂಡಕ್ಕೆ ಭಾರತದ ಹಣಕಾಸು ಗುಪ್ತಚರ ವಿಭಾಗದ ಪ್ರಧಾನ ನಿರ್ದೇಶಕರೇ ಸಹ ಮುಖ್ಯಸ್ಥರಾಗಿದ್ದಾರೆ.